Mukanda Wamucibali wa Samwele
1 Munima ya kutsa kwa Saulu, Devidi mwelukile kutunda na kuhyana* Baamaleki, wakele mu Zikilagi matangwa abali. 2 Ha litangwa lyamucitatu, munalume umo wezile kutunda mu cilombo ca Saulu na bizalo bya kutabuka, na libu ku mutwe. Mwashwenene kuyehi na Devidi, watsikamene na kukulamena hasi.
3 Devidi wamwihwile ngwendi: “Utunda kuli?” Wamukumbulwile ngwendi: “Njinatewe mu cilombo ca Baisalele.” 4 Devidi wamwihwile ngwendi: “Byuma binende bati? Njileke.” Co wamukumbulwile ngwendi: “Banu banatewe mu nzita, co babangi banatsi. Saulu na munendi Jonathani nabo banatsi.” 5 Co Devidi wehwile mukwenje wamunenelele ou muzimbu ngwendi: “Uzibuka bati ngwobe Saulu na munendi Jonathani banatsi?” 6 Uje mukwenje wakumbulwile ngwendi: “Njinakele na kwita lika ha Munkinda wa Giuboa, co njamona Saulu nalikwatelela ha likunga lyendi, co matemba na banalume baje banalondele ha tubalu banakele na kushwena muyehi nendi. 7 Mwanatengulukile, nanjimwene na kunjisana, co njinamukumbulwile ngwange, ‘Yange uno.’ 8 Nanjihwile ngwendi, ‘Yobe iya?’ Njinamukumbulwile ngwange, ‘Nji Kaamaleki.’ 9 Co nanjilekele ngwendi, ‘Shwena kuno wakunjitsiye, mwafwa njili na kuziba manene kubabala, oloni anga njiciyoya.’ 10 Co njashwena muyehi na kumutsiya, mwafwa njinazibukile ngwange kayoyo, mwafwa nabulumukile manene. Co njinambata cilongo canazalele ku mutwe na liseka lyanazalele ku liboko na kubinenela shukulu yange.”
11 Ngeci Devidi watabwile bizalo byendi, co banalume bakele nendi nabo batabwile bizalo byabo. 12 Co bambolozokele na kulila na kulibindika kulya kweta mangwezi mwafwa ya Saulu na munendi Jonathani na banu ba Yehova ba ku njibo ya Isalele baje babatsiile na mukwale.
13 Devidi wehwile mukwenje wamunenelele ou muzimbu ngwendi: “Utunda kuli?” Wamukumbulwile ngwendi: “Nji muna Kaamaleki uje watunda ku lifuti lyeka.” 14 Co Devidi wamwihwile ngwendi: “Bika unakalukila kutsiya wakubwabesa wa Yehova?” 15 Ngeci, Devidi walekele mukwenje umo ngwendi: “Ija kuno wakumutsiye.” Ngeci wamutsiile. 16 Devidi wendekele ngwendi: “Maninga obe ali ha mutwe wobe, mwafwa yobe babenya unendeka ngwobe, ‘Njinatsii wakubwabesa wa Yehova.’”
17 Devidi wembile ou mwaso wa busiwa wa kulila Saulu na munendi Jonathani, 18 co wendekele ngwendi banu ba Juda banapande kulilongesa ou mwaso wa “Buta bwa Lusipa,” ubanasoneka mu libulu lya Jasha ngwabo:
19 “Banu bobe bababwa obe Isalele, banatsila ha myela yobe ya kulunduka.
Banu ba nzili banandumuka.
20 Keti mwendeke ei ñanda mu Gathi,
Keti muyambulule mu bingila bya Ashikeloni,
Keti ngoconi bana ba Bafilistiya ba banakazi babwahelela,
Bana ba banakazi ba banu ba kujeneka kuya ku mukanda balisamba.
21 Ha minkinda ya Giuboa
Keti hakale lime nambe nyonzi,
Nambe mahya muje mukatundu milambu ya kujela,
Mwafwa hakeho habanajwalesela bintelo bya banu ba nzili,
Ntelo ya Saulu, hano keti ya kubwabesa na mazi.
22 Buta bwa lusipa bwa Jonathani kubwakele na kwiluka ngoco
Kwa kujeneka kwitila maninga a bitozi nambe kupulyasana mu mazi a banu ba nzili,
Co mukwale wa Saulu kuwakele na kwiluka ngoco kwa kujeneka kuhyana.
23 Saulu na Jonathani babazemene na kubashaka mubakele na kuyoya,
Nameme ha kutsa kwabo kubalyangunwine.
Bakele na lumbisi kutubakana bingonga,
Na nzili kutubakana bindumba.
24 Eni bana ba banakazi ba Isalele, lileni Saulu,
Uje wamizikile bizalo bya kubenga na byakulicakeya byabibwa,
Uje wakele byuma bya goudi ha bizalo byeni.
25 Banu ba nzili banandumuka mu nzita.
Jonathani nalala muje kushwanga ha myela yobe ya kulunduka, obe Isalele.
26 Njili mu busiwa mwafwa yobe ndolome yange Jonathani,
Njakuzemene manene.
Cizemo cobe capwile cacibwa manene kutubakana cizemo ca banakazi.
27 Banu ba nzili banandumuka,
Co bitwa bya nzita binanyongo.”