Mukanda Wakulibanga wa Samwele

17 Bafilistiya bakungulwile maswalale babo mangana balwe nzita. Balikungulwilile ku Soko ije yapwa ya Juda, co batungile cilombo cabo mukati ka Soko na Azeka, mu Efesi-damimu. 2 Saulu na banalume ba mu Isalele balikungulwile na kutunga cilombo mu Cingulunga ca Elahe, co cendo cabo ca maswalale cashwenene Bafilistiya mangana balwe nabo. 3 Bafilistiya bakele ku mutambela umo wa munkinda, Baisalele bakele ku mutambela ukwabo wa munkinda, co mukati kabo mwakele cingulunga.

4 Co kwezile muka-kulwa umo wa nzili kutunda mu cilombo ca Bafilistiya. Lizina lyendi Goliati wa ku Gathi, co wapwile wamulaha kweta ku mamita 2.9.* 5 Wazalele tepa ya kopa ku mutwe na cizalo ca buswalale ca tubikubo.* Bulemu bweci cizalo ca kopa bwapwile mashekele 5,000.* 6 Wazalele tubikubo twa kopa twa kulipasha ha mendi endi, co wambatele mumba wa kopa ku mwongo hyo. 7 Ceti ca likunga lyendi capwile ngwe citi habakatongela baka-kutonga. Bulemu bwa cikubo ca likunga lyendi bwapwile mashekele 600.* Co muka-kumwambatela ntelo wakele na kumwenda kulutwe. 8 Co Goliati wemanene na kutambekela cibunga ca maswalale ba Isalele ngwendi: “Bika bimunezila na kulikwalaleka ngwe baje bashaka kulwa? Yange nji Kafilistiya, yenico mu bangamba ba Saulu. Anguleni munalume hakati keni asikumuke kuno kuli yange. 9 Nga asa kulwa nange na kunjitsiya, co tupwa bangamba beni. Oloni nga njimuhyana na kumutsiya, yeni mupwa bangamba betu, co mutupangela.” 10 Co ou Kafilistiya wendekele ngwendi: “Lelo njishaula maswalale ba Isalele. Njaneni munalume njilwe nendi!”

11 Saulu na Baisalele boshe mubazibile majwi ou Kafilistiya balijujukilile na kuziba manene lyoba.

12 Devidi wapwile muna Jesi wa mu Efrata, kulumbununa Betelehema ya mu Juda. Jesi wakele na bana ba banalume 8, co lalo mu matangwa a Saulu, te nakulubala laja. 13 Bana ba Jesi ba kukola batatu bakabele Saulu ku nzita. Obo bana bendi batatu baile ku nzita bapwile Eliabu munendi wa ntwatwa, Abinadabu munendi wamucibali, na Shamaha munendi wamucitatu. 14 Devidi ikeye wapwile mwanike manene, co aba batatu ba kukola bakabele Saulu ku nzita.

15 Devidi wakele na kuya kuli Saulu na kulwiluka lalo ku Betelehema kukanyunga bimanga ba ishe. 16 Uje Kafilistiya wakele na kwija na kwimana hayehi nabo mutondo na mangwezi ha matangwa 40.

17 Co Jesi walekele munendi Devidi ngwendi: “Ambata ei efa* ya binona bya kwoca nei mikasha 10 ya makende ubitwalele bandolome bobe ku cilombo bwasi-bwasi. 18 Ambata nei mitamba 10 ya mazi a mabele* uitike ntwama wa maswalale 1,000, co lalo ukamone mubanendukila bandolome bobe na kunjinenela bukaleho butunda kuli bakebo bumwesa ngwabwo bali mwamubwa.” 19 Aba bana ba Jesi bakele hamo na Saulu na bakwabo banalume boshe ba mu Isalele mu Cingulunga ca Elahe mubakele na kulwila na Bafilistiya.

20 Ngeci, Devidi wendukile mutondo-tondo na kusezela umo amunyungileko bimanga, co walongekeyeye ngwe mwamulekelele ishe Jesi. Mwetele kuyehi na cilombo, maswalale bakele na kutunda mu cilombo kuya ku nzita oku batambeka mutambi wa nzita. 21 Maswalale ba Isalele balitalele na maswalale ba Bafilistiya. 22 Oho bene Devidi wasezele bitenga byendi kuli muka-kunyunga bitenga na kushatukila kuje kubakele maswalale. Mwetele, washangumukile kwihula mubendukilile bandolome bendi.

