Mukanda Wakulibanga wa Samwele
15 Samwele walekele Saulu ngwendi: “Yehova nanjitumine mangana njakukubwabese kupwa mwene wa banu bendi Baisalele. Ngeci, hano tolilila byanendeka Yehova. 2 Yehova wa maswalale nendeka ngwendi: ‘Njilingisa Baamaleki balitabele mwafwa ya byuma bibalingile kuli Baisalele omwo babalwisile mubakele na kutunda ku Ijipiti. 3 Ngeci, ya ukatsiye Baamaleki na kubanyongesa, hamolika na byuma bibali nabyo byoshe. Kuwapandele kubobola.* Unapande kubatsiya boshe, munalume na munakazi, mwanike na mbututu, ngombe na manga, kamele na donki.’” 4 Saulu wakungulwile banu, co wabatandele mu Telaimu: Kwakele maswalale ba kwenda ha mendi 200,000 na banalume ba mu Juda 10,000.
5 Saulu waile yee kuketa na ku nganda ya Baamaleki, co wakababandelelele ku cingulunga. 6 Co Saulu walekele Bakeni ngwendi: “Katukeni. Tundeni hakati ka Baamaleki mangana keti njiminyongesele kumo nabo. Mwafwa mwamwesele cizemo cije kucesi kutenguluka kuli Baisalele boshe ha simbu ibatundile mu lifuti lya Ijipiti.” Ngeci, Bakeni batundile hakati ka Baamaleki. 7 Co Saulu watsiile Baamaleki kutunda ku Havila kuketa ku Shuri ije ili muyehi na Ijipiti. 8 Wakwatele Agagi mwene wa Baamaleki oku ayoya, oloni banu boshe bakebo wabatsiile na mukwale. 9 Saulu na banu bendi bobwele* Agagi na bimanga bababwa manene, na bingombe bababwa manene, na tusitu ba kununa, na bimanga ba nkomba, na byuma byoshe bije byapwile byabibwa. Kubashakele kubinyongesa. Oloni byuma byoshe bije bibamwene ngwabo kubyesi na seho, co kubabishakele, babinyongesele.
10 Co Yehova walekele Samwele ngwendi: 11 “Njili na kulibeya* omwo njinangula Saulu kupwa mwene mwafwa nanjitengulukila, co kononokele majwi ange.” Samwele walinyengele manene, co watwaleleleleho kulambelela Yehova butsiki bwoshe. 12 Samwele mwendukile mutondo-tondo ngwendi akaliwane na Saulu, bamulekele ngwabo: “Saulu naile ku Kameu na kukemika cimweso ca kumwanukilaho, co waminguluka na kusikumuka ku Giugali.” 13 Samwele mwetele kuli ikeye, Saulu wamulekele ngwendi: “Yehova akubezikise. Njinalingi byanendekele Yehova.” 14 Oloni Samwele wendekele ngwendi: “Indi obo bimanga na bingombe banjili na kuzibaco?” 15 Saulu wendekele ngwendi: “Tunabambata kuli Baamaleki, mwafwa banu banobola* bimanga na bingombe bababwa manene mangana babane kupwa mulambu kuli Yehova Njambi yobe. Oloni byoshe binasaleleho tunabinyongesa.” 16 Co Samwele walekele Saulu ngwendi: “Olokela bene oho! Tolilila njikuleke byananjilekele Yehova izau butsiki.” Saulu wendekele ngwendi: “Njileke!”
17 Samwele watwaleleleleho kwendeka ngwendi: “Kuma kuwalimwene kupwa wamundondo Yehova mwakupwisile ntwama wa miyati ya Isalele na kukubwabesa kupwa mwene wa Isalele ndi? 18 Mu kwita kwa simbu, Yehova wakutumine na kukuleka ngwendi, ‘Ya ukanyongese Baamaleki mwafwa ya bubi bwabo. Ukabalwise kweta noho haukabanyongesela.’ 19 Co bika kuwononokelele lijwi lya Yehova? Unashatukilile kwambata byuma bya kupukula, co unalingi byuma byabibi mu mesho a Yehova!”
