Iya Akobwola Banu? —Bika biyendeka Mbimbiliya?

Muzimbu wa baka UN:

• Kushangumuka lya October 7 kunena lya October 23, 2023, nzita ya baka-Gaza na Israel inatsii banu bakutubakana 6,400 na kubulumuna banu ba kutubakana 15,200, bwingi bwa banu batsi keti maswalale. Kutundaho, banu babangi banaseze binjibo byabo.

• Kushwa lika lya September 24, 2023, nzita ya baka-Russia na Ukraine inatsii banu bakupwa 9,701 baje keti maswalale, co banu bakupwa 17,748 banabulumuka mu Ukraine.

Mbimbiliya inakulahesa bika baje bali na kuyanda mwafwa ya nzita?

Biinakulahesa Mbimbiliya

Mbimbiliya yakulahesa ngwayo Njambi ‘akamanesa binzita ha lifuti-libu hoshe.’ (Bisamu 46:9) Akapangesa bumwene bwa mwilu buje bukaswana bifulumende bya hasi hoshe. (Daniele 2:44) Bumwene bwa Njambi bukapatula banu ku tuyando.

Nangukeni byakalinga Yesu Kristu, Mwene wa Bumwene bwa Njambi:

• “Akamena kahutu uje alomba bukwasi, Co lalo akamena munu wa kwisi uje kesi nou wa kumukwasa. Akazibila ngozi munu wa kwisi na kahutu Na kwobola myonyo ya tuhutu. Akabamena ku baka-kulyatelela na baka-lwozi, Co maninga abo akapwa a seho mu mesho endi.”—Bisamu 72:12-14.

Njambi akatundisa byuma byabibi na tuyando twoshe tuneja mwafwa ya binzita na bukenya.

• “Akasikumuna misozi yoshe ku mesho abo, co kutsa kucikakalako lalo nambe busiwa nambe kulila nambe kuziba kubabala. Byuma bya laja bineti.”—Kujombolola 21:4.

Bumwene bwa Njambi ololo butengulula kaye. Mbimbiliya yapolofwetele cimweja ngwayo, kukakala “binzita na mizimbu ya binzita”, co bikebyo bituli na kumona ano matangwa. (Mateu 24:6) Byuma bili na kulingiwa ano matangwa bimwesa ngwabyo tuli na kuyoya mu “matangwa a mamaneselelo” a biyulo bya banu.—2 Timothi 3:1.