Mukanda Wakulibanga wa Samwele
12 Mamaneselelo Samwele walekele Baisalele boshe ngwendi: “Njinalingi byoshe bimunanjilombele, co njinamyangwila mwene amiyula. 2 Ou ikeye mwene amitwamenena!* Yange njinakulubala, na bwele bwange ku mutwe, co lalo bana bange bali neni. Njamitwamenena kushwa ku bukwenje bwange kweta na lelo lino. 3 Yange uno. Endekeni binjinabiisa, halutwe lwa Yehova na halutwe lwa uje yanabwabesa. Ngombe yeya nambe donki* yeya injinambata? Iya injinalyapula nambe kulyatelela? Kuli iya kunjinatambula lizika-kanwa* lije linanjilingisa njijeneke kwakula mwamubwa? Nga njinalingimo, njimilwisilabyo.” 4 Bamukumbulwile ngwabo: “Kuwatulyapwile nambe kutulyatelela nambe kutambula cuma coshe-coshe kuli umo wetu.” 5 Ngeci wabalekele ngwendi: “Yehova napu mukaleho wa kumipaya, co lalo wakubwabesa wendi napu mukaleho lelo mu kumwesa ngwabo kumwanjiwanene na mulonga.”* Co bamukumbulwile ngwabo: “Eyo, napu mukaleho.”
6 Co Samwele walekele banu ngwendi: “Yehova uje wapangesele Mosesa na Aloni na kutundisa bakukulwila beni mu lifuti lya Ijipiti napu mukaleho. 7 Imaneni mu myela yeni, co njimyakula halutwe lwa Yehova kwesekesa na byuma bya kusungama byanamilingila Yehova nebi byanalingila bakukulwila beni.
8 Jakobu mwetele lika mu Ijipiti, bakukulwila beni bashangumukile kulomba bukwasi kuli Yehova, co Yehova watumine Mosesa na Aloni batwamenene bakukulwila beni kubatundisa mu Ijipiti na kubalingisa bakutunge muno mu mwela. 9 Oloni bebalele Yehova Njambi yabo, co wabanene mu liboko lya Sisela, ntwama wa maswalale ba Hazole na mu liboko lya Bafilistiya na mu liboko lya mwene wa Mowabi, co babalwisile. 10 Co batambekele kuli Yehova kumulomba bukwasi ngwabo, ‘Tunalingi bubi, mwafwa tunaseze yobe Yehova na kushangumuka kupangela Bale na tumponya ba Ashitolethi. Twamene mu liboko lya bitozi betu mangana tukupangele.’ 11 Ngeci, Yehova watumine Jelubale na Bedani na Jefuta na Samwele, co wamyamenene mu liboko lya bitozi baje bamizengelekele. Ngeci, mwayoyele kwa kujeneka bushonde. 12 Mumwamwene ngweni Nahashi mwene wa Baamoni naija na kumilwisa, mwatwaleleleleho kunjileka ngweni, ‘Yetuni kubanga tukale bene na mwene!’ Nameme ngwabo Yehova Njambi yeni ikeye Mwene yeni. 13 Co hano mwene imunangula ou, mwene imwalombele. Taleni! Yehova namyangwila mwene. 14 Cibwaha nga muzibila Yehova lyoba na kumupangela na kwononoka majwi endi na kujeneka kupokola lishiko lya Yehova. Co lalo cibwaha nga yeni hamolika na mwene yeni uje amiyula mukabangeya Yehova Njambi yeni. 15 Oloni nga kumwononoka lijwi lya Yehova, nga mupokola lishiko lya Yehova, liboko lya Yehova limilwisa hamo na baishweni. 16 Ngeci, imaneni mu myela yeni mulimwene eci cuma cakama calinga Yehova oku munatalelela. 17 Kuma ino keti simbu ya kuteja tiliku ndi? Njitambeka kuli Yehova anene mihyato na nyonzi, co mumona na kuzibisisa ngweni munalingi cuma cacibi mu mesho a Yehova mumunalilombela mwene.”
18 Ngeci, Samwele watambekele kuli Yehova, co Yehova wanenele mihyato na nyonzi lije litangwa, co banu boshe bazibilile manene lyoba Yehova na Samwele. 19 Ngeci banu boshe balekele Samwele ngwabo: “Lombelelako bangamba bobe kuli Yehova Njambi yobe, mwafwa kutushaka kutsa, mwafwa tunabwezelela cuma cikwabo cacibi ku bubi bwetu bwoshe mutunalombo ngwetu tukale na mwene.”
20 Ngeci, Samwele walekele banu ngwendi: “Keti muzibe lyoba. Cuma cimunalingi cinapu bene cacibi. Cakamani, keti mulikele kukabangeya Yehova, co pangeleni Yehova na bimbunge byeni byoshe. 21 Keti mutenguluke na kukabangeya byuma byangoco, bije kubyasa kumikwasa, co kubyasa kumyamena, mwafwa byangoco. 22 Mwafwa ya lizina lyendi lyakama, Yehova kayengula banu bendi, mwafwa Yehova babenya ikeye namipwisa banu bendi. 23 Ngeci mwangeni, kunjasa kulinga bubi kuli Yehova ha kwecela kumilombelela, co njitwalelelaho kumilongesa mu ngila yaibwa, ya kusungama. 24 Zibileni lika Yehova lyoba na kumupangela mu kulongwa* na bimbunge byeni byoshe. Mwafwa acitaleni lika byuma byakama byanamilingila. 25 Oloni nga mutindibala na kulinga byuma byabibi, neni na mwene yeni mumona kailaila.”