Levitike
6 Yehova watwaleleleleho kuleka Mosesa ngwendi: 2 “Nga munu alinga bubi ha kujeneka kupwa wa kulongwa kuli Yehova omwo akwisa mukwabo kutalesa ku byuma bibanamusezela ngwabo anyunge, nambe byuma bibanatulikisa kuli ikeye, nambe ebila mukwabo, nambe anyanyamena mukwabo, 3 nambe nga alula cuma cije cinazimbala, co akwisa, nambe nga alisinga ngwendi kalingile bubi bwoshe-bwoshe bwa cifwa eci okuni nabulingi, co ebi bikebyo byanapande kulinga: 4 Nga nalingi bubi na kukala na mulonga, co napande kwilwisa byuma byanebile na byuma byanalyapwile bakwabo na byuma byanambatele mu linyanyamena na byuma bibanamusezelele ngwabo anyunge nambe byuma bya kuzimbala bije byanalula, 5 nambe byuma byoshe-byoshe byanalisingile bya makuli, co napande kubifweta mu kushula, co lalo napande kubwezelelaho mutamba wamucitanu wa ndando yabyo. Napande kubyana babenyabyo ha litangwa libamuwana na mulonga. 6 Co akanena bwana bwendi bwa mulonga kuli kapilistu bwa kwana kuli Yehova. Napande kunena manga wa nkomba wamubwa kwesekesa na ndando ibanaka, mangana apwe bwana bwa mulonga. 7 Kapilistu akana ou mulambu kuli Yehova mangana ou munu bamukonekele, co bakamukonekela byuma byoshe-byoshe byanalingile bije binamulingisile akale na mulonga.”
8 Yehova watwaleleleleho kuleka Mosesa ngwendi: 9 “Shika Aloni na bana bendi ba banalume ngwobe, ‘Eli likelyo lishiko lya bwana bwa kwenyeka libanapande kukabangeya: Bwana bwa kwenyeka bukasala helu lya mutula haje habakabwekela tuhya. Bukakalaho butsiki bwoshe kweta na mutondo, co tuhya bakatwalelelaho kutushambeya ha mutula. 10 Kapilistu akazala cizalo cendi ca bupilistu ca lineni na kuzala tuputula twa lineni mangana afwike mubila wendi. Co akatundisa lito* lya bwana bwa kwenyeka buje bubanenyekela ha mutula, co akalyaka kumukulo wa mutula. 11 Co akashulula bizalo byendi na kuzala bizalo byeka na kukajukwila lije lito ku mwela wa kujela kusambwa lya cilombo. 12 Tuhya tunapande kutwalelelaho kushukuma ha mutula. Kutwapandele kuzima. Kapilistu napande kwakaho bikuni mutondo na mutondo na kwakaho mwamubwa bipuka bya bwana bwa kwenyeka, co napande kwenyeka mazi a mulambu wa kulila hamo mangana akakumune bwisi. 13 Tuhya tunapande kutwalelelaho kushukuma ha mutula. Kutwapandele kuzima.
14 “‘Eli likelyo lishiko lya bwana bwa binona: Bana ba Aloni ba banalume bakabunena ku mutula halutwe lwa Yehova. 15 Umo wabo akambata liboko lya kushula lya fulawa yaibwa ya bwana bwa binona na mazi amo na isense ya kutoka yoshe ije ili ha bwana bwa binona, co akabyenyeka mangana bikakumune bwisi ha mutula kupwa lwengo lwalubwa mangana bimaneneko bwana bwa mutunu bubana kuli Yehova. 16 Aloni na bana bendi ba banalume bakalya binasalako. Bakalila awa makende a kujeneka musima mu mwela wa kujela. Bakawalila mu lilapa lya tenti ya kuliwanena. 17 Kubapandele kupanga likende lya musima. Njinabanawo kupwa mutamba wabo ku bwana bwange bwa kwenyeka mu tuhya. Eci cinapu cuma ca kujela manene ngwe bwana bwa kufwika bubi na bwana bwa mulonga. 18 Bana ba Aloni ba banalume boshe bakalya obu bwana. Ou ukapwa mutamba wabo myaka na myaka mu bisemwa byeni byoshe uje ukatunda ku bwana bwa Yehova bwa kwenyeka. Byoshe bije bimbola obu bwana bipwa bya kujela.’”
19 Yehova wendekele lalo kuli Mosesa ngwendi: 20 “Obu bukebwo bwana bwakana Aloni na bana bendi ba banalume kuli yange Yehova ha litangwa libakamubwabesa: bakane mutamba umo wa ha mitamba 10 ya efa* ya fulawa yaibwa kupwa bwana bwa binona. Bakane hafu yobwo bwana mutondo, co hafu ikwabo bakayane mangwezi. 21 Bakabushinge na mazi na kubwoca ha cikango. Ukaija nabwo oku banabwaka mwamubwa mazi. Ukabumungula mu bimbazubwila na kubwana kupwa cuma cibanoco ha bwana bwa binona ca lwengo lwalubwa kuli Yehova. 22 Kapilistu wa kubwabesa uje akamwinga uje napu umo wa bana bendi nendi akabwana. Eli linapu lishiko lya myaka na myaka: Bwana bwoshe bakabwana mangana bukakumune bwisi kuli Yehova. 23 Bwana bwa binona bwa kapilistu bakabwenyeke bwoshe. Kubapandele kubulya.”
24 Yehova walekele lalo Mosesa ngwendi: 25 “Leka Aloni na bana bendi ba banalume ngwobe, ‘Eli likelyo lishiko lya bwana bwa kufwika bubi: Mu mwela mubatsiila cimuna wa bwana bwa kwenyeka mukemwo lalo mubanapande kutsiila cimuna wa bwana bwa kufwika bubi halutwe lwa Yehova. Eci cinapu cuma ca kujela manene. 26 Kapilistu uje akana obu bwana bwa kufwika bubi akabulya. Akabulila mu mwela wa kujela mu lilapa lya tenti ya kuliwanena.
27 “‘Byoshe bije bikambola ku situ ya uje cimuna wa bwana bikapwa bya kujela. Nga munu ashamwina maninga amo obu bwana ha cizalo cendi, co cije cizalo cibanashamwina maninga banapande kucikushila mu mwela wa kujela. 28 Ndeho ya buma ije ibanatelekela ei situ banapande kuitsiya, oloni nga banaitelekela mu ndeho ya kopa, co ije ndeho banapande kuiceka na kuikusha mu mema.
29 “‘Banalume boshe baje banapu tupilistu bakalya obu bwana. Bunapu cuma ca kujela manene. 30 Oloni kubapandele kulya bwana bwa kufwika bubi nga maninga abwo amo banawatwala mu tenti ya kuliwanena mangana bakawapangese mu kukonekela bubi mu mwela wa kujela. Banapande kubwenyeka mu tuhya.