Levitike
9 Ha litangwa lya bu 8, Mosesa wasanene Aloni na bana bendi ba banalume na bakulunu ba Isalele. 2 Walekele Aloni ngwendi: “Ambata muna ngombe wamubwa wa bwana bwa kufwika bubi bwobe na manga wa nkomba wamubwa wa bwana bwa kwenyeka, co ubanene kulutwe lwa Yehova. 3 Oloni leka Baisalele ngwobe, ‘Ambateni membe wa cizamba wamubwa wa mwaka umo wa bwana bwa kufwika bubi, na muna ngombe wamubwa wa mwaka umo wa bwana bwa kwenyeka, na muna manga wa nkomba wamubwa wa mwaka umo wa bwana bwa kwenyeka, 4 na ngombe wa nkomba, na manga wa nkomba baje banapu ba mulambu wa kulila hamo, co balambuleni kuli Yehova hamolika na bwana bwa binona bwa kupandakana na mazi, mwafwa Yehova asholoka kuli yeni lelo.’”
5 Ngeci bambatele byuma byabalekele Mosesa na kubitwala ku tenti ya kuliwanena, co mbunga yoshe yalikungulwile na kwimana halutwe lwa Yehova. 6 Co Mosesa wendekele ngwendi: “Ebi bikebyo byanamishiki Yehova ngwendi mulinge mangana bumpau bwa Yehova bwase kusholoka kuli yeni.” 7 Co Mosesa walekele Aloni ngwendi: “Ya ku mutula ukane bwana bwa kufwika bubi bwobe, na bwana bwobe bwa kwenyeka mangana bakukonekele na kukonekela bakunjibo yobe, co ukane bwana bwa mbunga mangana babakonekele, ngecilika mwanashiki Yehova.”
8 Co haje bene Aloni waile ku mutula na kukatsiya muna ngombe wa bwana bwa kufwika bubi bwendi. 9 Co bana ba Aloni ba banalume batwalele maninga kuli ikeye, co wambwitikilemo munye wendi na kuwakwita ku mambinga a mutula, co maninga asaleleho wawetilile kwisi ya mutula. 10 Wambatele mazi na binso na mazi aje afwikile ha lishuli a kutunda ku bwana bwa kufwika bubi, co wabyenyekele mangana bikakumune bwisi ha mutula ngecilika Yehova mwashikilile Mosesa. 11 Co wenyekele situ na cilambu mu tuhya kusambwa lya cilombo.
12 Watsiile cimuna wa bwana bwa kwenyeka, co bana ba Aloni ba banalume bamwanene maninga, co wawashamwinine ku mitambela yoshe ya mutula. 13 Bamwanene bipuka bya uje cimuna wa bwana bwa kwenyeka hamo lika na mutwe, co wabyenyekele mangana bikakumune bwisi ha mutula. 14 Kutundaho, wakushile mila, hamolika na mendi, co wabyenyekelele helu lya bwana bwa kwenyeka buje bwakele ha mutula mangana bikakumune bwisi.
15 Co wanene bwana bwa mbunga. Wambatele membe wa mbunga wa bwana bwa kufwika bubi, co wamutsiile kupwa bwana bwa kufwika bubi ngwe mwalingile wakulibanga. 16 Co wanenele bwana bwa kwenyeka na kubwana ngwe mubakele na kubwanena simbu yoshe.
17 Kutundaho wanene bwana bwa binona, co wajomweneho liboko lya kushula lyobu bwana na kubwenyeka mangana bukakumune bwisi ha mutula kubwezelela ku bwana bwa kwenyeka bwa mutondo.
18 Mwamanesele, watsiile ngombe wa nkomba na manga wa nkomba wa mulambu wa kulila hamo wa banu, co bana ba Aloni ba banalume bamunenelele maninga, co wawashamwinine ku mitambela yoshe ya mutula. 19 Co bamunenelele masheleshele a mazi a uje ngombe, na mukila wa manga wa nkomba uje uli na mazi, na mazi aje anafwiki bilyo bya mukati, na binso, na mazi aje anafwiki lishuli, 20 co bakele aje masheleshele oshe ha ñundo ya uje ngombe na ha ñundo ya manga, co munima wenyekele aje masheleshele mangana akakumune bwisi ha mutula. 21 Aloni wahwingisile bije biñundo, na aje mendi a cilyo halutwe lwa Yehova kupwa bwana bwa kuhwingisa ngecilika mwashikilile Mosesa.
22 Co Aloni wolwelele maboko endi ku banu na kubabezikisa, co washulukile kutunda ku mutula munima ya kwana bwana bwa kufwika bubi, na bwana bwa kwenyeka, na milambu ya kulila hamo. 23 Mamaneselelo Mosesa na Aloni bakobelele mu tenti ya kuliwanena, co batuhukilemo na kubezikisa banu.
Co bumpau bwa Yehova bwasholokele ku banu boshe, 24 Co tuhya twatundile kuli Yehova na kushangumuka kwenyeka bwana bwa kwenyeka na masheleshele a mazi ha mutula. Banu boshe mubamwene ebi, bashangumukile kutambeka, co batsikamene na kukulamena hasi.