Mukanda Wakulibanga wa Samwele
23 Mu kwita kwa simbu, Devidi bamulekele ngwabo: “Bafilistiya bali na kulwisa nganda ya Keila, co bali na kupukula bimbuto ha majungwilo.” 2 Ngeci, Devidi wehwile Yehova ngwendi: “Kuma njinapande kukatsiya obo Bafilistiya ndi?” Yehova wakumbulwile Devidi ngwendi: “Ya, ukatsiye obo Bafilistiya na kwamena Keila.” 3 Oloni banalume bakele na Devidi bamulekele ngwabo: “Tala! Tuli na kuziba lyoba okuni tuli mu Juda. Batyoni nga tuya ku Keila kukalwisa maswalale ba Bafilistiya?” 4 Ngeci, Devidi wehwile lalo Yehova, co Yehova wamukumbulwile ngwendi: “Katuka usikumuke ku Keila mwafwa njana Bafilistiya mu liboko lyobe.” 5 Ngeci, Devidi waile ku Keila na banalume bakele nendi, co bakalwisile Bafilistiya na kubanyeka bimuna babo, co watsiile bwingi bwabo na kwamena banu ba mu Keila.
6 Co Abiatha muna Ahimeleki mwashatukilile kuli Devidi ku Keila, wambatele efodi. 7 Saulu bamulekele ngwabo: “Devidi naija ku Keila.” Co Saulu wendekele ngwendi: “Njambi nanjanaye mu liboko, mwafwa nalikobelesa mu nganjo ikeye babenya mwanakobela mu nganda ili na mapito na tupateso twa bikubo.” 8 Ngeci, Saulu wasanene banu boshe ku nzita, mangana basikumuke ku Keila na kukazengeleka Devidi na banalume bakele nendi. 9 Devidi mwanangukile ngwendi Saulu nayongola kumulwisa, walekele kapilistu Abiatha ngwendi: “Nena efodi kuno.” 10 Co Devidi wendekele ngwendi: “Obe Yehova Njambi ya Isalele, ngamba yobe nazibi ngwabo Saulu nayongola kwija ku Keila na kunyongesa ei nganda mwafwa yange. 11 Kuma bantwama* ba Keila banjana mu liboko lyendi ndi? Kuma Saulu asikumuka kuno ngwe mwanazibila ngamba yobe ndi? Obe Yehova Njambi ya Isalele, shukulu-kambu leka ngamba yobe.” Ngeci, Yehova wamukumbulwile ngwendi: “Asikumuka.” 12 Devidi wehwile ngwendi: “Kuma bantwama ba Keila banjana mu liboko lya Saulu hamolika na banalume banjili nabo ndi?” Yehova wamukumbulwile ngwendi: “Bamyana mu liboko lyendi.”
13 Devidi mwazibile ngoco wakatukile hamo na banalume bakele nendi ba kweta ku 600, co batundile mu Keila na kuyebangela. Saulu mubamulekele ngwabo Devidi natewe mu Keila, kamukabele. 14 Devidi wakele mu mambo ku myela yaikalu kwetako, mu mutambela wa malundu wa mambo ya Zifu. Saulu wakele na kumutonda simbu yoshe, oloni Yehova kamwanene mu liboko lyendi. 15 Devidi mwakele mu mambo ya Zifu ku Holeshi wazibukile ngwendi* Saulu wakele na kumuyomba.*
16 Jonathani muna Saulu waile kuli Devidi ku Holeshi, co wakamukwasele akulahele manene Yehova. 17 Wakamulekele ngwendi: “Keti uzibe lyoba, mwafwa tate Saulu kakuwana. Upwa mwene, yangeco njipwa wamucibali kuli yobe, co na tate Saulu nendi azibuka ngoco.” 18 Kutundaho balingile cikumiiyo mu bubali bwabo ha mesho a Yehova, co Devidi watwaleleleleho kukala mu Holeshi, Jonathani ikeye welukile ku njibo yendi.
19 Mu kwita kwa simbu, banalume ba mu Zifu bakandukile ku Gibea kuli Saulu na kukamuleka ngwabo: “Devidi nabanda muyehi netu, ku myela yaikalu kwetako mu Holeshi, ha lilundu lya Hachila lije lili ku mbwela* ya Jeshimoni.* 20 Hoshe haushakela kusikumuka kuli yetu obe mwene, wasa kulinga ngoco, co tumwana mu liboko lyobe mwene.” 21 Ngeci, Saulu wendekele ngwendi: “Yehova amibezikise mwafwa munanjizibila mema ku mbunge. 22 Yeni mukatondesese mwela mpundu kwali, nowo namumweneko, mwafwa bananjileke ngwabo nanyanyama manene. 23 Tondeseseni mwamubwa kwoshe kwali na kubanda na kunjilwisila bukaleho, co njiya neni. Co nga mwali muno mu lifuti, njimutonda-tonda hakati ka bikota byoshe bya Juda.”
24 Ngeci, bakatukile na kuya ku Zifu, co batwamene kulutwe lwa Saulu oku Devidi na banalume bakele nendi bali mu mambo ya Maoni mu Alaba, ku mbwela ya Jeshimoni. 25 Ngeci, Saulu na banalume bakele nendi baile na kumushakezeka. Devidi mubamulekele ou muzimbu, oho bene wasikumukile ku limanya, co wakele mu mambo ya Maoni. Saulu mwazibile ngoco, wakabele Devidi mu mambo ya Maoni. 26 Saulu mwetele ku sambwa limo lya munkinda, Devidi na banalume bakele nendi bakele ku sambwa likwabo lya munkinda. Devidi wakele na kuzambula mangana atewe Saulu, oloni Saulu na banalume bakele nendi bakele na kushunanana Devidi na banalume bakele nendi mangana babakwate. 27 Oloni katumwa umo wezile kuli Saulu na kumuleka ngwendi: “Iluka bwasi-bwasi, mwafwa Bafilistiya banaija na kulwisa lifuti!” 28 Saulu mwazibile ngoco wecelele kusheka Devidi, co wakalwisile Bafilistiya. Mukemwo uje mwela baulukile ngwabo Limanya lya Kulitepa.
29 Co Devidi watundile kuje na kukakala ku myela yaikalu kwetako, ku Eni-gedi.