Mukanda Wamucibali wa Samwele
13 Abisalomu muna Devidi wakele na ndokazi yendi wa lizina lya Tamala uje wapwile wamubwa, co Amunoni muna Devidi wamuzemene. 2 Amunoni wakele manene mu bishoti, co wabinjile na kubinja mwafwa ya ndokazi yendi Tamala, mwafwa te kanda alilaleho na munalume, co kwasholokele ngwe byahi byasa kulinga Amunoni kuli ikeye. 3 Amunoni wakele na kabusamba wa lizina lya Jehonadabu muna Shimeyaha ndolome ya Devidi, co Jehonadabu wapwile munalume wa kunyanyama manene. 4 Ngeci wamwihwile ngwendi: “Bika bikakulingisa ukale manene mu bishoti yobe muna mwene mutondo na mutondo? Bika kuunjilekela?” Amunoni wamukumbulwile ngwendi: “Njinazeme Tamala ndokazi ya ndolome yange Abisalomu.” 5 Jehonadabu wamukumbulwile ngwendi: “Lala ha mwela wobe na kulikwisa ngwe uli na kubinja. Isho mwaija na kukumona, umuleke ngwobe, ‘Shukulu-kambu tabesa ndokazi yange Tamala aije na kunjibwahesela byakulya. Nga anjibwahesela byakulya byanapande kulya mubezi* oku njilimwena, co njibilila mu liboko lyendi.’”
6 Ngeci Amunoni walalele ha mwela wendi na kulikwisa kubinja, co mwene wezile na kumumona. Co Amunoni walekele mwene ngwendi: “Shukulu-kambu tabesa ndokazi yange Tamala aije na kunjocela makende abali aje asholoka ngwe mbunge ha mesho ange mangana njilile byakulya mu liboko lyendi.” 7 Ngeci Devidi watumine muzimbu kuli Tamala ngwendi: “Ya ku njibo ya ndolome yobe Amunoni ukamubwahesele byakulya.” 8 Ngeci Tamala waile ku njibo ya ndolome yendi Amunoni kuje kwalalele. Wambatele fulawa ya kutika na kumunga makende ha mesho endi, co wocele owo makende. 9 Kutundaho wambatele cikango na kumwanawo. Oloni Amunoni wabyanene kulya, co wendekele ngwendi: “Mubaboshe tundeni muno!” Co boshe bakelemo bamusezele.
10 Amunoni walekele Tamala ngwendi: “Njinenele byakulya mu mulili wange wa kulala mangana njibilile mu liboko lyobe.” Ngeci Tamala wambatele makende ocele aje asholokele ngwe mbunge na kuwatwalela ndolome yendi Amunoni ku mulili wendi wa kulala. 11 Mwamunenelelewo ngwendi alye, wamukwatele na kumuleka ngwendi: “Ija ulilale nange ndokazi yange.” 12 Oloni wamulekele ngwendi: “Embwe ndolome yange, keti unjishawise, mwafwa cuma ca cifwoco kubesi kucilinga mu Isalele. Keti ulinge cuma ca shwamwa ngoco. 13 Njasa kuyoya bati na shwamwa yange? Co lalo bakumona kupwa umo wa banalume ba kujeneka mana mu Isalele. Ngeci shukulu-kambu simutwiya na mwene, mwafwa kabyana kunjana kuli yobe.” 14 Oloni Amunoni katolililile Tamala, ngeci wamupikile na kumushawisa mwafwa wamuhyanene ku nzili. 15 Kutundaho Amunoni washangumukile kuzinda manene Tamala, co cizindo cendi kuli ikeye catubakanene cizemo cakele naco kuli ikeye. Amunoni walekele Tamala ngwendi: “Katuka uye!” 16 Co Tamala wamukumbulwile ngwendi: “Embwe ndolome yange, mwafwa kunjisheka kunabihya manene kutubakana byuma biunalingi kuli yange!” Oloni kamutolililile.
17 Co wasanene muka-kumupangela wa mukwenje na kumuleka ngwendi: “Tundisa ou munu muno na kupata ku cikolo mwatuhuka.” 18 (Tamala wazalele mukanjo wa kulitila, mwafwa bikebyo bizalo bibakele na kuzala bana ba mwene ba banakazi baje kanda balilaleho na banalume.) Co muka-kupangela Amunoni wamutuhwisile hanja na kupata ku cikolo. 19 Co Tamala walishawilile lito ku mutwe na kutabula mukanjo wendi waubwa wazalele, co walikwatele mbimbi-mutwe na kwenda oku alila.
