Waneni Babusamba Mangana Keti Mulizibe Buli—Mbimbiliya Yasa Kutukwasa Bati?

Mu 2023, baka-kutala bya bukangule bwa banu bananangukile ngwabo kuliziba buli kwasa kunena bukalu bwakama ku bukangule bwa munu. Kuma kuli byuma bimo byasa kutukwasa mangana keti tulizibe buli ndi?

• Ndotolo wa lizina lya Vivek Murthy mukulunu wa baka-kutabula ku America ngwendi: “Twaka bukangule bwetu mu bushonde nga tuliziba buli na kulyangununa ku bakwetu.” Natwalelelaho kwendeka ngwendi: “Oloni kuli bimo bitwasa kulinga mangana keti tulizibe buli.” Bika bitwasa kulinga? “Twasa kulingako byuma byabindondo ha litangwa na litangwa mangana tukanyamese busamba bwetu na bakwetu.”a

Kutwesi kuliziba lika buli nga tuli likalyetu. Bamo basa kuliziba buli nameme bali na mbunga. Mbimbiliya yasa kutukwasa nameme tuliziba buli mu ngila yoshe-yoshe. Inendeka ha byuma bitunapande kulinga mangana tukanyamese busamba bwetu na bakwetu mangana keti tulizibe manene buli.

Binangulo bya mu Mbimbiliya bije byasa kutukwasa

Simutwiyeni mwamubwa. Oku kukulumbununa ngwabo yetu lika tunapande kuleka bakwetu mwoshe mutuli na kulizibila, oloni na bakebo tunapande kubatolilila mwamubwa. Nga mumwesa munu ngweni mwamwaka mbunge, co busamba bweni bukanyama manene.

• Cinangulo ca mu Mbimbiliya: “Oku mwaka mbunge na ku byuma bibatonda bakweni, keti ku byuma bimutonda yeni lika.”—Filipi 2:4.

Pweni na babusamba babangi. Kaleni na babusamba baje banapu bakulunu hali yeni nambe banike hali yeni nambe baje batunda ku bisemwa bya kuliseza-seza nambe baje batunda ku lifuti lyeka.

• Cinangulo ca mu Mbimbiliya: “Shokololeni manene bimbunge byeni.”—2 Korinte 6:13.

Nga mushaka kuzibuka byabingi ha mwakukela na busamba bwa kukanyama, tandeni ñanda ya Ingilishi ya “Satisfying Our Hunger for Friendship.”