Valyanene na Vimbunge Vyavo Vyoshe mu Myanmar

“VIMBUTO vinatumu, oloni vaka-kuteja vavandondo. Ngechi vene, lombeleni kuli vavenya vimbuto ngechi atume vaka-kuteja vimbuto vyendi.” (Luka 10:2) Awa majwi endekele Yesu myaka 2,000 kunima, ali na kulishulithilila mu Myanmar. Mwafwa vika? Mu Myanmar mwakala vanu va kupwa 55 milyoni, cho mwakala lika vaka-kwambulula va kupwa 4,200.

Oloni Yehova uje wapwa “Vavenya vimbuto” nashongangeya vandolome na vandokathzi vavangi vatunde mu mafuti avo na kuya oku ku lifuti lyakala mu Asia, mangana vakakwathe ku chipangi cha kuteja cha ku sipilitu. Vika vyavalingithile vatunde mu mafuti avo? Vavakwathele vati mangana vaye ku lifuti lyeka? Cho vivethzikitho muka vivali na kulikuwa ano matangwa? Tuchithziveni vyavingi.

“IJENI KUNO TUCHITONDA VAPAINIYA VAVANGI”

Mu myaka ya kunima, Kazuhiro, painiya wa ku Japan, wavinjile mushongo wa kushinya, walethzumukile, cho vamutwalele ku chipatela. Ndotolo wamulekele ngwendi kapandele kwendetha minyau ha myaka ivali. Kazuhiro wathzeyele muvamulekele ngocho. Ngechi, walihwile ngwendi ‘njatha kutwalelelaho vati na chipangi change chinjathzema cha vupainiya?’ Walombelele manene kuli Yehova mangana amukwathe kuwana ngila ya kutwalelelaho na chipangi chendi cha vupainiya.

Kazuhiro wendekele ngwendi: “Munima ya ngonde imo, kavuthamba kange uje wakele na kupangela ku Myanmar wathzivile vukalu vunjakele navwo. Wanjituminine foni na kunjileka ngwendi kuno ku Myanmar vanu vakapangetha manene mbasi mu kwenda. Nga wija kuno, cho wakutwalelelaho na chipangi chove cha kwambulula nameme kuwethi na munyau. Ngechi, njalombele ndotolo yange mangana anjitavethe kuya ku Myanmar. Uje ndotolo wanjikumbulwile ngwendi: ‘Muka-kutala vya vwongo wa ku Myanmar ali na kwija kuno vene ku Japan. Njimuleka vya vukalu vwove. Nga ou mushongo ukakuwana lalo, cho akakukwatha.’ Vyuma vyanjilekele uje ndotolo vyamwethele ngwavyo Yehova na kumbulula lilombelo lyange.”

Kazuhiro watumine muthzimbu ku munango wa ku Myanmar na kuvaleka ngwendi ikeye, hamo lika na munakathzi wendi vali na lishungu lya kupanga chipangi cha vupainiya muje mu lifuti. Munima ya matangwa atanu, munango wavakumbulwile ngwawo: “Ijeni kuno, tuchitonda vapainiya vavangi.” Kazuhiro na munakathzi wendi Mari, valandethele minyau yavo na kutambula mapapelo a kuvatavetha kuya mu lifuti lyeka na kulanda matikiti a kulonda mu fulai. Ano matangwa, vali na kulikwatathana na chivunga cha tuveveve cha mu Mandalay. Kazuhiro wendekele ngwendi: “Vyuma vitwaliwanene navyo vyatulingithile tukulahele manene chikulahetho cha Njambi chije chili ku Myatho 37:5, cha kwendeka ngwacho: ‘Kundika ngila yove kuli Shukulu Kalunga, kulahela kuli ikeye, cho akakukwatha.’”

