Levitike

26 “‘Kumwapandele kupanga binjambi. Kubesi na seho. Kumwapandele nambe kushimbika tumponya ba kushonga nambe bingunzi bya kulemesa nambe kwaka mamanya a kushonga mu lifuti lyeni mangana muwatsikamene, mwafwa yange Yehova Njambi yeni. 2 Munapande kunyunga bisabata byange na kumwesa kasingimiko mwela wange wa kujela. Yange Yehova.

3 “‘Nga mutwalelelaho kwenda mu kulitombola na mashiko ange na kunyunga byuma binjamishikile na kubyononoka, 4 co njikaminyokesela nyozi ha simbu inapande, co lifuti likamenesa bimbuto, co miti ya mu shwata ikema bushuka. 5 Simbu yeni ya kujungula bimbuto ikatwalelelaho kweta na ha simbu ya kuteja bushuka bwa binyu, co simbu ya kuteja bushuka bwa binyu ikatwalelelaho kweta na ha simbu ya kukuna, co mukalya makende eni na kukuta na kukala mu lifuti lyeni kwa kujeneka bushonde. 6 Njikanena kwoloka mu lifuti, co mukalala kwa kujeneka munu amizibisa lyoba. Njikatundisa bikashama ba butenu mu lifuti, co mu lifuti lyeni kumukakala binzita. 7 Mukakilimisa bitozi beni, co bakawa halutwe lweni mwafwa ya mukwale. 8 Banu beni batanu bakakilimisa bitozi beni 100, co banu beni 100 bakakilimisa bitozi beni 10,000, co bitozi beni bakawa halutwe lweni mwafwa ya mukwale.

9 “‘Njikamibezikisa na kumitumisa na kumipwisa babangi, co njikanyunga cikumiiyo njinjalikumiiye neni. 10 Mukateja bimbuto byabingi bije bimukalya kuketa na mu mwaka unatako, co mukatundisa bya laja na kwingisamo byabiha. 11 Njikaka tabanakele yange hakati keni, co kunjikamibyana. 12 Njikenda neni na kupwa Njambi yeni, co yeni mukapwa banu bange. 13 Yange Yehova Njambi yeni uje wamitundisile mu lifuti lya Ijipiti mangana keti mupwe lalo bindungo babo, co njapokwele joko ije yakele ha bisingo byeni na kumilingisa mwende oku munandula mitwe.

14 “‘Oloni nga kumunjitolilila nambe kwononoka awa mashiko oshe, 15 co lalo nga mubyana mashiko ange na kuzinda kusompa kwange na kujeneka kwononoka mashiko ange oshe na kupokola cikumiiyo cange, 16 co njikalinga byuma binatako kuli yeni: Njikamyana kashitiko ha kuminenela bukalu na mushongo wa nulo na lisika-sika, bije bikatsitsibalesa mesho eni na kumizeyesa. Mukalisina ngoco kukuna bimbuto mwafwa bitozi beni bakebo bakabilya. 17 Njikamitala na butenu, co bitozi beni bakamihyana, co baje bamizinda bakamiyandesa, co mukatewa kwa kujeneka munu ali na kumisheka.

18 “‘Nga byoshe ebi kubikamilingisa munjitolilile, co njikamyana kashitiko lwa kupwa 7 kutubakana hakulibanga mwafwa ya bubi bweni. 19 Njikamilingisa mwecele kutindibala na kulyalesa, co njikalingisa lilu lyeni lipwe ngwe cikubo* na lifuti-libu lyeni lipwe ngwe kopa.* 20 Mukalisina ngoco kupanga na nzili mwafwa byahi bimukateja mu lifuti lyeni, co miti ya mu lifuti lyeni kuikemi bushuka.

21 “‘Nga mutwalelelaho kunjitengulukila na kubyana kunjitolilila, co njikamyana kashitiko lwa kupwa 7 kutubakana hakulibanga mwafwa ya bubi bweni. 22 Njikatuma bikashama mukati keni, co bakulya bana beni na kunyongesa bimuna beni, co banu Baisalele bakatepuluka, co mu bingila byeni bahi bakendamo.

23 “‘Oloni nga munima yebi byuma anga kumukataba kumyolola, co mutwalelelaho kunjitengulukila, 24 co nange njikamitengulukila na kumyana kashitiko lwa kupwa 7 mwafwa ya bubi bweni. 25 Njikalingisa bitozi beni bamilwise mwafwa munapokola cikumiiyo. Nga mulikungulwila mu binganda byeni, njikatuma mushongo mukati keni, co njikamyana mu maboko a bitozi beni. 26 Njikamilingisa mujeneke kukala na makende,* co banakazi 10 bakoca makende mu liko limolika lya kwocela makende, co bakamipeselesela makende na kumimungwilako kakandondo. Mukalya, oloni kumukakuta.

