Levitike
1 Yehova wasanene Mosesa na kwendeka nendi mu tenti ya kuliwanena ngwendi: 2 “Leka Baisalele* ngwobe, ‘Nga umo weni anena bwana bwa cimuna kuli Yehova, co napande kunena ngombe, nambe manga nambe membe.
3 “‘Nga anena ngombe mangana apwe bwana bwa kwenyeka, co napande kunena cimuna wa nkomba wamubwa. Napande kumwana kuli Yehova kutundilila kwisi ya mbunge yendi. Napande kumwanena ku cikolo ca tenti ya kuliwanena. 4 Napande kukambeka liboko lyendi ha mutwe wa cimuna uje apwa bwana bwa kwenyeka, co Njambi atambula bwana bwendi na kukonekela bubi bwendi.
5 “‘Co banapande kutsiila muna ngombe wa nkomba halutwe lwa Yehova, co bana ba Aloni baje banapu tupilistu bakana maninga a uje cimuna kuli Njambi na kuwashamwina ku mitambela yoshe ya mutula uje uli ku cikolo ca tenti ya kuliwanena. 6 Cimuna uje apwa bwana bwa kwenyeka banapande kumujuba na kumuteta bipuka-bipuka. 7 Bana ba Aloni baje banapu tupilistu banapande kwaka manungu a tuhya ha mutula na kwakaho bikuni. 8 Bana ba Aloni ba banalume baje banapu tupilistu bakabwahesa bipuka bya bwana bwa kwenyeka hamolika na mutwe na mazi* ha bikuni bije bili na kushukuma ha mutula. 9 Mila yendi na mendi endi banapande kubikusha mu mema, co kapilistu napande kubyenyeka mangana bikakumune bwisi ha mutula kupwa bwana bwa kwenyeka, bwana bwa kwenyeka mu tuhya bwa lwengo lwalubwa kuli Yehova.
10 “‘Nga ana manga nambe membe kupwa bwana bwa kwenyeka, napande kwana manga wamubwa wa nkomba nambe membe wamubwa wa nkomba. 11 Banapande kutsiila uje cimuna ku kunto ya mutula halutwe lwa Yehova, co bana ba Aloni ba banalume baje banapu tupilistu bakashamwine maninga endi ku mitambela yoshe ya mutula. 12 Napande kuteta uje cimuna mu bipuka-bipuka, co kapilistu napande kubyaka mwamubwa hamolika na mutwe na mazi* ha bikuni bije bili ha tuhya tuje tuli ha mutula. 13 Akakusha mila ya uje cimuna na mendi endi mu mema, co kapilistu akabyana kuli Njambi na kubyenyeka mangana bikakumune bwisi ha mutula. Binapu bwana bwa kwenyeka, bwana bwa kwenyeka mu tuhya bwa lwengo lwalubwa kuli Yehova.
14 “‘Oloni nga ana kazila kuli Yehova kupwa bwana bwa kwenyeka, co napande kunena tutela nambe bana ba mayembe ba kulela. 15 Kapilistu akanena uje kazila ku mutula na kumubatula mutwe na kumwenyeka mangana akakumune bwisi ha mutula, oloni napande kundwekesela maninga endi ku mutambela umo wa mutula. 16 Napande kutundisa lijakwilo lyendi na mangona endi na kubyumbila kumukulo wa mutula, ku butuhukilo bwa litangwa, kuje kubakajukwila lito.* 17 Amubatwile haje hanaliwanena mambaba kwa kujeneka kumutepa mu bipuka bibali. Co kapilistu akamwenyekele ha bikuni bije bili na kushukuma ha mutula mangana akakumune bwisi. Obu bunapu bwana bwa kwenyeka, bwana bwa kwenyeka mu tuhya bwa lwengo lwalubwa kuli Yehova.