Mukanda Wamucibali wa Samwele
2 Kutundaho, Devidi wehwile Yehova ngwendi: “Kuma njasa kuya mu nganda imo ku binganda bya Juda ndi?” Yehova wamukumbulwile ngwendi: “Wasa kuya.” Co Devidi wehwile ngwendi: “Njiye kuli?” Wamukumbulwile ngwendi: “Ku Hebroni.” 2 Ngeci Devidi waile na banakazi bendi babali, Ahinoamu wa ku Jezilele na Abigeu uje wapwile munakazi wa Nabale wa ku Kameu. 3 Devidi waile na banalume bakele nendi, umo na umo waile na bakunjibo yendi, co bakele mu binganda bije byazengelekele Hebroni. 4 Kutundaho, banalume ba mu Juda bezile, co babwabesele Devidi na kumupwisa mwene wa bakunjibo ya Juda.
Balekele Devidi ngwabo: “Banalume ba mu Jabeshi-giliyadi bakebo banatsindile Saulu.” 5 Ngeci Devidi watumine tutumwa ku banalume ba mu Jabeshi-giliyadi mangana bakabaleke ngwabo: “Yehova amibezikise, mwafwa munamwesele shukulu yeni Saulu cizemo cije kucesi kutenguluka omwo munamutsindile. 6 Yehova amimwese cizemo cije kucesi kutenguluka na kupwa wa kulongwa kuli yeni. Nange njimimwesa ngozi mwafwa yeci cuma cimunalingi. 7 Kanyameni na kupwa banalume ba kusimpa, mwafwa shukulu yeni Saulu natsi, co bakunjibo ya Juda bananjibwabesa mangana njipwe mwene yabo.”
8 Oloni Abina muna Nele, ntwama wa maswalale ba Saulu wambatele Ishi-bosheti muna Saulu na kumutwala mu sambwa mu Mahanaimu. 9 Co wamupwisile mwene wa Giliyadi na wa Baashuli na wa Jezilele na wa Efremu na wa Benjamini na Isalele yoshe. 10 Ishi-bosheti muna Saulu wakele na myaka 40 mwapwile mwene wa Isalele, co wayulile myaka ibali. Oloni bakunjibo ya Juda bakundwiiye Devidi. 11 Devidi wapwile mwene wa bakunjibo ya Juda mu Hebroni ha myaka 7 na bingonde 6.
12 Mu kwita kwa simbu, Abina muna Nele na bangamba ba Ishi-bosheti muna Saulu batundile mu Mahanaimu na kuya ku Gibioni. 13 Joabu muna Zeluya na bangamba ba Devidi nabo baile na kukaliwana nabo ku lishali lya Gibioni. Cibunga cimo catumamene mu sambwa limo lya lishali, cibunga cikwabo catumamene mu sambwa likwabo lya lishali. 14 Mamaneselelo Abina walekele Joabu ngwendi: “Bakwenje bakatuke mangana balwe tumone.” Co Joabu wamukumbulwile ngwendi: “Bukalu bwahi, bakatuke.” 15 Ngeci bakatukile na kujabuka kwesekesa na namba ibangwile. Kuli Benjamini na Ishi-bosheti muna Saulu kwatundile bakwenje 12, co kuli bangamba ba Devidi nakwo kwatundile bakwenje 12. 16 Umo na umo wabo wakwatele mukwabo ku mutwe na kumutuba ku bimati, co boshe bandumukilile hasi. Ngeci uje mwela wa mu Gibioni baulukile ngwabo Heukathi-hazulimu.
17 Nzita yakatukile lije litangwa yalingile na ha mesho bwi, co mamaneselelo bangamba ba Devidi bahyanene Abina na banalume ba mu Isalele. 18 Joabu, Abishai, na Asahele, bana ba Zeluya batatu ba banalume kubakele. Co Asahele wakele na lumbisi ngwe shonge mwakashatuka mu cana. 19 Asahele washekele Abina, co katalesele ku cilyo nambe ku cimoshwe omwo wakele na kumukilimisa. 20 Abina mwatalele kunima wehwile ngwendi, “Asahele yobe uli na kunjisheka?” Wamukumbulwile ngwendi, “Yange bene.” 21 Co Abina wamulekele ngwendi: “Talesela ku cilyo nambe ku cimoshwe na kukwata umo ku bakwenje, co ulyambatele byoshe-byoshe biumunyeka.” Oloni Asahele kecelele kumusheka. 22 Ngeci Abina walekele lalo Asahele ngwendi: “Keti unjisheke. Njikutsiya ngoco. Ndolome yobe Joabu anjimona bati?” 23 Oloni watwaleleleleho kumusheka, ngeci Abina wamutubile ceti ca likunga mwimo, co camupulyasanene na kutuhukila mu mwongo, co wandumukile na kutsa oho bene. Banu boshe bakele na kwita haje hatsililile Asahele bakele na kwimanaho.
24 Co Joabu na Abishai baile na kushakezeka Abina. Litangwa mulyalahukile, betele ha lilundu lya Amaha, lije linalitala na Giyaha mu ngila iya ku mambo ya Gibioni. 25 Co Babenjamini balikungulwilile kuli Abina na kupwa cibunga cimo, co bemanene ha lilundu limo ngacije. 26 Abina watambekelele Joabu ngwendi: “Umona ngwobe eci kulilwisa na mikwale citutwala kuli? Kuma kuumono ngwobe ebi binena lika bukalu ndi? Bika kuulekela banu ngwobe becele kusheka bandolome babo?” 27 Joabu wendekele ngwendi: “Njilisinga hali Njambi wa kuyoya ngwange ngwe kuwendekele, ngwe banu banatwalelelelaho kusheka bandolome babo kweta mutondo.” 28 Ngeci Joabu wohyesele limbinga, co banu bendi balikelele kusheka maswalale ba Isalele, co na nzita bene hakeho hayahwililile.
29 Abina na banu bendi betile mu Alaba butsiki bwoshe, co bajabukile Jodani na kwita mu cimbongo,* mamaneselelo betele ku Mahanaimu. 30 Joabu mwecelele kusheka Abina, wakungulwile banu boshe. Co ku bangamba ba Devidi wawanene ngwendi Asahele na bakwabo 19 bahi. 31 Oloni bangamba ba Devidi bahyanene Babenjamini, co ku banu ba Abina kwatsile ba kupwa 360. 32 Bambatele Asahele na kumutsinda mu mbumbo ya ishe mu Betelehema. Co Joabu na banalume bakele nendi bendele butsiki bwoshe, co baketele mu Hebroni mutondo-tondo.