Levitike
7 “‘Eli likelyo lishiko lya bwana bwa mulonga: Obu bwana bunapu cuma ca kujela manene. 2 Bakatsiila cimuna wa bwana bwa mulonga mu mwela mubakatsiila bimuna ba bwana bwa kwenyeka, co maninga a uje cimuna banapande kuwashamwina ku mitambela yoshe ya mutula. 3 Kapilistu akanena mazi oshe a uje cimuna, kwambateselela na mukila uli na mazi, na mazi aje anafwiki mila, 4 na binso bibali bili kuyehi na mitanda na mazi abyo. Napande lalo kutundisa mazi aje ali ha lishuli hamolika na binso. 5 Kapilistu akabyenyeka mangana bikakumune bwisi ha mutula kupwa bwana bubenyekela Yehova mu tuhya. Obu bunapu bwana bwa mulonga. 6 Banalume boshe baje banapu tupilistu bakalya obu bwana, co bakabulila mu mwela wa kujela. Bunapu cuma ca kujela manene. 7 Lishiko lipanga ku bwana bwa kufwika bubi, likelyo lipanga lalo na ku bwana bwa mulonga. Situ ya cimuna ibana ipwa ya kapilistu uje amupangesa kupwa mulambu wa kukonekela bubi.
8 “‘Nga kapilistu aanena munu bwana bwa kwenyeka, co cilambu ca cimuna wa bwana bwa kwenyeka uje ibananene kapilistu ngwabo ane cipwa ca kapilistu.
9 “‘Bwana bwoshe bwa binona bubocela mu liko lya kwocela makende nambe mu ndeho nambe ha cikango, bupwa bwa kapilistu uje abwana. Bupwa bwendi. 10 Oloni bwana bwoshe bwa binona buje bubanapandakana na mazi nambe buje kubapandakanene na mazi bukapwa bwa bana ba Aloni boshe ba banalume. Umo na umo wabo akatambula seteko ya kupwa hamo.
11 “‘Eli likelyo lishiko lya mulambu wa kulila hamo wanasa kwana munu kuli Yehova: 12 Nga ou mulambu unapu wa kumwesa kukandelela, napande kwana ou mulambu wa kukandelela hamolika na makende a kujeneka musima a muzenguluke aje ali na bwina a kutika na mazi, na makende a kujeneka musima a kulipasha a kukwita mazi, na makende a muzengukuke aje ali na bwina, a fulawa yaibwa a kushingasana mwamubwa na mazi. 13 Akana bwana bwendi hamolika na makende a muzenguluke a bwina hakati aje ali na musima, na mulambu wa kumwesa kukandelela wa milambu yendi ya kulila hamo. 14 Ku cuma cimo na cimo cebi byuma, akambateko cimo na kucana kuli Yehova kupwa mutamba wa kujela. Ou ukapwa mutamba wa kapilistu uje ashamwina ha mutula maninga a milambu ya kulila hamo. 15 Situ ya milambu ya kulila hamo ije yanana kupwa mulambu wa kukandelela, napande kuilya ha litangwa lyayana. Kapandele kuitulika kweta na mutondo.
16 “‘Nga mulambu wendi unapu bwana bwa kulisinga nambe bwana bwa kulishakela, co napande kuulya ha litangwa lyaana mulambu wendi, co bije bisalako asa kubilya lyamukwabo. 17 Oloni situ yoshe isalaho kweta na litangwa lyamucitatu napande kuyenyeka. 18 Oloni nga situ ya mulambu wendi wa kulila hamo bailya ha litangwa lyamucitatu, co uje nayana kubakamutambula. Ije situ bakaibyana. Cinapu cuma ca bunyengwe, co uje alya ku situ aliwana na bukalu butunda mu mulonga wendi. 19 Situ yoshe imbola ku cuma ca kujwala kumwapandele kuilya. Munapande kuyenyeka. Munu woshe wa kujela asa kulya situ ya kujela.
20 “‘Oloni munu woshe wa kujwala uje alya situ ya mulambu wa Yehova wa kulila hamo, munapande kumutsiya. 21 Nga munu akwata cuma coshe-coshe ca kujwala, ipwe cuma cije casa kulingisa munu apwe wa kujwala nambe kasitu wa kujwala nambe cuma coshe-coshe ca kujwala ca bunyengwe, co kutundaho alya ku situ ya mulambu wa kulila hamo uje unapu wa Yehova, ou munu munapande kumutsiya.’”
22 Yehova watwaleleleleho kuleka Mosesa ngwendi: 23 “Leka Baisalele ngwobe, ‘Kumwapandele kulya mazi oshe-oshe a muna ngombe wa nkomba nambe a muna manga wa nkomba nambe a membe. 24 Mazi a cimuna imuwana natsi nambe mazi a cimuna ibanatsii kuli mukwabo cimuna munasa kuwapangesa mu ngila yoshe-yoshe, oloni kumwapandele kuwalya. 25 Woshe alya mazi a cimuna yanana kupwa bwana bwa kwenyeka mu tuhya bubana kuli Yehova munapande kumutsiya.
26 “‘Kumwapandele kulya maninga oshe-oshe mu myela yoshe mumukala, ipwe a tuzila nambe a bimuna. 27 Woshe alya maninga oshe-oshe banapande kumutsiya.’”
28 Yehova watwaleleleleho kuleka Mosesa ngwendi: 29 “Leka Baisalele ngwobe, ‘Woshe ana mulambu wendi wa kulila hamo kuli yange Yehova, akambate mutamba umo wa bwana kutunda ha mulambu wendi wa kulila hamo na kuwana yange Yehova. 30 Akanene mazi hamolika na ñundo* oku nabikwatelela mu maboko endi mangana bipwe bwana bwa kwenyeka mu tuhya bubana kuli Yehova, co akabihwingise noku noku kupwa bwana bwa kuhwingisa kulutwe lwa Yehova. 31 Kapilistu akenyeka mazi mangana akakumune bwisi ha mutula, oloni ñundo ikapwa ya Aloni na bana bendi ba banalume.
32 “‘Mukana litako lya cimuna lya cilyo kuli kapilistu kutunda ha milambu yeni ya kulila hamo kupwa mutamba wa kujela. 33 Muna Aloni wa munalume uje ana maninga a milambu ya kulila hamo na mazi ikeye akambata litako lya cimuna lya cilyo. 34 Mwafwa njambata ñundo ya bwana bwa kuhwingisa na litako lya mutamba wa kujela kutunda ha milambu ya kulila hamo ya Baisalele na kubyana kuli kapilistu Aloni na bana bendi ba banalume. Eli linapu lishiko libakanyunga baIsalele myaka na myaka.
35 “‘Ou ukewo mutamba ubakele na kwana tupilistu wa kutunda ku bwana bwa Yehova bwa kwenyeka mu tuhya. Wapwile wa Aloni na bana bendi ba banalume ha litangwa libabangwile kupwa tupilistu ba Yehova. 36 Yehova washikile Baisalele ngwendi babane-ane ou mutamba kushwa bene ha litangwa lyababwabesele. Eli linapu lishiko lya myaka na myaka mu bisemwa byabo.’”
37 Eli likelyo lishiko lya kutalesa ku bwana bwa kwenyeka, na bwana bwa binona, na bwana bwa kufwika bubi, na bwana bwa mulonga, na mulambu wa kwangwisa, na mulambu wa kulila hamo, 38 ngecilika Yehova mwashikilile Mosesa ha Munkinda wa Sinai ha litangwa lyashikile Baisalele ngwendi bane bwana bwabo kuli Yehova mu mambo ya Sinai.