Mukanda Wakulibanga wa Samwele
28 Mu matangwa owo, Bafilistiya bakungulwile maswalale babo mangana balwise Isalele. Co Akishi walekele Devidi ngwendi: “Njikulahela uzibuka ngwobe nobe na banalume bauli nabo muya nange ku nzita.” 2 Devidi wakumbulwile Akishi ngwendi: “Uzibuka mwamubwa byalinga ngamba yobe.” Co Akishi walekele Devidi ngwendi: “Bikebyo binjikwangwila kupwa muka-kunjinyunga simbu yoshe.”
3 Samwele te natsi, co Baisalele boshe te banamulili na kumutsinda mu nganda yendi mu Lama. Co lalo Saulu te natundisa baka-kwendeka na bakulu na baka-kuumikiya mu lifuti.
4 Bafilistiya balikungulwile, co bakatungile cilombo mu Shunemu. Ngeci, Saulu wakungulwile maswalale boshe ba Isalele, co batungile cilombo mu Giuboa. 5 Saulu mwamwene cilombo ca Bafilistiya, wazibile lyoba, co walupukile manene mbunge. 6 Nameme Saulu wakele na kwihula Yehova, Yehova kakele na kumukumbulula, ipwe mu bilota nambe kupangesa Urimu nambe kwitila mu tupolofweto. 7 Mamaneselelo Saulu walekele bangamba bendi ngwendi: “Njitondeleni munakazi uje wapwa muka-kwendeka na bakulu, co njiyako njikamwihule.” Bangamba bendi bamukumbulwile ngwabo: “Tala! Kuli munakazi umo mu Eni-dori uje wapwa muka-kwendeka na bakulu.”
8 Ngeci, Saulu walikwisile kupwa munu weka, co wazalele bizalo byeka na kuya kuli owo munakazi butsiki na bangamba bendi babali ba banalume. Wendekele ngwendi: “Shukulu-kambu, taha wendeke na bakulu, na kunjinenela munu injikuleka.” 9 Oloni owo munakazi wendekele ngwendi: “Uzibuka byanalingile Saulu mwanatundisile baka-kwendeka na bakulu na baka-kuumikiya mu lifuti. Bika biutondela kunjaka* mu nganjo mangana banjitsiye?” 10 Ngeci, Saulu walisingile hali Yehova ngwendi: “Njilisinga hali Yehova wa kuyoya ngwange kuukala na mulonga mu ñanda ei!” 11 Ngeci, owo munakazi wamwihwile ngwendi: “Iya iushaka ngwobe njikunenele?” Wamukumbulwile ngwendi: “Njinenele Samwele.” 12 Uje munakazi mwamwene “Samwele,”* watetubukile na kuleka Saulu ngwendi: “Bika biunanjikwisila? Yobe Saulu!” 13 Mwene wamulekele ngwendi: “Keti uzibe lyoba. Uli na kumona bika?” Owo munakazi wakumbulwile Saulu ngwendi: “Njili na kumona munu wa kufwa ngwe njambi atunda mu libu.” 14 Oho bene wamwihwile ngwendi: “Ali na kusholoka bati?” Co wamukumbulwile ngwendi: “Kuli na kwija kakulukazi wa munalume, uje nazala cizalo ca helu ca kujeneka maboko.” Co Saulu wanangukile ngwendi “Samwele,” ngeci watsikamene na kukulamena hasi.
15 Co “Samwele” wehwile Saulu ngwendi: “Bika biunanjindwila na kunjitangula?” Saulu wakumbulwile ngwendi: “Njili mu bukalu bwakama. Bafilistiya bali na kunjilwisa, Njambi lalo nanjiseze, co kesi na kunjikumbulula, ipwe kwitila mu tupolofweto nambe mu bilota. Mukemwo njinakusana mangana unjileke binjinapande kulinga.”
16 Co “Samwele” wendekele ngwendi: “Bika biunjihwila muunamono ngwobe Yehova nakuseze, co napu citozi cobe? 17 Yehova alinga byanendekele kwitila muli yange: Yehova atundisa bumwene mu maboko obe na kubwana mukweni weka, Devidi. 18 Kuwononokele lijwi lya Yehova, co kuwamwesele butenu bwendi kuli Baamaleki, mukemwo Yehova ali na kulinga ebi byuma kuli yobe lelo. 19 Yehova ana lalo Baisalele hamolika nobe mu liboko lya Bafilistiya, co imene, nobe na bana bobe mukala hamo nange.* Yehova ana na maswalale ba Isalele mu maboko a Bafilistiya.”
20 Oho bene Saulu wawililile hasi kushwanga na kulijujukila manene mwafwa ya majwi a “Samwele.” Co kakele na nzili, mwafwa kalile byakulya mutanya woshe na butsiki bwoshe. 21 Uje munakazi mwezile kuli Saulu na kuwana ngwendi nalishoshomwena manene, wendekele ngwendi: “Yange ngamba yobe njinononoka majwi obe na kwaka mwonyo wange mu bushonde, co njinalingi biunanjilekele ngwobe njilinge. 22 Ngeci, shukulu-kambu tolilila byendeka ngamba yobe. Njitabese njikuneneleko likende mangana ulye, ukaleko na nzili ya kwenda.” 23 Oloni wabyanene na kwendeka ngwendi: “Kunjili.” Nameme ngoco, bangamba bendi na uje munakazi batwaleleleleho kumusindiya. Mamaneselelo wabatolililile, co wakatukile hasi hakele na kutumama ha mwela. 24 Uje munakazi wakele na muna ngombe wa kununa ha njibo. Ngeci, wamutsiile bwasi-bwasi, co wambatele fulawa na kuitika, kuipwisa mukasha na kwoca likende lya kujeneka musima. 25 Wabyanene Saulu na bangamba bendi, co balile. Kutundaho bakatukile na kuya, buje bene butsiki.