Mukanda Wakulibanga wa Samwele
11 Co Nahashi wa Kaamoni wezile na kutunga cilombo mu Giliyadi mangana alwise Jabeshi. Banalume boshe ba mu Jabeshi balekele Nahashi ngwabo: “Linga netu cikumiiyo,* co tukupangela.” 2 Nahashi wa Kaamoni wabalekele ngwendi: “neni cikumiiyo nga mutaba ngweni mesho eni a cilyo bawatube. Njilinga ngoco mangana njishawise Isalele.” 3 Bakulunu ba mu Jabeshi bamukumbulwile ngwabo: “Twane matangwa 7 mangana tutume tutumwa mu lifuti lyoshe lya Isalele. Nga kutuwana wa kutwamena, co tulita kuli yobe.” 4 Tutumwa betele mu Gibea ya Saulu na kuleka banu awa majwi, co banu boshe balilile manene mu kutambeka.
5 Saulu wakele na kutunda ku mahya oku ali na kwenda munima ya butanga bwa bingombe, co wehwile ngwendi: “Bika binawana banu? Bika bibali na kulila?” Ngeci, bamulekele majwi a banalume ba ku Jabeshi. 6 Sipilitu ya Njambi yanene Saulu nzili mwazibile awa majwi, co walubalele manene. 7 Co wambatele bingombe ba nkomba babali na kubateta bipuka-bipuka na kubituma mu mutambela woshe wa Isalele kupangesa tutumwa baje bendekele ngwabo: “Ebi bikebyo bilingiwa ku bingombe ba munu woshe uje kakabangeya Saulu na Samwele.” Ngeci, banu boshe bazibilile Yehova lyoba, co bezile na butumbe bumo.* 8 Saulu wabatandele mu Bezeki, co kwakele banalume ba mu Isalele 300,000 na banalume ba mu Juda 30,000. 9 Balekele tutumwa baje bezile ngwabo: “Yeni mukaleke banalume ba mu Jabeshi mu Giliyadi ngweni, ‘Imene litangwa mulilonda njamba mwoboka.’” Ngeci baje tutumwa baile na kuleka banalume ba mu Jabeshi, co babwahelelele manene. 10 Co banalume ba mu Jabeshi balekele Nahashi ngwabo: “Imene tulita kuli yeni, co mwasa kutulinga mwoshe mumutondela.”
11 Litangwa lyateleko, Saulu watepele banu mu bibunga bitatu, co baile hakati ka cilombo ca Baamoni mutondo-tondo na kubatsiya kweta noho litangwa lyalondele njamba. Baje bobokele balishandokele, co kukwesi banu babali bakele hamo. 12 Co banu balekele Samwele ngwabo: “Beya baje banakala na kwendeka ngwabo, ‘Kuma Saulu asa kupwa mwene yetu?’ Banene kuno tubatsiye.” 13 Oloni Saulu wendekele ngwendi: “Naumo wahi ibanapande kutsiya lelo, mwafwa lelo Yehova namena Isalele.”
14 Kutundoho, Samwele walekele banu ngwendi: “Tuyeni ku Giugali tukazameke bumwene.” 15 Ngeci, banu boshe baile ku Giugali, co bakapwisile Saulu mwene halutwe lwa Yehova mu Giugali. Kutundaho, banene milambu ya kulila hamo halutwe lwa Yehova, co Saulu na banu boshe ba Isalele balingile cilika na kubwahelela manene.