23 Mwakele na kwendeka nabo, uje muka-kulwa wa nzili wa Kafilistiya wa lizina lya Goliati wa mu Gathi wezile. Wezile kutunda ku maswalale ba Bafilistiya, co wendekele majwi akele na kwendeka simbu yoshe, co Devidi wamuzibile. 24 Banalume boshe ba mu Isalele mubamumwene balijujukilile na kutewa. 25 Banalume ba mu Isalele bakele na kwendeka ngwabo: “Munamono ou munalume aijomu. Akaija na kushendumuna Isalele. Munalume uje amutsiya, mwene amwana bufuko bwabwingi na kumwana munendi wa munakazi, co lalo ana bakunjibo ya ishe lisesa lya kujeneka kulingako byuma bimo mu Isalele.”

26 Devidi washangumukile kwihula banalume baje bemanene kuyehi nendi ngwendi: “Cikandelela muka cibana munu atsiya uje Kafilistiya nemana haje na kulingisa Isalele becele kumushaula? Mwafwa ou Kafilistiya wa kujeneka kuya ku mukanda iyajo mangana ashendumune maswalale ba Njambi wa kuyoya?” 27 Co banu bamulekele ngwe mubendekelele hakulibanga ngwabo: “Eci cikeco cikandelela cibana uje amutsiya.” 28 Yayendi wa mukulunu Eliabu mwazibile Devidi endeka naba banalume wamulubalelele manene, co wamulekele ngwendi: “Bika biunezila kuno? Co iya iunasezela baje bimanga babandondo mu mambo? Njizibuka kulijundula kwobe na biyongola byobe byabibi. Unaija lika na kukenga nzita.” 29 Devidi wendekele ngwendi: “Njinalingi bikoni bayaya? Njinakala na kwihula lika!” 30 Ngeci, wamusezele na kutalesela kuli mukwabo lalo na kumwihula cihula ca kulifwa. Co banu bamukumbulwile ngwe mubamukumbulwilile hakulibanga.

31 Banu bazibile majwi endekele Devidi, co bakawalekele Saulu. Ngeci, Saulu watumine banu bakamusane. 32 Devidi walekele Saulu ngwendi: “Naumo wahi napande kulijujukila* mwafwa you Kafilistiya. Ngamba yobe aya na kumulwisa.” 33 Oloni Saulu walekele Devidi ngwendi: “Kuwasa kulwisa ou Kafilistiya, mwafwa ucili u mwanike, oloni ikeye napu liswalale kushwa ku bukwenje bwendi.” 34 Devidi walekele Saulu ngwendi: “Ngamba yobe wakele na kunyunga butanga bwa ishe, co ndumba wezile kwakukwata manga ha butanga, co simbu ikwabo kwezile mbeya, co nendi wakwatele manga. 35 Njabakabele na kukabapupa na kwobola bimanga ku tunwa twabo. Mubanjitengulukilile, njabakwatele ku munjezi* na kubapupa na kubatsiya. 36 Ngamba yobe watsiile ndumba na mbeya. Co ou Kafilistiya wa kujeneka kuya ku mukanda nendi njimutsiya ngwe munjabatsiilile, mwafwa nashendumuna maswalale ba Njambi wa kuyoya.” 37 Devidi wendekele lalo ngwendi: “Yehova uje wanjamenene ku byala bya ndumba na ku byala bya mbeya ikeye anjamena ku liboko lyou Kafilistiya.” Ngeci, Saulu walekele Devidi ngwendi: “Ya, co Yehova akale nobe.”

38 Saulu wazikile Devidi bizalo byendi. Wamuzikile tepa ya kopa ku mutwe, kutundaho wamuzikile cizalo ca buswalale ca tubikubo. 39 Co Devidi washwelelele mukwale wendi ha bizalo byazalele na kweseka kuya, oloni kasele mwafwa kabizililile. Devidi walekele Saulu ngwendi: “Kunjasa kuya nebi byuma mwafwa kunjabizililile.” Co Devidi wabishulwile. 40 Kutundaho, wambatele mulamu wendi mu liboko na kwangula mamanya atanu a kuseneta ha masima a muna ndonga na kuwaka mu ngonga yendi ya bunyungi, na kwambata cipapa cendi. Co washangumukile kushwena uje Kafilistiya.

