Cipangi ca Bakaleho ba Yehova Bali na Kucifwetela Bati?

Cipangi cetu ca mu kaye koshe bali na kucikundwiya na milambu ya kulyana ije ikatundu ku Bakaleho ba Yehova.a Ku myela kutukalingila biwano kwakala bikasha bya kulambwila, co lalo mwasa kuwana bingila bikwabo mwakulambwilamo ha mutamba wetu wa ha intaneti wa jw.org (co yeni kwisi ha Donations). Munu asa kulyangwila kulambula bimbongo bije bikwasa mu cipangi ca mu kaye koshe nambe bije bikwasa cikungulukilo lika indi kulambula mwoshe.

Bakaleho ba Yehova kubesi kwana cabulikumi nambe kutomena banu bimbongo bibanapande kulambula nambe kutotalesa mutamba wa bimbongo bibanapande kufweta ku byuma bibali na kuwana. (2 Kolinte 9:7) Kutwesi kulinga bikoleko nambe kufwetesa banu baija ku biwano byetu, co lalo baje bakapanga bipangi bya kufwa ngwe kumbwitika, kwendesa bya butsi, bilika bya bulo na bipangi byeka binakundama ku bulombelo kubesi kubafweta. Kutwesi kuwana bimbongo ha kulandesa byakulya nambe kweha bweho bumo, nambe bingila byeka bya kulifwa nabyo, co lalo kutwesi kulomba bimbongo ku banu. Kutwesi kujombolola baje balambula nambe biñanda binakundama kuli bakebo. (Mateu 6:2-4) Ha webusaiti yetu na mu mabulu etu kutwesi kwakamo biñanda bya kutsimanesa mingoso nambe byuma bije bilingisa batufwete.

Kumamaneselelo a ngonde na ngonde, mu bikungulukilo byoshe bya Bakaleho ba Yehova bakatanda biñanda bije bimwesa mubinapangela bimbongo mu ngonde oyo, co munu woshe-woshe asa kutolililako omwo batanda. Simbu yoshe baketuluka mu mapapelo amwesa mubinapangela bimbongo mangana bamone ngwabo bimbongo byoshe bali na kubipangesa mu ngila inapande.—2 Kolinte 8:20, 21.

Bingila bya Kulambwilamo

• Bikasha mwakulambwila: Mwasa kwaka bimbongo nambe maceki mu bikasha bya kulambwila bije bikakala ku Njibo ya Bumwene, ku Binjubo bya Biwano Byakama nambe ku myela kwoshe kutukalingila biwano.

• Kulambwila ha intaneti: Mu mafuti amangi, citaba kulambwila ha mutamba wetu wa ha intaneti wa “Donate to Jehovah’s Witnesses.” Mwasa kulambula kupangesa ma credit card, ma debit card, nambe kutundisa mu akaunti yeni ya ku banki nambe bingila byeka kupangesa makina.b Bakaleho bamo bakangula ‘kwaka cimo ku mukulo’ ngonde na ngonde omwo baleka likina ngwalyo litume-tume bimbongo kupangesa bingila bitunendeka.—1 Kolinte 16:2.

  

• Kuyongwela cimweja bya kwana: Bingila bimo byakulambwilamo bikatondo kulibwahesela cimweja hamo na kwihula baka-mashiko. Kulibwahesela cimweja mu ngila ei kwasa kumikwasa mutepulule ku bimbongo bimufweta ku mitelo kwesekesa na lifuti mumuli. Banu babangi banawana bukwasi ha kuzibuka mwamubwa byalibungila mu milambu ya kukwasa banu ije yanasa kwana munu ha simbu yaciyoya nambe munima ya kutsa kwendi. Nga mushaka kupangesa imo ya bingila binatako, tumilomba ngwetu musimutwiye na ofisi ya Bakaleho ba Yehova ya mu lifuti lyeni:

  • maakaunti a ku banki

  • insurance na matumbe a litaya

  • libu nambe mitungo

  • ma stock na ma bond

  • ma will na ma trust

Nga mushaka kuzibuka bingila bya kulambwilamo bibatabesa kumwakala, co yeni ha “Donate to Jehovah’s Witnesses.”