Mbimbiliya Ikwasa Mapituka Bakale na Lilabelelo

Mwaka na mwaka, banu babangi bakatewe ha binjibo byabo. Kuma neni muli na kuliwana na bukalu bwa kulifwa ndi? Nga mukemwo, co zibukeni ngweni kumwasa kumanesa obu bukalu likalyeni, oloni Njambi amikwasa mukale na lilabelelo lya kukayoya mwamubwa kulutwe lije limuwana mu Bisoneka bya Kujela.

Christos Stylianides mukulunu mu European Uniona ngwendi: “Mapituka na banu baje babanasindiya kutunda ha binjibo byabo bakatondo bukwasa bwa ku mubila na kubakwasa bakale na lilabelelo lya byuma bija kulutwe.”b Banu baje bali na lilabelelo bakaka manene mbunge ku buyoye bwabo bwa kulutwe. Mapituka bakatondo kubakwasa bakale na lilabelelo na kubatakamesa mangana bapwe ba kulikangula mu bisinganyeka.

Emmanuel wa ku Haiti ngwendi: “Munjatewele mu lifuti mutwakele na kuseza naanga yange njalizibile manene kubabala ku mbunge. Njazibile manene lyoba na kukala mu bishoti.”

Kuma mukalizibi ngwe mwalizibilile Emmanuel ndi? Nga munatewe ha njibo yeni, co mutonda kumizembeleka na kukala na lilabelelo. Lijwi lya Njambi Mbimbiliya lyasa kumikwasa bati?

Lijwi lya Njambi Lituzembeleka

Mbimbiliya ngwayo: “Yehovac . . . wazema baka-kwija.”—Detronoma 10:17, 18.

Mbimbiliya ngwayo: “Yehova ali muyehi na baje boshe bali na kutambeka kuli ikeye.”—Samu 145:18.

Mbimbiliya ngwayo: “Kucitaba, Njambi wa busunga alinge byuma bya kuhenga . . . Muka-nzili Yoshe kesi kwakula mu kuhenga.”—Yombi 34:10, 12.

Oku kulumbununa ngwabo Njambi keti ikeye ali na kuminenela tuyando. Kesi na kumyana kashitiko nambe kumyeseka mu kukaluwisa buyoye bweni.

Lilabelelo lituwana mu Lijwi lya Njambi

Mbimbiliya inalumbununa byakatulingila Njambi kulutwe. Lilabelelo linakwasa baje banatewe ha binjibo byabo.

Mbimbiliya ngwayo: “[Njambi] akasikumuna misozi yoshe ku mesho abo, co kutsa kucikakalako lalo nambe busiwa nambe kulila nambe kuziba kubabala.”—Kujombolola 21:4.

Oku kulumbununa ngwabo tuyando tukahwa. Njambi nakulahesa kumanesa byuma byoshe bije bili na kukaluwisa buyoye.

Karla wa ku El Salvador ngwendi: “Njambi ololo amanesa byuma byabibi bije bili na kulingiwa. Eli lilabelelo linanjikwasa njake manene mbunge ku litangwa lije libakamanesa byuma byabibi byoshe.”

Mbimbiliya ngwayo: “Byuma bya laja kubakabyanuka, co kubikakala lalo mu bimbunge byabo.”—Isaya 65:17.

Oku kulumbununa ngwabo kutukanuka lalo byuma byabibi. Njambi akatukwasa mangana keti tukanuke lalo byuma byabibi.

Natalia wa ku Ukraine ngwendi: “Mbimbiliya inakulahesa ngwayo kutukanuka byuma bili nakutuzibisa kubabala ku mbunge. Eli lilabelelo likanjikwasa njikolese mwafwa njazibuka ngwange byuma byoshe bituli na kuliwana nabyo ololo bihwa.”

Mbimbiliya ngwayo: “Njambi wa mwilu akashimbika bumwene buje . . . bukatika na kunyongesa bumwene bwoshe obu.”—Daniele 2:44

Oku kulumbununa ngwabo bumwene bwa mwilu bukebwo lika bukayula lifuti-libu lyoshe. Ololo Njambi atundisa bifulumende byoshe bya banu na kubingisa na bumwene bwendi bwa mwilu. Obu bumwene bukanena kwoloka kwa busunga na kwakula kwakubwa ku banu boshe.—Mika 4:3, 4.

Mustafa wa ku Middle East ngwendi: “Njikakanyama munjikanuka ngwange bukalu bwoshe butuli na kuliwana nabwo bunapu bwa mu simbu yaindondo lika, mwafwa Bumwene bwa Yehova ololo bumanesa obu bukalu bwoshe.”