20 Oloni Saulu walekele Samwele ngwendi: “Njinononoka lijwi lya Yehova! Njinaile na kupanga cipangi cananjitumine Yehova ngwendi njikapange, co njinakanyongesa Baamaleki na kwiluka na Agagi mwene yabo. 21 Oloni banu banambata bimanga na bingombe ku byuma bije bibanapukula. Banambata byuma byabibwa manene hakati ka byuma bije binapandele kunyonga mangana babyane kupwa mulambu kuli Yehova Njambi yobe mu Giugali.”
22 Co Samwele wendekele ngwendi: “Bika bikazibisa manene Yehova kubwaha ku mbunge? Kumwana milambu ya kwenyeka na milambu yeka, indi kwononoka lijwi lyendi Yehova? Tala! Kwononoka kwakubwa manene kutubakana kwana mulambu, co kutolilila kwakubwa manene kutubakana mazi a bimanga ba nkomba, 23 mwafwa kutengulukila kunalifu na bubi bwa kuumikiya, co kulinga byuma mwafwa ya kulijundula kunalifu na kulinga manseno na kulemesa tumponya.* Ngeci, omwo unabyana kwononoka lijwi lya Yehova, nendi nakubyana kupwa mwene.”
24 Co Saulu walekele Samwele ngwendi: “Njalingi bubi omwo kunjononokele lishiko lya Yehova na majwi obe mwafwa njinatewele banu, co njinatolililile ku byuma bibanendekele. 25 Ngeci, njikonekeleko mwafwa njalingi bubi. Iluka nange mangana njikatsikamene Yehova.” 26 Oloni Samwele walekele Saulu ngwendi: “Kunjiluka nobe mwafwa unabyana kwononoka lijwi lya Yehova, co Yehova nakubyana kutwalelelaho kupwa mwene wa Isalele.” 27 Samwele mwatengulukile ngwendi aye, Saulu wakwatelelele ku mungundo wa cizalo cendi ca helu ca kujeneka maboko, oloni owo mungundo watabukile. 28 Co Samwele wamulekele ngwendi: “Yehova natundisa bumwene bwa Isalele kuli yobe lelo, co abwana kuli mukweni weka uje nakutubakana. 29 Co lalo Njambi wa Bulemu wa Isalele kendeka makuli nambe kutengulula biyongola byendi,* mwafwa kapwile munu mangana atengulule biyongola byendi.”*
30 Co Saulu wendekele ngwendi: “Njinalingi bubi. Oloni njisingimike ha mesho a bakulunu ba banu bange na ha mesho a Baisalele. Iluka nange, co njikatsikamena Yehova Njambi yobe.” 31 Ngeci, Samwele welukile na Saulu. Wamukabele munima, co Saulu wakatsikamenene Yehova. 32 Co Samwele wendekele ngwendi: “Neneni Agagi mwene wa Baamaleki kuno.” Ngeci, Agagi waile kuli ikeye mu kulisindiya,* mwafwa wakele na kulyendekesa ngwendi: ‘Bya kunjitsiyani bineti bene.’ 33 Oloni Samwele wendekele ngwendi: “Ngwe omwo mukwale wobe unalingisa banakazi batsise bana babo, nyoko nendi akala manene mu busiwa hakati ka banakazi.” Ngeci, Samwele watetangele Agagi bipuka-bipuka halutwe lwa Yehova mu Giugali.
34 Kutundaho, Samwele waile ku Lama, co Saulu waile ku njibo yendi ku Gibea. 35 Samwele kamwene lalo Saulu kweta na litangwa lyatsile, mwafwa Samwele wakele mu busiwa mwafwa ya Saulu, co Yehova walibeyele omwo wapwisile Saulu mwene wa Isalele.