Njasa Kwangula Bati Munu Wamubwa wa Kutembwinina?

“Munjakele na kuliwana na bukalu ku sikola, njakele na kusinganyeka ha munu uje waliwanaho laja na bukalu bunjaliwanene nabwo, co oku kwakele na kunjikwasa manene. Njakele na kutembwinina mwanja wendi. Kukala na munu injakele na kutembwinina kwakele na kunjikwasa njikolese munjakele na kuliwana na bukalu.”—Haley

Kukala na munu imutembwinina kwasa kumikwasa mujenjuke bukalu na kushulisilila bilengo bimunalyakela. Oloni munapande kwangula kutembwinina munu wamubwa.

• Mwafwa bika munapande kwangula mwamubwa munu wa kutembwinina?

• Mwasa kulinga bati ngoco?

• Bibakendeka bakweni

Mwafwa bika munapande kwangula mwamubwa munu wa kutembwinina?

• Banu bamwangula kutembwinina basa kumilingisa mulinge byuma byabibwa nambe byabibi.

  Mbimbiliya inashongangeya baka-Kristu ngwayo banapande kutembwinina baje bali na myanja yaibwa, ngwayo: “Omwo musinganyekesesa ha bubwa bunatundu mu futisi yabo, tembwinineni likulahelo lyabo.”—Bahebelu 13:7.

  Lingeni Ebi: Kulingila banu bamwangula kutembwinina basa kumilingisa mulinge byuma byabibwa nambe byabibi, anguleni kutembwinina baje bali na bifwa bibashangala keti baje ba kutsimana nambe baje lika banapu hamo neni ku myaka.

  “Njinalilongesele byabingi ku bifwa bya mukwetu muka-Kristu wa lizina lya Adama. — Njikalizibi kubwaha munjikanuka byuma bimo byendekele na kulinga. Kazibuka lika mubinanjikwasela bifwa byendi.”—Colin

• Banu bamwangula kutembwinina basa kutengulula mu mukasinganyekela na kumilingisa mulizibe mwamubwa nambe mwamubi.

  Mbimbiliya ngwayo: “Keti bamyungumune, kulikwatasana na banu bababi kubiisa bilinga byabibwa.”—1Korinte 15:33.

  Lingeni Ebi: Anguleni kutembwinina munu wa bifwa byabibwa keti uje asholoka lika bwino, mangana keti mungumuke nambe kukalibeya.

  “Njikalizi ngwe keti njiwa seho na kupwa wamubi nga njilyesekesa ku banu bababwa. Basa kukulingisa wakele lika mana ku sholwesi yobe.”—Tamara.

  Bimunapande kusinganyekesesa: Bukalu muka butunda mu kwangula kutembwinina banu ba kutsimana?

• Munu imwangula kutembwinina nasa kumilingisa mushulisilile bilengo byeni nambe kumyonowesa.

  Mbimbiliya ngwayo: “Uje enda na baka-mana apwa muka-mana.”—Provebia 13:20.

  Lingeni Ebi: Anguleni kutembwinina banu baje bakamwesa bifwa bimushaka kukala nabyo. Omwo mucili na kubatalelela, nangukeni bimwasa kulinga mangana mushulisilile bilengo byeni.

  “Mwasa kwendeka ngweni, ‘hano oni njitonda kwaka mbunge ku byuma ngwe mwakalingi Jane’. Akanyungu simbu, co akaka mbunge ku byuma byakalingi.’”—Miriam

  Simpi ya seho ei: Nga utembwinina munu wamumbwa nobe upwa u munu wamubwa.

Mwasa kwangula bati mwamubwa?

Kuli bingila bibali byasa kumikwasa mwangule munu wa kutembwinina.

1. Anguleni cifwa cimushaka kukala naco, co waneni munu imushaka kutembwinina uje ali noco cifwa.

2. Anguleni munu imushaka kutembwinina na kwangula cifwa cimo ku bifwa byendi cimushaka kukala naco.

Mutamba ubanamisezela haje hamwasa kusoneka umikwasa mangana mushulisilile bilengo byeni.

Banu bamwasa kutembwinina basa kupwa:

• Bakweni. “Njitonda kupwa ngwe kabusamba kange. Waka bakwabo mbunge. Nameme wapwa mwanike hali yange oloni njikamono bifwa byabibwa muli ikeye bije kunjesi, co uku kukanjilingisa njimutembwinine”—Miriam

• Bakukola. Aba banasa kupwa bisemi bobe nambe bakweni baka-kristu. “Bisemi bange boshe bali na mwanja waubwa unjasa kutembwinina. Bali na bifwa byabibwa. Njikamono tupenga twabo nameme bali na tupenga oloni bapwa ba kulongwa. Nange njitonda ngwange munjikola bakanjendeke muje.”—Annette

• Banu ba mu Mbimbiliya. “Njinangula banu bakupwamo banjishaka kutembwinina ba mu Mbimbiliya bakufwa ngwe, Timothi, Ruthi, Yombi, Pita na Mwanike wa kaisalele mwafwa ya bifwa byabyo byakuliseza-seza. Munjikalilongesa bya banu ba mu Mbimbilya njikashangumuka na kubakulahela. Njinalikuu kulilongesa mizimbu ili mu libulu lya Mulikanyise Tumelo Yabona, na ‘Role Model Index’ ije ili mu libulu lya Bikumbululo ku Bihula Bibakehula Babaha volyumu 1 na volyumu 2.”—Melinda.

Lingeni Ebi: Keti mwangule kutembwinina lika munu umo. Kapositolo Paulu walekele bakwabo baka-Kristu ngwendi: “kengeni mesho eni hali baje bali na kwenda mu ngila ije inalitombola na mwanja utwamimwesele.”—Filipu 3:17.

Muzibuka Ndi? Mwasa kupwa munu ibatembwinina! Mbimbiliya ngwayo: “Pwa mwanja kuli ba kulongwa mu byendeka, mu bilinga, mu cizemo, mu likulahelo na mu kujela.”—1 Timothi 4:12.

“Nameme kuli hamo ha unapande kupangela, oloni bifwa bimo biwakala nabyo byasa kukwasa bakweni bakale na bifwa byabibwa. Kuuzibuka owo ali na kukumona na bukwasi bwawana mwafwa ya bifwa byobe byabibwa.”—Kiana