Mukanda Wakulibanga wa Samwele

27 Oloni Devidi walyendekesele ngwendi: “Litangwa limo, Saulu anjitsiya. Ngeci, cacibwa njitewele ku lifuti lya Bafilistiya, co Saulu ajuka kunjitonda mu lifuti lyoshe lya Isalele, co njoboka mu liboko lyendi.” 2 Devidi wakatukile na banalume 600 baje bakele nendi, co waile kuli Akishi muna Maoki, mwene wa Gathi. 3 Devidi na banalume bakele nabo bakakele na Akishi mu Gathi, umo na umo na bakunjibo yendi. Devidi wakele na banakazi bendi babali, Ahinoamu wa ku Jezilele na Abigeu wa ku Kameu, uje wapwile munakazi wa Nabale. 4 Saulu mwazibile ngwabo Devidi natewela ku Gathi, wecelele kumushakezeka.

5 Co Devidi walekele Akishi ngwendi: “Nga njinawana kutetela ku mesho obe, njilomba ngwange banjaneko mwela mu nganda yeka ya mu lifuti lyobe mangana njikalemo. Bika byakela ngamba yobe hamo nobe muno mu nganda yobe mwene?” 6 Ngeci, Akishi wamwanene nganda ya Zikilagi olyo litangwa. Mukemwo Zikilagi yapwa ya bimyene ba Juda kweta na lelo lino.

7 Devidi wakele mu lifuti lya Bafilistiya mwaka umo na bingonde biwana. 8 Devidi wakele na kuya na kulwisa Bagesha, Bagizi, na Baamaleki, mwafwa batungile mu lifuti lije lyatundile ku Telamu kuketa ku Shuri na kusikumuka ku lifuti lya Ijipiti. 9 Devidi mwakele na kulwisa lifuti, kakele na kwobola munalume nambe munakazi, oloni wakele na kwambata bimanga, bingombe, bidonki, tumele, na bizalo, kutundaho wakele na kwiluka kuli Akishi. 10 Co Akishi wakele na kumwihula ngwendi: “Unakalwila kuli lelo?” Devidi wakele na kumukumbulula ngwendi: “Njinakalwila ku mbwela ya Juda,” nambe ngwendi, “Njinakalwila ku mutambela wa ku mbwela* wa baka-Jelamele,” nambe “Njinakalwila ku mutambela wa ku mbwela wa Bakeni.” 11 Devidi kakele na kwecelela munalume nambe munakazi woshe-woshe ayoye na kumunena ku Gathi, mwafwa wakele na kwendeka ngwendi: “Batwambulula ngwabo, ‘Ebi bikebyo byanalingi Devidi.’” (Co omwo mukemwo mwakele na kulingila ha simbu yoshe yakele mu lifuti lya Bafilistiya.) 12 Ngeci, Akishi watabele byamulekele Devidi na kulyendekesa ngwendi: ‘Hano banu bendi Baisalele banamuzindi bene, co atwalelelaho kupwa ngamba yange.’