Mana a mu Lijwi lya Njambi

Binangulo bya mu Mbimbiliya bimikwasa mukolesele bukalu bumunaliwana nabwo. Bimikwasa mukolese nga byuma binatenguluka mu kuyoya kweni. Nangukeni binangulo binatako mubili na kukwasela mapituka:

Mbimbiliya ngwayo: “Nameme munu ali na byuma byabingi, byuma byanafuku kubyasa kumwana mwonyo.”—Luka 12:15.

Awa majwi amabwa amikwasa mukolese: Mwasa kuliziba kubihya mwafwa ya byuma bimunaseze. Oloni nga mwanuka ngweni buyoye bweni bwapwa bwa seho manene kutubakana byuma bimunaseze, co kumikwasa mujeneka kuziba manene kubabala ku mbunge.

Natalia wa ku Ukraine ngwendi: “Kuyoya kwapwa kwa seho manene kutubakana byuma bya ku mubila. Mwafwa bufuko nambe bimbongo kubyasa kuminyungilila ku bukalu bwoshe.”

Mbimbiliya ngwayo: “Keti wendeke ngwobe, “Mwafwa bika matangwa a kunima apwile amabwa kutubakana ano?””—Ekelesiya 7:10.

Awa majwi amabwa amikwasa mukolese: Munasa kuliwana na bukalu bwakama, oloni keti mwesekese mumuli na kuyoyela ha simbu ino nomu mumwakele na kuyoyela kunima, mwafwa kulinga ngoco kumizibisa kubabala ku mbunge.

Eli wa ku Rwanda ngwendi: “Kumona byuma binjili na kuliwana nabyo ha simbu ino mu ngila inapande kukanjilingisa njijeneke kukala manene mu bishoti.”

Mbimbiliya ngwayo: “Ngeci, nga tuli na byakulya na bizalo tujauka nebi byuma.—1Timothi 6:8.

Awa majwi amabwa amikwasa mukolese: Jaukeni na byuma bimuli nabyo. Kujauka na byuma bimuli nabyo kutepulula ku bishoti.

Ivan wa ku Ukraine ngwendi: “Mbimbiliya ili na kunjikwasa kumona byuma mu ngila inapande na kujeneka kusinganyeka manene ha byuma bitunazimbalesa. Yange na munakazi wange tunabwahelela mwafwa tuli na kuyoya na kukala ku mutambela waubwa.”

Mbimbiliya ngwayo: “Byuma byoshe bimushaka ngweni bakweni bamilingile, neni balingilenibyo.”—Mateu 7:12.

Awa majwi amabwa amikwasa mukolese: Kukala na mbunge ya kubandamena na ngozi kumilingisa mulikwatasane na bakweni. Nga mulinga ngoco banu bamitambula na kujeneka kumimwesa kangu.

Angelo wa ku Sri Lanka ngwendi: “Banu babangi bazema kubasingimika, kubazibila ngozi na kubamwesa cizemo. Kulinga ngoco kumikwasa mulizibasane na banu babangi.”

Mbimbiliya ngwayo: “Lombeni Njambi bimutonda kwitila mu lilombelo na kulambelela, hamolika na kukandelela, co kwoloka kwa Njambi . . . kunyunga bimbunge byeni na bisinganyeka byeni.”—Filipi 4:6, 7.

Awa majwi amabwa amikwasa mukolese: Lekeni Njambi mu lilombelo byoshe bimutonda, mumuli na kulizibila na bishoti bimuli nabyo. Malombelo acifweci amikwasa mutepulule ku bishoti mwafwa ya byuma bimunaliwana nabyo mu buyoye.

Yol wa ku South Sudan ngwendi: “Njikalombela kuli Njambi simbu yoshe munjikakalustafa wa ku Middle East ngwendia mu bukalu, co akanjikumbulula. Binjinalilongesa mu Mbimbiliya binanjikwasa njikale na kwoloka kwa mu bisinganyeka.”

Valentina wa ku Ukraine ngwendi: “Binangulo bya mu Mbimbiliya binanjikwasa njikale na kwoloka kwa mu bisinganyeka kuje kunanjikwasa njikolese muno mu simbu yaikalu.”

Emmanuel wa ku Haiti ngwendi: “Njinakanyama mwafwa ya kuzibuka ngwange Njambi natukulahesa buyoye bwabubwa kulutwe.”

Kuma mushaka kulilongesa byabingi kutalesa ku bikulaheso biinendeka Mbimbiliya ha kuzembeleka na lilabelelo na byuma bimilingisa muikulahele ndi? Lombeni Mukaleho amyendele. Abwahelela manene kumikwasa kwa kujeneka kumifwetesa.