Levitike

3 “‘Nga munu ana mulambu wa kulila hamo,* co lalo ou mulambu unapu wa ngombe, ipwe wa nkomba nambe wa lwabo, co napande kwana cimuna wamubwa kuli Yehova. 2 Akakambeka liboko lyendi ha mutwe wa uje cimuna, co uje cimuna banapande kumutsiila ku cikolo ca tenti ya kuliwanena, co bana ba Aloni ba banalume baje banapu tupilistu bakashamwina maninga ku mitambela yoshe ya mutula. 3 Napande kwana mutamba wa uje mulambu wa kulila hamo kupwa bwana bwa kwenyeka mu tuhya bubana kuli Yehova. Napande kwana mazi aje akafwiki ha mila na mazi oshe aje akazengeleka mila, 4 na binso bibali bili kuyehi na mitanda na mazi abyo. Napande lalo kutundisa mazi aje ali ha lishuli hamolika na binso. 5 Bana ba Aloni ba banalume bakabyenyeka mangana bikakumune bwisi ha mutula, helu lya bwana bwa kwenyeka buje buli ha bikuni bije bili na kushukuma. Obu bunapu bwana bwa kwenyeka mu tuhya bubana kuli Yehova bwa lwengo lwalubwa.

6 “‘Nga ana Yehova manga nambe membe kupwa mulambu wa kulila hamo, co napande kwana cimuna wamubwa wa nkomba nambe wa lwabo. 7 Nga ana manga wa nkomba kupwa bwana, co napande kumwanena halutwe lwa Yehova. 8 Akakambeka liboko lyendi ha mutwe wa uje cimuna, co uje cimuna bakamutsiila kulutwe lwa tenti ya kuliwanena, co bana ba Aloni ba banalume bakashamwina maninga endi ku mitambela yoshe ya mutula. 9 Akana mazi atunda ku mulambu wa kulila hamo mangana apwe bwana bwa kwenyeka mu tuhya bubana kuli Yehova. Akatundisa mazi oshe a ha mukila aje ali kuyehi na citsiya ca mwongo, na mazi aje akafwiki ha mila na mazi oshe aje anazengeleka mila, 10 na binso bibali bili kuyehi na mitanda na mazi abyo. Napande lalo kutundisa mazi aje ali ha lishuli hamolika na binso. 11 Co kapilistu akabyenyeka mangana bikakumune bwisi ha mutula na kupwa byakulya.* Binapu bwana bwa kwenyeka mu tuhya bubana kuli Yehova.

12 “‘Nga bwana bwendi bunapu membe, co napande kumunena kulutwe lwa Yehova. 13 Akakambeka liboko lyendi ha mutwe wa uje cimuna, co uje cimuna bakamutsiila kulutwe lwa tenti ya kuliwanena, co bana ba Aloni ba banalume bakashamwina maninga endi ku mitambela yoshe ya mutula. 14 Mutamba wakana kupwa bwana bwendi bwa kwenyeka mu tuhya bubana kuli Yehova unapu mazi aje akafwiki ha mila, na mazi oshe aje anazengeleka mila, 15 na binso bibali bili kuyehi na mitanda na mazi abyo. Napande lalo kutundisa mazi aje ali ha lishuli hamolika na binso. 16 Kapilistu akabyenyeka mangana bikakumune bwisi ha mutula kupwa ngwe byakulya.* Binapu bwana bwa kwenyeka mu tuhya bwa lwengo lwalubwa. Mazi oshe anapu a Yehova.

17 “‘Kumwapandele kulya mazi nambe maninga nambe kamandondo. Munapande kutwalelelaho kunyunga eli lishiko mu bisemwa byeni na kwoshe kumukakala.’”