Mukanda Wakulibanga wa Samwele
24 Saulu mwelukile lika mu kusheka Bafilistiya, bamulekele ngwabo: “Tala! Devidi ali mu mambo ya Eni-gedi.”
2 Ngeci, Saulu wambatele banalume 3,000 bangwile hakati ka Baisalele boshe na kuya na kushakezeka Devidi na banalume bakele nendi ha mingenyangenya ya mamanya ya bimembe ba ha minkinda. 3 Saulu wetele ku malimba a bimanga a mamanya a kumukulo wa tapalo kuje kwakele bwina bwa mu limanya, co wakobelelemo mangana aye ku mushondo oku Devidi na banalume bakele nendi bali ku shongo ya buje bwina bwa mu limanya. 4 Banalume baje bakele na Devidi bamulekele ngwabo: “Eli likelyo litangwa lyali na kukuleka Yehova ngwendi. ‘Tala! Njili na kwana citozi cobe mu liboko lyobe, co wasa kumulinga byoshe-byoshe biumona ngwobe byabibwa.’” Ngeci, Devidi wakatukile, co walibembele na kukateta ku mungundo wa cizalo ca Saulu ca helu ca kujeneka maboko. 5 Oloni munima, mbunge* ya Devidi yamupayele mwafwa watetele ku mungundo wa cizalo ca Saulu ca helu ca kujeneka maboko. 6 Walekele banalume bakele nabo ngwendi: “Kunjasa kulinga cuma ca cifweci ku mesho a Yehova. Kunjasa kulinga cuma ca cifweci kuli shukulu yange, wakubwabesa wa Yehova ha kujundula liboko lyange na kumutsiya, mwafwa napu wakubwabesa wa Yehova.” 7 Ngeci, Devidi mwendekele awa majwi, wakandele banalume bakele nendi, co kabatabesele kulwisa Saulu. Co Saulu watuhukile mu bwina bwa mu limanya na kuliila.
8 Devidi watuhukile muje mu bwina bwa mu limanya, co watambekelele Saulu ngwendi: “Shukulu yange mwene!” Saulu mwatalele kunima, Devidi watsikamene na kukulamena hasi. 9 Devidi wehwile Saulu ngwendi: “Mwafwa bika uli na kutolilila ku majwi a banu bali na kwendeka ngwabo, ‘Devidi ashaka kukulinga mwamubi’? 10 Lelo unalimwena ngwobe Yehova nakwana mu liboko lyange muunakala mu bwina bwa mu limanya. Oloni munu umo mwananjilekele ngwendi njikutsiye, njinakuzibilile ngozi na kwendeka ngwange, ‘Kunjijundula liboko lyange mangana njilinge mwamubi shukulu yange, mwafwa napu wakubwabesa wa Yehova.’ 11 Co tala, obe tate. Eyo, tala mungundo wa cizalo cobe ca helu unjinakwata, mwafwa munjinatetele mungundo wa cizalo cobe, kunjakutsiile. Hanwoni unalimwena na kunanguka ngwobe kunjesi na biyongola bya kukulinga mwamubi nambe kukutengulukila, co kunjalingile bubi kuli yobe, oloni yobe uli na kunjiyomba mangana unjitsiye.* 12 Yehova akule mukati kobe nange, co Yehova anjilingile shambandinga kuli yobe, oloni kunjikujundwila liboko na kukulinga mwamubi. 13 Nguli imo ya kusañulu ngwayo, ‘Kuli munu wamubi kutunda byuma byabibi,’ oloni yange liboko lyange kulikulwisi. 14 Mwene wa Isalele ali na kuyomba iya? Uli na kusheka iya? Katali wa kutsa ndi? Indi njandu? 15 Yehova apwe lyaako, akula mukati kobe nange, amona bili na kulingiwa na kunjimanena mu ñanda yange, co anjakula na kunjamena mu liboko lyobe.”
16 Devidi mwamanesele kwendeka awa majwi kuli ikeye, Saulu wendekele ngwendi: “Lijwi lyobe olyo Devidi munange?” Co Saulu washangumukile kulila mu kutambeka. 17 Walekele Devidi ngwendi: “U wa kusungama kunjitubakana, mwafwa unanjilingi mwamubwa, oloni yange njinakulingi mwamubi. 18 Lelo unanjileke byuma byabibwa biunalingi omwo kuwanjitsiile, Yehova mwananjanene mu liboko lyobe. 19 Mwafwa iya asa kuwana citozi cendi na kumwecelela aliile kwa kujeneka kumulinga mwamubi? Yehova akwana cikandelela cacibwa mwafwa ya byuma biunalingi kuli yange lelo. 20 Co tala! Njizibuka ngwange upwa bene mwene, co bumwene bwa Isalele bukanyama mu liboko lyobe. 21 Ngeci, lisinge kuli yange mu lizina lya Yehova ngwobe kuunyongesa batekulwila bange nga njinatsi, co kuuzilula lizina lyange mu njibo ya tate.” 22 Co Devidi walisingile kuli Saulu, kutundaho Saulu waile ku njibo yendi. Oloni Devidi na banalume bakele nendi baile ku cimpaka.