Mukanda Wamucibali wa Samwele

3 Bakunjibo ya Saulu na bakunjibo ya Devidi batwaleleleleho kulilwisa, co Devidi watwaleleleleho kukala na nzili, oloni bakunjibo ya Saulu batwaleleleleho kuzeya.

2 Devidi wakitile bana ba banalume mu Hebroni. Munendi wa ntwatwa wapwile Amunoni yakitilile kuli Ahinoamu wa ku Jezilele. 3 Wamucibali wapwile Kiliabu yakitilile kuli Abigeu, uje wapwile munakazi wa Nabale wa ku Kameu. Wamucitatu wapwile Abisalomu yakitilile kuli Maaka muna Taumai mwene wa Gesha. 4 Wamuciwana wapwile Adonaija muna Hagithi. Wamucitanuco wapwile Shefatiya muna Abitau. 5 Wa bu 6 wapwile Ithrimu yakitilile kuli munakazi wendi Egila. Aba bakebo bana ba Devidi basemukilile mu Hebroni.

6 Bakunjibo ya Saulu na bakunjibo ya Devidi mubatwaleleleleho kulilwisa, Abina watwaleleleleho kukala na nzili mu njibo ya Saulu. 7 Co Saulu wakele na munakazi wendi mukwabo wa lizina lya Rizipa muna Aya. Mu kwita kwa simbu, Ishi-bosheti wehwile Abina ngwendi: “Bika biunalilalelele na munakazi wa tate?” 8 Abina walubalele manene mwafwa ya majwi a Ishi-bosheti, co wendekele ngwendi: “Kuma nji katali wa mu Juda ndi? Njinatwalelelaho kumwesa cizemo cije kucesi kutenguluka ku bakunjibo ya isho Saulu na bandolome bendi na babusamba bendi kweta na lelo lino, co kunjakutengulukilile na ku kwana mu liboko lya Devidi, kuma lelo unjisompesa mwafwa ya munakazi? 9 Njambi anjane kashitiko kakama nga kunjilingila Devidi byuma byanalisingile kumulingila Yehova ngwendi 10 anungulula bumwene kubutundisa mu njibo ya Saulu, na kukanyamesa litanda lya Devidi hali Isalele na hali Juda, kutunda ku Dani kweta ku Bele-sheba.” 11 Ishi-bosheti kakumbulwile Abina lalo, mwafwa wamuzibilile lyoba.

12 Oho bene Abina watumine tutumwa mangana bakehule Devidi ngwabo: “Eli lifuti lyapwa lyeya?” Watwaleleleleho kwendeka ngwendi: “Linga nange cikumiiyo, co njilinga mwoshe munjasela kwilwisa Baisalele boshe kuli yobe.” 13 Co wamukumbulwile ngwendi: “Mwamubwa, njilinga nobe cikumiiyo. Njikulomba lika ngwange keti wije kuno na kunjimona, kubanga nga wija na Mikali muna Saulu.” 14 Co Devidi watumine tutumwa kuli Ishi-bosheti muna Saulu mangana bakamuleke ngwabo: “Njane munakazi wange Mikali, uje injambatele na bikoba 100 bya ku bunalume bwa Bafilistiya.” 15 Ngeci Ishi-bosheti watumine banu bakamwambate kuli munalume wendi Palitiele muna Laishi. 16 Oloni munalume wendi wamukabele oku alila kuketa na ku Bahulimu. Co Abina wamulekele ngwendi: “Iluka.” Co welukile.

17 Kutundaho Abina watuminine bakulunu ba Isalele majwi ngwendi: “Munakala na kutonda ngweni Devidi apwe mwene yeni ha simbu yailaha. 18 Ngeci lingenimo, mwafwa Yehova walekele Devidi ngwendi: ‘Njipangesa ngamba yange Devidi mu kwamena banu bange Baisalele kuli Bafilistiya na ku bitozi babo boshe.’” 19 Kutundaho, Abina wasimutwiiye na Babenjamini. Co lalo Abina wakasimutwiiye na Devidi ku bushweke ku Hebroni na kumuleka bibalikumiiye Baisalele na bakunjibo ya Benjamini boshe.

