Levitike
10 Mu kwita kwa simbu, bana ba Aloni ba banalume, Nadabu na Abihu, umo na umo wabo wambatele cilahwilo ca tuhya na kwakamo tuhya na kutumbikaho isense. Co bashangumukile kwenyekela Yehova isense na tuhya tuje kubatabesele, cuma cije kabashikile ngwendi balinge. 2 Co tuhya twatundile kuli Yehova twabenyekele, ngeci batsililile kulutwe lwa Yehova. 3 Co Mosesa walekele Aloni ngwendi: “Yehova nendeka ngwendi, ‘Banu baje bali hayehi nange banapande kwanuka ngwabo njapwa nji wa kujela, co bakanjishangazala kulutwe lwa banu boshe.’” Aloni wolokele lika kulu.
4 Co Mosesa wasanene Mishaele na Elizafani, bana ba Uziele ishe ya Aloni wa mwanike, co wabalekele ngwendi: “Ijeni kuno mwakutundise babushoko bweni kulutwe lwa mwela wa kujela mubatwale kusambwa lya cilombo.” 5 Ngeci bezile na kwambata baje bibimbi bacikele mu mikanjo, co babatwalele kusambwa lya cilombo ngecilika mwabalekele Mosesa.
6 Co Mosesa walekele Aloni na bana bendi bakwabo ba banalume, Eliaza na Ithama, ngwendi: “Keti mwecelele biñambu byeni bikole manene na kumoneka bushaki nambe kutabula bizalo byeni mangana keti mutse, co lalo mangana Njambi keti alubalele mbunga yoshe. Bandolome beni boshe baje banapu bakunjibo ya Isalele balila baje baanatsii Yehova na tuhya. 7 Kumwapandele kutuhuka mu tenti ya kuliwanena, keti ngoconi mutsa mwafwa banamibwabesa na mazi a Yehova. Ngeci balingile byabalekele Mosesa.
8 Co Yehova walekele Aloni ngwendi: 9 “Mumwija mu tenti ya kuliwanena, kumwapandele kunwa binyu nambe bwala bwoshe-bwoshe, yobe na bana bobe mangana keti mutse. Eli linapu lishiko lya myaka na myaka mu bisemwa byeni. 10 Nga mulinga ngoco, co mwasa kumona kuliseza kuli mukati ka byuma bibanana kuli Njambi na byuma bya kujwala, na kumona kuliseza kuli mukati ka byuma bya mazilo na byuma bya kujela, 11 na kulongesa Baisalele mashiko oshe anabashiki Yehova kwitila muli Mosesa.
12 Co Mosesa walekele Aloni na Eliaza na Ithama, bana ba Aloni baje basaleleko ngwendi: “Ambateni binasalako ku bwana bwa binona bije binatundu ku bwana bwa Yehova bwa kwenyeka, co mubilile kuyehi na mutula kupwa likende lya kujeneka musima mwafwa binapu bya kujela manene. 13 Munapande kubilila mu mwela wa kujela mwafwa ou unapu mutamba wobe na mutamba wa bana bobe wa kutunda ku bwana bwa Yehova bwa kwenyeka mu tuhya mwafwa ebi bikebyo bibananjishiki. 14 Munapande lalo kulya ñundo ya bwana bwa kuhwingisa na litako lya cimuna lya mutamba wa kujela. Munapande kubilila mu mwela wa kujela, yobe na bana bobe ba banalume na bana bobe ba banakazi, mwafwa ebi byuma banakwanabyo kupwa mutamba wobe na mutamba wa bana bobe ba banalume kutunda ku milambu ya kulila hamo ya Baisalele. 15 Bakanena litako lya cimuna lya bwana bwa kujela, na ñundo ya bwana bwa kuhwingisa, hamolika na bwana bwa mazi bwa kwenyeka mu tuhya mangana buje bwana bwa kuhwingisa babuhwingise noku-noku halutwe lwa Yehova, co ou ukapwa mutamba wobe na bana bobe ba banalume myaka na myaka ngecilika mwanashiki Yehova.”
16 Co Mosesa washangumukile kushakezeka membe wa bwana bwa kufwika bubi, co wawanene ngwabo banamwenyeka. Ngeci walubalelele Eliaza na Ithama, bana ba Aloni ba banalume baje basaleleko, co wendekele ngwendi: 17 “Bika kumwalililile bwana bwa kufwika bubi mu mwela wa kujela okuni bunapu cuma ca kujela manene? Banamyanabwo mangana mwambate bubi bwa mbunga ya banu mangana babakonekele kulutwe lwa Yehova. 18 Naumo wahi nanene maninga ou cimuna mu mwela wa kujela. Munapandele kumulila mu mwela wa kujela ngecilika mubanjishikile.” 19 Aloni wakumbulwile Mosesa ngwendi: “Tala, lelo banana bwana bwabo bwa kufwika bubi na bwana bwabo bwa kwenyeka kulutwe lwa Yehova, oloni olu lubinda lunanjizila, co lelo ngwe njinali bwana bwa kufwika bubi, kuma ngwe Yehova nazibi kubwaha ndi?” 20 Mosesa mwazibile ngoco, wazibisisile.