Mukanda Wamucibali wa Samwele
22 Co Devidi wembilile Yehova ou mwaso ha litangwa lyamwamenene Yehova ku bitozi bendi boshe na kuli Saulu. 2 Wembile ngwendi:
“Yehova ikeye limanya lyange na cimpaka cange, Uje anjamena.
3 Njambi yange ikeye limanya lyange kuje kunjitewela,
Ikeye ntelo yange na limbinga* lyange lije linjobola,* ikeye butewelo bwange bwa kukola,
Co ikeye mwela wange kunjitewela, mwobole wange, yobe unjobola ku bukenya.
4 Njitambeka kuli Yehova uje ibanapande kushangazala,
Co anjobola ku bitozi bange.
5 Mankimba a butsi anjizengelekele.
Banalume bangoco baje bapwile ngwe mema a libazi banjijujwisile.
6 Mikole ya Cihilo* yanjizengazengele,
Miheto ya kutsa yanjikwatele.
7 Njatambekele kuli Yehova munjakele mu bukalu,
Njatwaleleleleho kutambeka kuli Njambi yange,
Wazibile lijwi lyange oku ali mu tempele yendi,
Co kulila kwange kwa kulomba bukwasi kwetele mu matwi endi.
8 Lifuti-libu lyashangumukile kuninganga na kujaja,
Lubula lwa melu lwajajele
Na kuninganga mwafwa walubalele.
9 Bwisi bwatuhukile mu majulu endi,
Tuhya tuje tunyongesa twatundile mu kanwa kendi,
Manungu a tuhya atundile kuli ikeye.
10 Wajendamesele melu mwasikumukile,
Co mwisi ya bilyato byendi mwakele lisusulungu lyakama.
11 Walondele ha kerubi na kwija oku apulula.
Washolokele ha mambaba a kangelo.*
12 Co walizengelekele lisusulungu ngwe lipapela,
Walizengelekele lisusulungu lya mema a kuzibala na mashelwa a kuhima.
13 Mu ceke cakele halutwe lwendi mwatundile manungu a tuhya.
14 Co Yehova washangumukile kuluma mwilu,
Wahakamwa Manene walingisile lijwi lyendi balizibe.
15 Washele mikili yendi na kubashandola,
Watumine muhyato wendi, co wabatanganesele.
16 Masima a kalunga-ndonga asholokele,
Lubula lwa lifuti-libu lwezile hashandangala mwafwa ya kutenuka kwa Yehova,
Na mwafwa ya butenu bwa muku wa mu majulu endi.
17 Wolwele liboko lyendi oku ali mwilu,
Wanjikwatele na kunjijabulula ha nzinga.*
18 Wanjamenene ku citozi cange wa nzili,
Kuli baje banjizinda, baje bakele na nzili kunjitubakana.
19 Banjikatukilile ha litangwa linjakele mu bukalu,
Oloni Yehova wanjikwasele.
20 Wanjinenele mu mwela wa kujeneka bushonde,
Wanjamenene mwafwa njamubwasele.
21 Yehova anjana cikandelela kwesekesa na kusungama kwange,
Anjifweta kwesekesa na kujeneka mulonga* kwa maboko ange.
22 Mwafwa njinanyungu bingila bya Yehova,
Co kunjalingile bubi bwa kuseza Njambi yange.
23 Mashiko endi oshe ali halutwe lwange,
Kunjiseze mashiko endi.
24 Njitwalelelaho kukala kwa kujeneka mulonga ku mesho endi,
Na kutwalelelaho kulinyunga ku bubi.
25 Yehova anjifwete kwesekesa na kusungama kwange,
Na kwesekesa na kujeneka mulonga kwange ku mesho endi.
26 Ku munu wa kulongwa, nobe upwa wa kulongwa,
Ku munu wa kujeneka ha kumupayela, nobe umwesa ngwobe kuwesi naha ha kukupayela.
27 Ku munu wa kujela, umwesa kujela kwobe,
Oloni ku munu wa kupengapenga, umwesa kunyanyama kwobe.
28 Mwafwa ukobola banu ba kulikehesa,
Oloni banu ba kulyalesa kubesi kukubwasa muukabatala, co ukabakehesa.
29 Mwafwa yobe, obe Yehova, yobe ndeya yange,
Yehova ikeye akanjitwila ceke mu lisusulungu.
30 Njasa kuhyana cibunga ca bikenya mwafwa ya bukwasi bwobe.
Mu nzili ya Njambi njasa kulonda cibumbe.
31 Ngila ya Njambi wa busunga yapwa ya kulumbunuka,
Majwi a Yehova apwa a kujela.
Wapwa ntelo ya baje boshe batewela kuli ikeye.
32 Kuma kuli Njambi atubakana Yehova ndi?
Kuma kuli limanya litubakana Njambi yetu ndi?
33 Njambi wa busunga ikeye mwela wange wa kubanda wa kukola,
Co alingisa ngila yange ipwe ya kulumbunuka.
34 Akalingisa mendi ange apwe ngwe a ntaba,
Akanjilingisa njimane ha myela ya kulunduka.
35 Akalongesa maboko ange mwakulwila nzita,
Maboko ange asa kunana* buta bwa lusipa bwa kopa.
36 Wanjana ntelo yobe ya kwobola,
Co kulikehesa kwobe kunjamesa.
37 Wamesa ngila ya myanja yange,
Mendi* ange kuwasenutuka.
38 Njikaba bitozi bange na kubanyongesa,
Kunjiluka, kubanga njabanyongesa boshe njwa.
39 Njikabatika na kubazilula mangana keti base kwimana,
Njikabalyatangela na mendi ange.
40 Ukanjana nzili ya kulwa nzita,
Ukawisila bitozi bange ku mendi ange.
42 Bakalili mangana babakwase, oloni wahi akabobola,
Bakalilila na kuli Yehova, oloni kesi kubakumbulula.
43 Njibatwa bapwe ngwe likungu lili hasi,
Njibatika na kubalyatangela ngwe mandoba ali mu bitapalo.
44 Unjamena ku banu bange baje bashaka kunjiwanena mulonga.
Unjinyungilila mangana njipwe ntwama wa baka-mafuti,
Banu baje kunjizibuka bakanjipangela.
45 Banu ba ku mafuti eka bakaija kuli yange oku bajaja,
Byuma bibakaziba hali yange bikabalingisa banjononoke.
46 Banu ba ku mafuti eka bakalijujukila,*
Bakaija oku bajaja kutunda ku myela yabo ya kubanda.
47 Yehova ali na kuyoya! Tushangazaleni Limanya lyange!
Njambi limanya lyange uje akanjobola bamuzumbangeye.
48 Njambi wa busunga akanjilingilako shambandinga,
Akaka miyati ya banu mwisi yange.
49 Akanjamena ku bitozi bange.
Ukanjaka helu lya baka-kunjilwisa,
Ukanjobola ku munu wa cikenya.
50 Obe Yehova, mukemwo njikukandelela mukati ka baka-mafuti,
Co njimba myaso ya kushangazala lizina lyobe.
51 Akalingila mwene yendi bilinga byakama bya kwobola,
Akamwesa wakubwabesa wendi cizemo cije kucesi kutenguluka,
Akabilingila Devidi na munendi* myaka yoshe.”