Mukanda Wamucibali wa Samwele
8 Mu kwita kwa simbu, Devidi wahyanene Bafilistiya na kubafungulula, co Devidi wanyekele Bafilistiya mwela wa Methegi-ama.
2 Wahyanene Bamowabi, co wabalangekele hasi na kubaseteka na mukole. Wasetekele mikana ibali ya banu babatsiya na mukana umo wa mutunu wa baje bayoya. Ngeci Bamowabi bapwile bangamba ba Devidi, co bamunenelele milambu.
3 Devidi wahyanene Hadadiza muna Lehobu mwene wa Zoba omwo Hadadiza wakele na kuya na kuzameka lalo ciyulo cendi ku Ndonga ya Yufreti. 4 Devidi wakwatele baka-kulonda tubalu ba kupwa 1,700 na maswalale ba kwenda ha mendi 20,000 ba Hadadiza. Devidi watetele mishisha ya ku mendi ya tubalu boshe baje bakele na kukoka matemba, co wasezeleho lika ba kupwa 100.
5 Baka-Siria ba mu nganda ya Damasika mubezile na kukwasa Mwene Hadadiza wa Zoba, Devidi watsiile baka-Siria 22,000. 6 Kutundaho, Devidi wakele bibunga bya maswalale mu nganda ya Damasika mu Siria, co baka-Siria bapwile bangamba ba Devidi, co bamunenelele milambu. Yehova walingisile Devidi ahyane* kwoshe kwakele na kuya. 7 Mukemwo Devidi wanyekele bangamba ba Hadadiza bintelo bya goudi bya muzenguluke na kubinena ku Jelusalema. 8 Mwene Devidi wambatele kopa yaingi mu Beta na mu Belotha bije byapwile binganda bya Hadadiza.
9 Mwene Toi wa Hamathi wazibile ngwabo Devidi nahyana cibunga coshe ca maswalale ba Hadadiza. 10 Ngeci, Toi watumine munendi Jolamu kuli Mwene Devidi mangana akamwihule ciindu cendi na kumushangala mwafwa ya kulwisa Hadadiza na kumuhyana (mwafwa Hadadiza walwisile Toi ha bisimbu byabingi). Toi watwalelelele Devidi byuma bya siuva na goudi na kopa. 11 Mwene Devidi wabijelesele na kubyana kuli Yehova hamolika na siuva na goudi byajelesele bije byatundile kuli baka-mafuti boshe baafungulwile, 12 bije byatundile ku Siria na ku Mowabi, bije byatundile kuli Baamoni na Bafilistiya na Baamaleki na byuma byapukwile kuli Hadadiza muna Lehobu mwene wa Zoba. 13 Co lalo lizina lya Devidi lyatsimanene mwelukile kutunda na kutsiya Baedomu 18,000 mu Cingulunga ca Mwongwa. 14 Wakele bibunga bya maswalale mu Edomu. Mu Edomu mwoshe wakelemo bibunga bya maswalale, co Baedomu boshe bapwile bangamba ba Devidi. Yehova walingisile Devidi ahyane* kwoshe kwakele na kuya.
15 Devidi watwaleleleleho kuyula Isalele yoshe, co Devidi wakwile banu bendi boshe mwamubwa na mu kusungama. 16 Joabu muna Zeluya wakele na kutwamenena maswalale, co Jehoshafati muna Ahiludi wapwile muka-kunyunga mizimbu. 17 Zadoki muna Ahitubu na Ahimeleki muna Abiatha bapwile tupilistu, co Selaya wapwile muka-kusoneka. 18 Benaya muna Jehoyada wakele na kutwamenena Bakeleti na Bapeleti, co bana ba Devidi bapwile bamyata.*