YEHOVA WATUKWATHELE

Mu 2014, Vakaleho va Yehova va mu Myanmar vavethzikile kukala na chiwano cha mutambela cha kulitila. Vanu vavangi va ku mafuti eka vethzile oku ku chiwano. Umo wavo wapwile ndokathzi Monique wa myaka 34 wa ku United States. Ou ndokathzi wendekele ngwendi: “Munjatundile kuje ku chiwano, njalombelele kuli Yehova mangana anjikwathe kuthzivuka vinjinapande kulinga mu vuyoye vwange. Njathimutwiyiye lalo na vithemi vange ha vilengo vyange vya ku sipilitu. Nange na vithemi vange twamwene ngwetu njinapande kwiluka ku Myanmar, oloni kwetile thimbu yakama, cho lalo njalombelele manene kuli Njambi mangana anjikwathe kwangula mwamuvwa vya kulinga.” Monique wendekele vyuma vyamulingithile alinge ngocho.

“Yesu washongangeyeye vaka-kumukavangeya ngwendi vanapande ‘kumona indi vali na vimbongo vya kumanetha vipangi vyavo.’ Ngechi, njalihwile ngwange: ‘Njatha kukapangela ku lifuti lyeka ndi? Njikatha kuwana vya kulikwatha navyo ku muvila na kujeneka kuvihithila thimbu yaingi ku vipangi vya ku muvila ndi?’” Monique wendekele lalo ngwendi: “Njanangukile ngwange kunjakele na vimbongo vya kupwamo vya kuya navyo ku lifuti lyeka.” Cho chuma muka chamukwathele mangana aye ku lifuti lyeka?—Luka 14:28.

Monique wendekele ngwendi: “Litangwa limo mukulunu wa ku vipangi wanjithanene. Njalishoshomwenene manene mwafwa njathinganyekele ngwange hamo anjitunditha vipangi. Oloni uje mukulunu, wakandelelele ku vipangi vinjakele na kulinga. Cho wanjilekele ngwendi kuli vwana vumo vwananjivwahethela, cho wanjanene vimbongo vije vyanjikwathele mu vukalu vunjakele navwo ha thimbu oyo.”

Monique napangela mu Myanmar kushwa mu December 2014. Akalithzivi vati ha kupangela kuje kuli vujene vwakama vwa vaka-kwambulula? Wendekele ngwendi njavwahelela manene kukala kuno. Njili na kutwamenena vilongetha vitatu vya Mbimbiliya. Munu umo injili na kulilongetha nendi Mbimbiliya ali na myaka 67. Munjikai ku njuvo yendi akanjitambula mwamuvwa na kunjimwethwila na kunjivumbatela. Omwo walilongethele ngwendi lithzina lya Njambi ikeye Yehova, wathotwele mithothzi. Wendekele ngwendi: “Olu lukelwo lwa kulivanga kuli yange kuthziva ngwavo lithzina lya Njambi ikeye Yehova. Nameme unapu u mwanike kuli yange, oloni unanjilongetha chuma cha theho manene chije kanda njichithziveho.’ Nange njathotwele mithothzi. Vyuma vya chifwa echi vikalingitha munu uje apangela kuje kuli vujene vwakama alikuwe chipangi chendi.” Monique wavethzikile kukakovela mu Sikola ya Vaka-Kwambulula vya Vumwene.

Mithzimbu ya mu livulu lya Yearbook of Jehovah’s Witnesses lya mu 2013 ije yathimutwiyiye ha lifuti lya Myanmar yashongangeyeye vavangi kukapangela kuje ku lifuti. Ndokathzi Li, uje ali na myaka ya kutuvakana 30 wakala ku Southeast Asia. Ou ndokathzi wakele ha vipangi, oloni muthzimbu watandele mu Yearbook wamushongangeyeye kukapangela ku Myanmar. Wendekele ngwendi: “Munjakele ku chiwano cha mutambela cha kulitila ku Yangon mu 2014, njaliwanene na vaka-kulyambata vamo vaje vali na kupangela ku vujene mu kukwatha chivunga chije chikapangetha ndaka ya Chainizi mu Myanmar. Njalyangwilile kuya ku Myanmar na kukwatha chije chivunga mwafwa njathzivukile kwendeka ndaka ya Chainizi. Njathimutwiyiye na Monique, cho twaile hamo ku Mandalay. Yehova wakatuvethzikithile kuwanako tu vipangi tumo twa kulongetha ha sikola imo lika, cho twawanene na njuvo ya kukala. Njili na kulikuwa chipangi change kuno, nameme kushaluke nambe kutonole. Vanu va mu Myanmar vayoya yoyethi yayathi, cho vapwa vanu va kuthzituka mu kutolilila ku muthzimbu wauvwa. Njavwahelela manene kumona Yehova mwali na kuthzambwithilamo chipangi chendi. Njalimwena ngwange Yehova ikeye wayongwele ngwendi njikale kuno ku Mandalay.