20 Ndolome yendi Abisalomu mwamumwene wamwihwile ngwendi: “Ndolome yobe Amunoni uje nakala nobe ikeye nalingi ebi ndi? Oloka ndokazi yange, ndolome yobe uje. Keti wake mbunge ku byuma binalingiwa.” Kutundaho Tamala wakele ku njibo ya ndolome yendi Abisalomu, co kasholokele ku banu. 21 Mwene Devidi mwazibile byoshe ebi, walubalele manene. Oloni kashakele kuzibisa munendi Amunoni kubabala ku mbunge, omwo wamuzemene mwafwa ikeye wapwile munendi wa ntwatwa. 22 Co Abisalomu kalekele Amunoni byuma byoshe-byoshe, ipwe byabibwa nambe byabibi, mwafwa Abisalomu wazindile Amunoni mwafwa washawisile ndokazi yendi Tamala.
23 Munima ya myaka ibali ya mutunu, baka-kutehula bimanga ba Abisalomu bakele ku Bale-haza kuyehi na Efremu, co Abisalomu walanyele bana ba mwene boshe ba banalume. 24 Co Abisalomu wezile kuli mwene na kumuleka ngwendi: “Ngamba yobe atehwisa bimanga bendi. Ngeci, njilomba mwene na bangamba bendi baye nange.” 25 Oloni mwene walekele Abisalomu ngwendi: “Embwe munange, nga tubaboshe tuya, co tupwa citele kuli yobe.” Nameme watwaleleleleho kumulambelela ngwendi aye, katabele kuya, oloni wamubezikisile. 26 Ngeci Abisalomu walekele mwene ngwendi: “Nga yobe kuui, tabesa ndolome yange Amunoni aye netu.” Mwene wamukumbulwile ngwendi: “Bika byanapande kuila neni?” 27 Oloni Abisalomu wamulambelelele, ngeci mwene wasunwine bana bendi boshe ba banalume na Amunoni.
28 Co Abisalomu washikile baka-kumupangela ngwendi: “Kengeseseni, co Amunoni mwapenda binyu, njimileka ngwange, ‘Tsiyeni Amunoni!’ Munapande kumutsiya. Keti muzibe lyoba. Kuma keti yange njinamishiki ndi? Kanyameni na kupwa ba kusimpa.” 29 Ngeci baka-kupangela Abisalomu batsiile Amunoni ngwe mwabashikilile Abisalomu, co bana ba mwene bakwabo boshe ba banalume bakatukile, umo na umo wabo walondele ha donki yendi na kutewa. 30 Simbu bacikele mu ngila, Devidi bamulekele ngwabo: “Abisalomu natsii bana ba mwene ba banalume boshe, co naumo wahi noboka.” 31 Mwene mwazibile ngoco, wakatukile na kutabula bizalo byendi na kulala hasi, co bangamba bendi boshe bemanene kumukulo wendi oku nabo banatabula bizalo byabo.
32 Oloni Jehonadabu muna Shimeyaha ndolome ya Devidi, wendekele ngwendi: “Shukulu yange keti asinganyeke ngwendi bana ba mwene boshe ba banalume banabatsii. Amunoni lika ikeye natsi. Abisalomu ikeye nashikile ngwendi bamutsiye. Wayongwele kulinga ngoco kushwa litangwa lyashawisile Amunoni ndokazi yendi Tamala. 33 Ngeci shukulu yange mwene keti atolilile ku muzimbu ubanamuleke ngwabo, ‘Bana ba mwene ba banalume boshe banatsi.’ Amunoni lika ikeye natsi.”
34 Ha simbu ei Abisalomu watewele. Co kanyungi mwandwile mesho, wamwene banu babangi bali na kwija mu tapalo kunima yendi kuyehi na munkinda. 35 Co Jehonadabu walekele mwene ngwendi: “Tala! Bana ba mwene baneluka. Kunafu ngwe muje bene mwanendekelele ngamba yobe.” 36 Mwamanesele kwendeka, bana ba mwene betele oku bali na kulila mu kutambeka, co mwene na bangamba bendi boshe nabo balilile manene. 37 Oloni Abisalomu watewelele kuli Taumai muna Amihudi mwene wa Gesha. Devidi walilile munendi ha matangwa amangi. 38 Abisalomu mwatewele na kuya ku Gesha, wakakeleko myaka itatu.
39 Mamaneselelo Mwene Devidi washungwiiye kuya kuli Abisalomu, mwafwa busiwa bwa kutsisa Amunoni te bwashangumuka kuhwa.