41 Uje Kafilistiya wakele na kushwena kuli Devidi, co muka-kumwambatela ntelo watwamene kulutwe lwendi. 42 Mwamwene Devidi, wamutalele shwii na kumwombwanesa mwafwa wapwile lika mwanike wa kubenga, wamubwa. 43 Ngeci, uje Kafilistiya walekele Devidi ngwendi: “Kuma nji katali ndi, mangana unjizile na bibanzi?” Co uje Kafilistiya wasingile Devidi kupangesa mazina a binjambi bendi. 44 Uje Kafilistiya walekele Devidi ngwendi: “Ija kuli yange, co njana situ yobe ku tuzila na tusitu ba mu shwata.”

45 Devidi wakumbulwile uje Kafilistiya ngwendi: “Uli na kwija kuli yange na mukwale na likunga na mumba, oloni yange njija na kukulwisa mu lizina lya Yehova wa maswalale, Njambi wa maswalale ba Isalele, uje iunashendumuna. 46 Ha litangwa eli bene, Yehova akwana mu liboko lyange, co njikutsiya na kukutapa mutwe. Co lelo bene njana bibimbi bya maswalale ba Bafilistiya ku tuzila na tusitu ba ha lifuti-libu. Co banu ba ha lifuti-libu hoshe bazibuka ngwabo kwakala Njambi mu Isalele. 47 Banu boshe banalikungulula hano* balimwena ngwabo Yehova kesi kwobola na mukwale nambe na likunga, mwafwa Yehova ikeye atulwila omu mu nzita, co mubaboshe amyana mu liboko lyetu.”

48 Co uje Kafilistiya washangumukile kushwena kamandondo-kamandondo kuli Devidi, oloni Devidi washatukilile bwasi-bwasi kuje kubalikwalalekele maswalale ba Bafilistiya mangana akaliwane nendi. 49 Devidi wakobelesele liboko mu ngonga yendi, co wambatelemo limanya na kulyasha na cipapa. Washele Kafilistiya mu luholo, co limanya lyakobelele mu luholo lwendi, co wandumukile na kuwisa ca mesho hasi. 50 Ngeci, Devidi wahyanene uje Kafilistiya kupangesa cipapa na limanya. Washele uje Kafilistiya na kumutsiya, nameme Devidi kakwatele mukwale mu liboko. 51 Devidi watwaleleleleho kushatuka na kukemana kumukulo wendi. Co washomwene mukwale wa uje Kafilistiya mu cindalo cawo na kumutapa mutwe mangana amumanusule. Bafilistiya mubamwene ngwabo liswalale wabo wa nzili natsi, batewele.

52 Co banalume ba mu Isalele na mu Juda bashangumukile kukuwa na kusheka Bafilistiya kutunda mu cingulunga kuketa ku bikolo bya Ekroni. Co bibimbi bya Bafilistiya baje babatsiile byakele ku ngila, kutunda ku Shalaimu kuketa na ku Gathi na ku Ekroni. 53 Baisalele mubelukile kutunda mu kukilimisa Bafilistiya, bapukwile bilombo bya Bafilistiya.

54 Co Devidi wambatele mutwe wa uje Kafilistiya na kuunena mu Jelusalema. Oloni bitwa byou Kafilistiya wabyakele mu tenti yendi.

55 Saulu mwamwene Devidi aya na kulwisa Kafilistiya, wehwile Abina ntwama wa maswalale ngwendi: “Abina, ou mwanike muna iya?” Abina wakumbulwile ngwendi: “Njilisinga hali yobe, obe mwene, kunjizibuka!” 56 Mwene wendekele ngwendi: “Tondesesa uwane indi ou mwanike muna iya.” 57 Ngeci, Devidi mwelukile lika kutunda mu kutsiya Kafilistiya, Abina wamwambatele na kumutwala kuli Saulu oku nakwata mutwe wa Kafilistiya mu liboko. 58 Ngeci, Saulu wamwihwile ngwendi: “Obe mwanike, u muna iya?” Co Devidi wamukumbulwile ngwendi: “Nji muna ngamba yobe Jesi, muka-Betelehema.”