Mukanda Wamucibali wa Samwele
9 Devidi wehwile ngwendi: “Kuma kuli umo nasalako ku bakunjibo ya Saulu uje injasa kumwesa cizemo cije kucesi kutenguluka mwafwa ya Jonathani ndi?” 2 Kwakele ngamba umo wa bakunjibo ya Saulu wa lizina lya Ziba. Ngeci bamusanenene kuli Devidi, co mwene wamwihwile ngwendi: “Ngwetu yobe Ziba ndi?” Wakumbulwile ngwendi: “Eyo, yange bene ngamba yobe.” 3 Mwene watwaleleleleho kumwihula ngwendi: “Kuma kucili umo nasalako ku bakunjibo ya Saulu uje injasa kumwesa cizemo ca Njambi cije kucesi kutenguluka ndi?” Ziba wakumbulwile mwene ngwendi: “Kucili muna Jonathani umo nasalako, natenguka mendi oshe abali.” 4 Mwene wamwihwile ngwendi: “Ali kuli?” Ziba wakumbulwile mwene ngwendi: “Ali mu njibo ya Makeya muna Amiele ku Lo-deba.”
5 Oho bene mwene Devidi watumine banu bakamwambate na kumutundisa ku njibo ya Makeya muna Amiele ku Lo-deba. 6 Mefibosheti muna Jonathani, Jonathani muna Saulu mwezile kuli Devidi, oho bene watsikamene na kukulamena hasi. Co Devidi wendekele ngwendi: “Mefibosheti!” co wamukumbulwile ngwendi: “Ngamba yobe uno.” 7 Devidi wamulekele ngwendi: “Keti uzibe lyoba mwafwa njikumwesa cizemo cije kucesi kutenguluka mwafwa ya isho Jonathani, co njikwilwisila libu lyoshe lya kuku yobe Saulu, co lalo ulila* ku mesa yange simbu yoshe.”
8 Ngeci watsikamene na kukulamena hasi na kwendeka ngwendi: “Ngamba yobe iyajo, mangana wake mbunge* yange katali wa kutsa?” 9 Mwene watumine bamo bakasane Ziba muka-kupangela Saulu, co wamulekele ngwendi: “Byuma byoshe bije byapwile bya shukulu yobe Saulu na bakunjibo yendi boshe njibyana mutekulyendi. 10 Umulimina-limina yobe na bana bobe na bangamba bobe, co mukungulula bimunalimi mangana bakunjibo ya mutekulya shukulu yobe bakale na byakulya. Oloni Mefibosheti mutekulya shukulu yobe alila ku mesa yange simbu yoshe.”
Ziba wakele na bana ba banalume 15 na bangamba 20. 11 Co Ziba wakumbulwile mwene ngwendi: “Ngamba yobe alinga byoshe byanamushiki shukulu yendi mwene ngwendi alinge.” Ngeci Mefibosheti wakele na kulila ku mesa ya Devidi ngwe mwa bana ba mwene. 12 Mefibosheti nendi wakele na mwana wa munalume wa mwanike wa lizina lya Maika, co boshe baje bakele mu senge ya Ziba bapwile bangamba ba Mefibosheti. 13 Co Mefibosheti wayoyele mu Jelusalema, mwafwa simbu yoshe wakele na kulila ku mesa ya mwene. Wapwile wa kutenguka mendi oshe abali.