Mukanda Wamucibali wa Samwele
4 Ishibosheti muna Saulu mwazibile ngwabo Abina natsi mu Hebroni, wazibile na mu bitsiya keke,* co Baisalele boshe balijujukilile. 2 Kwakele banalume babali baje bakele na kutwamenena bibunga bya bikenya bya muna Saulu. Umo wabo wapwile Banahe, mukwabo Lekabu. Bapwile bana ba Limoni wa ku Belothi wa ku muyati wa Benjamini. (Mwafwa Belothi nayo baitandelele kuli Benjamini. 3 Baka-Belothi batewelele ku Gitaimu, co banakala bene kuje ku lifuti lyambala kweta na lelo lino.)
4 Oloni Jonathani muna Saulu wakele na mwana uje watengukile mendi. Wakele na myaka itanu mubatambwile muzimbu wa byuma byalingiwile kuli Saulu na Jonathani ku Jezilele, co ndezi yendi wamwambatele na kutewa, oloni mwafwa ya kutewa oku nalijujukila, wamuwisile, co watengukile mendi. Lizina lyendi Mefibosheti.
5 Lekabu na Banahe, bana ba Limoni wa ku Belothi baile ku njibo ya Ishi-bosheti mutanya hakukashalukila manene, co bakamuwanene ali na kuhwima. 6 Lekabu na ndolome yendi Banahe bakobelele mu njibo ngwe baje baya na kwambata tiliku, co bamutibile mwimo, kutundaho batewele. 7 Mubakobelele mu njibo, bamuwanene nalala ha mwela mu mulili wa kulala, co bamutibile na kumutsiya, kutundaho bamutetele mutwe. Co bambatele mutwe wendi na kwenda butsiki bwoshe mu ngila iya ku Alaba. 8 Co batwalele mutwe wa Ishi-bosheti kuli Devidi ku Hebroni na kukaleka mwene ngwabo: “Mutwe wa Ishi-bosheti muna Saulu citozi cobe uje washakele kukutsiya ou. Lelo Yehova nalingilako shambandinga shukulu yetu mwene hali Saulu na bana bendi.”
9 Oloni Devidi wakumbulwile Lekabu na ndolome yendi Banahe, bana ba Limoni wa ku Belothi ngwendi: “Njilisinga hali Yehova wa kuyoya uje wanjamenene* mu bukalu bwoshe ngwange, 10 munu umo mwanjilekele ngwendi, ‘Saulu natsi,’ wasinganyekele ngwendi nanjinenela muzimbu waubwa, oloni njamukwatele na kumutsiya mu Zikilagi. Ei ikeyo fweto injanene uje katumwa. 11 Batico banu bababi baje banatsiila munu wa kusungama mu njibo yendi ha mwela wendi? Kuma kunjapandele kutonda maninga endi mu maboko eni na kumizilula ha lifuti-libu ndi?” 12 Devidi washikile bakwenje ngwendi babatsiye. Babatetangele maboko na mendi na kubashukika kuyehi na lishali mu Hebroni. Oloni bambatele mutwe wa Ishi-bosheti na kuutsinda mu cihilo ca Abina mu Hebroni.