20 Abina mwaile kuli Devidi ku Hebroni na banalume ba kupwa 20, Devidi wabwaheselele Abina na banalume bakele nendi cilika. 21 Ngeci Abina walekele Devidi ngwendi: “Njitabese njiye njikakungulwile Baisalele boshe kuli yobe shukulu yange mwene, mangana balinge nobe cikumiiyo, co upwa mwene wa Baisalele boshe ngwe muushakela.” Ngeci Devidi watabesele Abina aye, co waile mu kwoloka.

22 Oho bene bangamba ba Devidi na Joabu belukile kutunda kubaile na kufungulula, co banenele byuma byabingi bibapukwile. Ha simbu ei Abina te natundu laja kuli Devidi ku Hebroni mwafwa te namutabesa aye mu kwoloka. 23 Joabu na cibunga coshe ca maswalale mubetele, bamulekele ngwabo: “Abina muna Nele nezile kuli mwene, co namutabesa aye mu kwoloka.” 24 Ngeci Joabu waile kuli mwene na kumuleka ngwendi: “Bika biunalingi? Bananjileke ngwabo Abina nezile kuli yobe. Bika biunamwecelela aye mu kwoloka kwa kujeneka kumulingako bimo? 25 Uzibuka mwamubwa mwafwila Abina muna Nele, nezile lika na kukweseka mangana azibuke byuma byoshe biuli na kulinga nebi biunayongola kulinga.”

26 Co Joabu wasezele Devidi na kutuma tutumwa bakabe Abina, co bakamwilwisilile ha lisima lya Sira, oloni Devidi ikeye nabimo byahi byazibukile. 27 Abina mwelukile ku Hebroni, Joabu wamutwalele kumukulo ku cikolo ca nganda mangana akasimutwiye nendi. Oloni mwetele kuje, wamutibile mwimo, co watsile. Walingile ngoco mwafwa ya citela ca kutsiya ndolome yendi Asahele. 28 Devidi mwazibile ei ñanda wendekele ngwendi: “Yange na bumwene bwange kutwesi na mulonga kuli Yehova wa maninga a Abina muna Nele. 29 Mulonga ukale ha mutwe wa Joabu na bakunjibo ya ishe boshe. Mu njibo ya Joabu simbu yoshe mukakale munalume uje etisa byuma bimo ku bushwamwa bwendi nambe muka-mbumba nambe munalume uje azenga bwanda na limbambale* nambe uje andumuka ku mukwale nambe uje ajeneka byakulya.” 30 Ngeci Joabu na ndolome yendi Abishai batsiile Abina mwafwa watsiile ndolome yabo Asahele mu nzita ku Gibioni.

31 Co Devidi walekele Joabu na banu boshe bakele nendi ngwendi: “Tabuleni bizalo byeni na kuzala bikeleya na kulila Abina.” Mwene Devidi wakele na kwenda munima ya baje bambatele citalatala.* 32 Batsindile Abina mu Hebroni, co mwene walililile manene ha mbumbo ya Abina, co banu boshe balilile. 33 Mwene wembilile Abina mwaso wa busiwa ngwendi:

“Kuma Abina napande kutsa ngacije ngwe munu wa kujeneka mana ndi?

Unandumuka ngwe uje ibanandumuna bikenya.”

Co banu boshe bamulilile lalo.

35 Kutundaho, banu baile kuli Devidi na kukamuzembeleka mangana alye byakulya* mutanya, oloni Devidi walisingile ngwendi: “Njambi anjane kashitiko kakama nga njilya likende nameme cakulya coshe-coshe simbu kanda litangwa lilahuke.” 36 Banu boshe bamwene byalingile mwene, co byabazibisile kubwaha. Byabazibisile kubwaha ngwe mubyakele na kubazibisila kubwaha byuma byoshe byakele na kulinga. 37 Ngeci banu boshe na Baisalele boshe lije litangwa bazibukile ngwabo mwene keti ikeye watsiisile Abina muna Nele. 38 Co mwene walekele bangamba bendi ngwendi: “Kuma kumuzibuka ngweni lelo mu Isalele munatsi mwata, co lalo munu wa seho ndi? 39 Lelo njinazeye nameme bananjibwabesa kupwa mwene, co aba bana ba Zeluya banakenyuka manene, kunjibasa. Yehova alinge munu wamubi kwesekesa na bubi bwendi.”