27 “‘Oloni nga nameme munima yebi anga kumunjitolilila, co mutwalelelaho kunjitengulukila, 28 co njikamilwisa manene na kumyana kashitiko lwa kupwa 7 mwafwa ya bubi bweni. 29 Ngeci mukalya situ ya bana beni ba banalume na situ ya bana beni ba banakazi. 30 Njikanyongesa myela yeni ya kulunduka ya kulemesela na kutika bikwatelo byeni bya isense, co njikalundika bibimbi byeni hakamwa ya tumponya beni ba bunyengwe* ba kujeneka kuyoya, co njikamikengesa nima mwafwa mukanjizibisa bunyengwe. 31 Njikalingisa binganda byeni babinyongese na mukwale, na kulingisa myela yeni ya kujela isale mupulungwa, co kunjikanikilila milambu yeni ya lwengo lwalubwa. 32 Njikalingisa lifuti lyeni lipwe ngundu, co bitozi beni baje bakalamo bakakomoka mubakalimona. 33 Njikamishandwela mukati ka baka-mafuti, co njikashomona mukwale mu cindalo cawo na kumikilimisa. Lifuti lyeni likapwa ngundu, co binganda byeni bikabihya.

34 “‘Ha simbu oyo, lifuti likafweta bisabata byalyo bya kunima ha matangwa alikapwa ngundu, ha simbu imukakala mu lifuti lya bitozi beni. Ha simbu oyo, lifuti likahwima* mwafwa linapande kufweta bisabata byalyo bya kunima. 35 Lifuti likahwima ha matangwa oshe alikapwa ngundu mwafwa kulyakele na kuhwima ha bisabata byeni mumwakelemo.

36 “‘Co baje bakoboka, njikashulisa bimbunge byabo na lyoba mu lifuti lya bitozi babo, co bakalinga bene nambe kuziba liputa lili na kupekumuka na mpunzi bakatewa, co bakalyunukwa ngwe munu uje ali na kutewa nzita. Bakawa kwa kujeneka munu ali na kubakilimisa. 37 Bakatanuka hali umo na mukwabo ngwe baje bali na kutewa nzita, nameme wahi ali na kubakilimisa. Kumukasa kulwisa bitozi beni. 38 Bwingi bweni mukatsila mukati ka baka-mafuti, mukatsila mu lifuti lya bitozi beni. 39 Bamo beni baje bakasalako bakayandela mu mafuti a bitozi beni mwafwa ya milonga yeni. Bakayanda mwafwa ya milonga ya baishabo. 40 Bakendeka milonga yabo na kujeneka kulongwa kwa baishabo na kulitabela ngwabo kubapwile ba kulongwa omwo banjitengulukilile, 41 co nange njabatengulukilile munjabatwalele mu lifuti lya bitozi babo.

“‘Hamo bimbunge byabo bya kujeneka kuya ku mukanda* bikalikehesa, co bakafweta milonga yabo. 42 Njikanuka cikumiiyo cinjalikumiiye na Jakobu na cikumiiyo cinjalikumiiye na Isaki, co lalo njikanuka cikumiiyo cinjalikumiiye na Abrahamu na kwanuka lifuti linjamikulahesele. 43 Ha simbu ibatundile mu lifuti, lifuti lyahwimine na kufweta bisabata byalyo, co lyapwile ngundu. Bakele na kufweta milonga yabo mwafwa babyanene kusompa kwange na kuzinda mashiko ange. 44 Nameme ngoco, ha simbu ibakala mu lifuti lya bitozi babo kunjikababyanenena nambe kubombila kuti kweta na ha kubanyongesa, mwafwa nga njilinga ngoco, co njipokola cikumiiyo cinjalikumiiye nabo, mwafwa yange Yehova Njambi yabo. 45 Kulingila bakebo, njikanuka cikumiiyo cinjalikumiiye na bakukulwila babo baje banjatundisile mu lifuti lya Ijipiti oku baka-mafuti bali na kumona mangana njibamwese ngwange nji Njambi yabo. Yange Yehova.’”

46 Ebi bikebyo byashaka Njambi na kusompa kwendi na mashiko anene Yehova kuli Baisalele ha Munkinda wa Sinai kwitila muli Mosesa.