YEHOVA AKATOLILILA KU MALOMBELO

Vaka-kupangela kuje kuli vujene vanalimwena ndthzili ya lilombelo. Tuchithimutwiyeni hali Jumpei, wa myaka 37 na mwevwendi Nao, wa myaka 35. Vakele na kupangela mu chikungulukilo cha tuveveve cha ku Japan. Vika vivajalukilile ku Myanmar? Jumpei wendekele ngwendi: “Nange na mwevwange twakele na chilengo cha kukapangela kuje kuli vujene mu lifuti lyeka. Ndolome umo itwakele nendi mu chikungulukilo chetu cha tuveveve mu Japan nendi wajalukilile ku Myanmar. Nameme twakele na vimbongo vyavindondo, oloni mu ngonde ya May 2010, netu twajalukilile ku Myanmar. Vandolome na vandokathzi va ku Myanmar vakatutambwile mwamuvwa.” Jumpei akalithzivi vati kwambulwila tuveveve va mu Myanmar? Wendekele ngwendi: “Tuveveve vakavwahelela manene kuthimutwiya navo. Mutukavamwetha mavindiyo a tuveveve, vakakathama manene. Twavwahelela manene kujalukila kuno mu kupangela Yehova.”

Jumpei na Nao valingile vati omwo vimbongo vivakele navyo vyahwile? Jumpei wendekele ngwendi: “Munima ya myaka itatu, vimbongo vyetu vyoshe vyahwile, cho kutwakele na vikwavo lalo vya kufwetela njuvo mu mwaka wateleko. Nange na munakathzi wange twakele na kulombela thimbu yoshe kuli Njambi. Twakathamene mutwatambwile mukanda wa kutunda ku ofisi ya munango wa kutulomba kupwa vapayiniya va kulitila ha kathimbu kakandondo lika. Twakulahelele manene kuli Yehova, cho twamwene ngwetu katuyengwile. Watukwathele mu vyuma vyoshe vitwatondele.” Jumpei na Nao vavalanyele ku Sikola ya Vaka-Kwambulula vya Vumwene.

YEHOVA ALI NA KUTAKAMETHA VANU VAVANGI

Vika vyalingithile ndolome Simone wa ku Italy, uje ali na myaka 43 na mwevwendi Anna wa ku New Zealand, uje ali na myaka 37 vajalukile ku Myanmar? Anna wendekele ngwendi: “Mithzimbu ya mu livulu lya Yearbook lya mu 2013 ije yendekele vya lifuti lya Myanmar ikeyo yatushongangeyeye.” Simone ngwendi: “Kunapu kuvethzika kwakama kupangela mu Myanmar. Njili na thimbu yaingi mu chipangi cha Yehova mwafwa, vuyoye vwa kuno vwapwa vwavwathi. Njavwahelela manene kumona mwali na kutunyungila Yehova omwo tuli na kupangela kuno kuli vujene vwakama.” (Myatho 121:5) Anna wendekele ngwendi: “Njavwahelela manene kupangela kuno. Tuli na kuyoya yoyethi yayathi. Njikakala na thimbu yaingi ya kuthimutwiya na ishamunange, cho tuli na kupangela hamo thimbu yoshe. Tunawana lalo vavuthamba vavavwa. Vanu kuno kuvethi kuyengula Vakaleho va Yehova, cho vakavwahelela manene kuvambulwila.” Vuvwa muka vuvanalimwena?

