Levitike
24 Yehova watwaleleleleho kuleka Mosesa ngwendi: 2 “Leka Baisalele ngwobe bakunenele mazi amabwa a olive a kwaka mu bindeya mangana ebi bindeya bishukume simbu yoshe. 3 Aloni akabwahesa ngwendi bindeya bishukume simbu yoshe ku mesho a Yehova, kutunda mangwezi kweta mutondo. Co ebi bindeya binapande kukala mu tenti ya kuliwanena halutwe lwa nanga ije ili kuyehi na Cikasha ca Bukaleho. Munapande kunyunga eli lishiko myaka na myaka mu bisemwa byeni byoshe. 4 Simbu yoshe munapande kunyunga bindeya bije bili halutwe lwa Yehova ha bitumbikilo bya bindeya bya goudi yaibwa.
5 “Ukambate fulawa yaibwa na kwoca makende a muzenguluke a bwina hakati a kupwa 12. Ha likende na likende hanapande kuya seteko ya mitamba ibali ya ha mitamba 10 ya efa.* 6 Unapande kwaka awa makende mu mitumbo ibali ha mesa ya goudi yaibwa halutwe lwa Yehova. Ha mutumbo na mutumbo hanapande kukala makende 6. 7 Unapande kwaka isense ya kutoka ya kujela ha mutumbo na mutumbo, co akapwa makende aje emanenako bwana bwa mutunu bubenyeka mu tuhya kuli Yehova. 8 Ha litangwa na litangwa lya Sabata, napande kwingisaho makende amaha halutwe lwa Yehova. Eci cinapu cikumiiyo ca myaka na myaka cinjinalikumiiya na Baisalele. 9 Aje makende akapwa a Aloni na bana bendi ba banalume, co bakawalila mu mwela wa kujela mwafwa anapu cuma ca kujela manene canabana Yehova ku bwana bwa kwenyeka mu tuhya. Eli linapu lishiko lya myaka na myaka.”
10 Mukati ka Baisalele mwakele mwana wa munalume uje yakitile munakazi wa Kaisalele na munalume wa ku Ijipiti, co uje mwana walwile na Kaisalele wa munalume mu cilombo. 11 Uje mwana yakitile munakazi wa Kaisalele washangumukile kwendeka mwamubi lizina lya Njambi* na kushaula Njambi, ngeci bamunenele kuli Mosesa. Ina ya uje mwana wapwile Shelomiti muna Dibri wa ku muyati wa Dani. 12 Uje mwana bamukwatele na kumunyunga kweta noho habazibukilile mwamubwa byuma byaangwile kulinga Yehova.
13 Co Yehova walekele Mosesa ngwendi: 14 “Twaleni uje nakala na kushaula lizina lyange kusambwa lya cilombo, co boshe baje banamuzibile banapande kwaka maboko abo ha mutwe wendi, co mbunga yoshe inapande kumwasha mamanya. 15 Co unapande kuleka Baisalele ngwobe, ‘Munu woshe uje ashaula Njambi yendi, akaliwana na bukalu butunda mu bubi bwendi. 16 Ngeci uje ashaula lizina lya Yehova banapande kumutsiya bene. Mbunga yoshe inapande kumwasha mamanya. Munu wa ku lifuti lyeka nendi banapande kumutsiya ngwe muje bene mubatsiila Kaisalele mwafwa nashaula lizina lya Njambi.
17 “‘Nga munu atsiya mukwabo munu nendi banapande kumutsiya bene. 18 Munu woshe uje atsiya cimuna napande kumufweta, mwonyo na mwonyo. 19 Nga munu abulumuna mukwabo munu, co byanalingi kuli mukwabo na ikeye banapande kumulingabyo. 20 Citsiya ku citsiya, lisho ku lisho, liyo ku liyo, co muje bene mwanabulumwina mukwabo nendi mukemwo mubanapande kumubulumwina. 21 Munu uje atsiya kasitu napande kumufweta, oloni munu uje atsiya mukwabo munu nendi banapande kumutsiya.
22 “‘Eli lishiko lipanga kuli yeni mubaboshe, ipwe kuli munu wa ku lifuti lyeka uje ali hakati keni nambe kuli Kaisalele, mwafwa yange Yehova Njambi yeni.’”
23 Mosesa wasimutwiiye na Baisalele, co batwalele uje munu washawile Njambi kusambwa lya cilombo, co bamwashele mamanya. Ngeci, Baisalele balingile muje bene mwashikilile Yehova Mosesa.