Mukanda Wamucibali wa Samwele
20 Kwakele munalume umo wa mbundunwina wa lizina lya Sheba muna Bikilai wa Kabenjamini. Wohyesele limbinga na kwendeka ngwendi: “Kutwesi na mutamba muli Devidi, co kutwesi na buswana kuli muna Jesi. Eni Baisalele, munu na munu aye ku binjambi bendi!” 2 Banalume boshe ba mu Isalele becelele kukabangeya Devidi na kushangumuka kukabangeya Sheba muna Bikilai. Oloni banalume ba mu Juda bakabangeyeye mwene yabo kutunda ku Jodani kweta ku Jelusalema.
3 Mwene Devidi mwetele ku njibo* yendi mu Jelusalema wambatele baje banakazi bendi bakwabo ba kupwa 10 basezele ngwendi banyunge lipela na kubaka mu njibo ibakele na kunyunga. Wakele na kubana byakulya, oloni kakele na kulilala nabo. Batwaleleleleho kukala omwo mu njibo na kuyoya ngwe bifwile kweta noho habatsililile, nameme bakele na munalume uje wacikele na kuyoya.
4 Mwene walekele Amasa ngwendi: “Sana banalume ba mu Juda baije kuno boshe mu matangwa atatu, co nobe unapande kwakukalako.” 5 Ngeci Amasa waile na kusana banalume ba mu Juda, oloni wakotokelele, co kezile ha simbu ibamulekele. 6 Co Devidi walekele Abishai ngwendi: “Sheba muna Bikilai nasa kutulinga mwamubi manene kutubakana mwanatulingilile Abisalomu. Ambata bangamba ba shukulu yobe mumukabe mangana keti awane binganda bibananyungilila na kubandamo.” 7 Co banalume bakele na Joabu na Bakeleti na Bapeleti na banalume boshe ba nzili bamukabele. Bakatukile mu Jelusalema na kukaba Sheba muna Bikilai. 8 Mubetele muyehi na limanya lyakama mu Gibioni, Amasa wabasheshele. Joabu wakele na mukwale uje washwelele mu cindalo cawo ha mbunda. Mwashwenene kulutwe, owo mukwale wawile.
9 Joabu wehwile Amasa ngwendi: “Ikeyeni uli bwino ndolome yange?” Co Joabu wakwatele Amasa ku munjezi na liboko lyendi lya cilyo ngwe uje ashaka kumutsemba. 10 Amasa kakele mbunge ku mukwale wakele mu liboko lya Joabu, co Joabu wamutibilewo ha lifu, co mila yendi yacapulukile na kuwila hasi. Kamutibile lubali, lumolika bene, co wangambu. Kutundaho, Joabu na ndolome yendi Abishai bakabele Sheba muna Bikilai.
11 Umo wa bakwenje ba Joabu wemanene kuyehi na Amasa na kwendeka ngwendi: “Woshe ali ku mutamba wa Joabu na woshe ali ku mutamba wa Devidi akabangeye Joabu!” 12 Ha simbu yoshe ei, Amasa wakele na kulyalanga mu maninga endi hakati ka ngila. Uje mukwenje mwamwene ngwendi banu boshe bakele na kwimana hakele na kulyalangela Amasa, wamutundisile mu ngila na kumushwenesa mu shwata, co wamufwikile cizalo mwafwa wamwene ngwendi banu boshe bakele na kwimana mubakele na kweta haje hakele. 13 Mwamutundisile mu ngila, banalume boshe bakabangeyeye Joabu na kuya na kusheka Sheba muna Bikilai.
14 Sheba wetile mu mitambela yoshe ya miyati ya Isalele kuketa na ku Abele ya Bethi-maka. Babikilai balikungulwile, co nabo bamukabele.
15 Joabu na banalume bakele nendi bezile na kuzengeleka nganda ibasanene ngwabo Abele ya Bethi-maka muje mwabandele Sheba, co balundwilile ei nganda lilundu lya kuilwisila mwafwa yakele mukati ka libu libailundwilile, co banalume boshe baje bakele na Joabu bakele na kwinda cibumbe cayo mangana bacisiule. 16 Munakazi umo wa mana watambekele mu nganda ngwendi: “Njitolilileni eni banalume, acinjitolilileni! Shukulu-kambu lekeni Joabu ngweni aije kuno mangana njakusimutwiye nendi.” 17 Ngeci Joabu washwenene muyehi na uje munakazi, co uje munakazi wendekele ngwendi: “Ngwetu yobe Joabu ndi?” Wamukumbulwile ngwendi: “Yange.” Co uje munakazi wendekele ngwendi: “Tolilila ku majwi anjendeka yange ngamba yobe.” Wamukumbulwile ngwendi: “Endeka tuzibe.” 18 Uje munakazi watwaleleleleho kwendeka ngwendi: “Kusañulu, banu mubakele na bukalu, bakele na kwendeka ngwabo, ‘Balombe bukwasi mu Abele,’ co hakeho habwakele na kuhwila bukalu. 19 Njili na kwimanena banu baje bashaka kwoloka, co lalo ba kulongwa mu Isalele. Mutonda kubiisa nganda ije inapu ngwe cisemi wa munakazi mu Isalele. Bika bimunyongesela* buswana bwa Yehova?” 20 Joabu wakumbulwile ngwendi: “Kunjishaka kuibiisa nambe kuinyongesa. 21 Obyo keti bikebyo binjishaka kulinga. Munalume umo wa lizina lya Sheba muna Bikilai wa ku mutambela wa malundu wa Efremu natengulukila Mwene Devidi. Nga munjana ou munalume, njiseza ei nganda.” Uje munakazi walekele Joabu ngwendi: “Tala! Bakumbilila mutwe wendi helu lya cibumbe!”
22 Oho bene uje munakazi waile na kuleka banu boshe mu nganda, co batetele mutwe wa Sheba muna Bikilai na kuwashela Joabu. Ngeci Joabu wohyesele limbinga, co banu balishandokele kutunda ku nganda, umo na umo wabo welukile ku njibo yendi. Co Joabu welukile ku Jelusalema kuli mwene.
23 Joabu ikeye wapwile ntwama ya maswalale boshe ba Isalele, co Benaya muna Jehoyada wakele na kutwamenena Bakeleti na Bapeleti. 24 Adolamu ikeye wakele na kutwamenena baje bakele na kupanga bipangi bya kubasindiya, co Jehoshafati muna Ahiludi wapwile muka-kunyunga mizimbu. 25 Sheva wapwile muka-kusoneka, Zadoki na Abiatha bapwile tupilistu. 26 Co Ila muka-Jaile nendi wapwile mukulunu wa baka-kupangela* Devidi.