Anna wendekele ngwendi: “Litangwa limo njathimutwiyiye na muna sikola umo ha maketi, cho njamulekele ngwange njikaija thimbu ikwavo. Munjaileko njakamuwanene na lanyako kavuthamba kendi. Ha thimbu ikwavo, njakamuwanene nalanyako vakwavo. Ha vungendthzi vukwavo njakawanene nalanyako vakwavo lalo. Hakati ka vanu vaje valanyele, njili na kulilongetha Mbimbiliya na vanu vatanu.” Simone wendekele ngwendi: “Vanu va kuno vakala na ndthzandthzu, cho vashaka kulilongetha vuthunga. Vwingi vwavo vapwa va kuvwahelela. Tukonowa kuwana thimbu ya kuvalongetha voshe.

Vyuma muka vyanapande kulinga munu mangana ajalukile ku Myanmar? Mizuho wa ku Japan wendekele ngwendi: “Nange na munalume wange Sachio, twakele manene na lishungu lya kupangela kuje kuli vujene vwakama, oloni kutwathzivukile kwakuya. Mutwatandele mithzimbu ya mu lifuti lya Myanmar mu livulu lya Yearbook ya 2013, twavwahelelele manene, ngechi twaliyongwele ngwetu tujalukileko nga chitava.” Sachio wendekele ngwendi: “Twayongwele ngwetu tuye ku Yangon, nganda yakama ya mu lifuti lya Myanmar ha chalumingo chimo lika mangana tukamone muvakayoyela vanu. Vuje vungendthzi vwatukwathele tujalukileko.”

NENI MWATHA KUKWATHA KUJE KULI VUJENE NDI?

Rodney na mwevwendi Jane va ku Australia, vaje vali na myaka 52 na vana vavo vavali va Jordan na Danica vanapangela kuje kuli vujene vwakama mu Myanmar kutunda mu mwaka wa 2010. Rodney wendekele ngwendi: “Twavwahelelele manene kumona vanu vaje vali na lishungu lya kulilongetha vya Njambi. Njishongangeya vinanga ngwange vakale na lishungu lya kupangela kuje kuli vujene vwakama ngwe kuno ku Myanmar. Vika wendekelele ngocho? Ngwendi: “Kujalukila kuno kunakwatha manene nanga yange kukola ku sipilitu. Vanike vavangi vanakela manene mana ku kutonda mafoni na minyau na vipangi na vyuma vyeka. Oloni vana vetu vanathzethzama mu kulilongetha mwakukwathela vanu mu lihya. Vana vetu vakalilongetha mwakuthimutwiya na vanu vaje kuvathzivuka vya mu Mbimbiliya na mwakukumbulwila ha thimbu ya viwano, cho lalo vakathzethzama mu vipangi vyavingi vya ku sipilitu.”

Oliver wa ku United States, uje ali na myaka 37 walumbunwine vuvwa vuli mu kupangela kuje kuli vujene. Wendekele ngwendi: Kupangela Yehova mu lifuti lyeka muli vivethzikitho vyavingi. Kujalukila kweka kunanjikwatha kukulahela manene Yehova nameme njiliwana na vukalu vwa kufwa vati. Kupanga hamo lika na vanu vaje kunjithzivuka, oloni vanakulahela vyuma vinjakulahela kunanjikwatha kumona ngwange muno mu kaye kumwethi vyuma vyavivwa vituvakana Vumwene vwa Njambi. Ha thimbu ino, Oliver na mwevwendi Anna vali na kwambulwila tuveveve mu Chichainizi.

Ndokathzi Trazel wa ku Australia uje ali na myaka 52 napangela mu Myanmar kushwa mu mwaka wa 2004. Wendekele ngwendi: “Njishongangeya vaje vatha ngwange vakapangele kuje kuli vujene vwakama. Njamono ngwange nga muli na lishungu lya kupanga, cho Yehova avethzikitha viyongola vyeni. Kunjathzivukile ngwange njatha kuyoya ngachije. Njinashuvuluka na kuvwahelela kuno ku tuli na kupangela.”

Awa majwi akutundilila kwithi ya vimbunge vya vaje vali na kupangela ku vujene mu Myanmar anapande kumishongangeya kuthinganyeka mu mwatha kukwathela vanu va vimbunge vyavivwa vaje vali mu myela ije kuyethi na vaka-kwambulula. Kunapu lika ngwe vaka-kupangela ku vujene vatuleka ngwavo: “Ijeni kuno ku Myanmar mwakutukwathe.”