CILONGESA 16
Bika Byalingile Yesu Mwakele Hano Hasi?
Banu babangi mubakendeka bya Yesu, bakendeka lika byendi te acili mbututu nambe bya kutsa kwendi. Bamo bakendeka ngwabo wapwile lika kapolofweto. Kuma kulilongesa bya buyoye bwendi mwakele hano hasi kutukwasa tumuzibuke mwamubwa ndi? Muno mu cilongesa, tusimutwiya ha byuma bimo byalingile Yesu na kumona mubitukwasela.
1. Cipangi muka capwile ca seho manene kuli Yesu?
Cipangi ca seho manene calingile Yesu capwile ca ‘kwambulula muzimbu waubwa wa Bumwene bwa Njambi.’ (Tandeni Luka 4:43.) Wambulwile muzimbu waubwa uje wamwesele ngwawo Njambi akashimbika bumwene nambe fulumende ije ikamanesa bukalu bwoshe bubali na kuliwana nabwo banu.a Yesu wambulwile ou muzimbu ha myaka itatu na hafu.—Mateo 9:35.
2. Bikomokeso byalingile Yesu bimwesa bika?
Mbimbiliya inendeka ‘bikomokeso na bizibukiso byalingile Njambi kwitila muli Yesu.’ (Vilinga 2:22) Njambi wanene Yesu nzili ya kwolwesa lihunzi lyakama, kwana banu babangi-bangi byakulya, kukangwisa baje bakele na kubinja na kusangula batsi. (Mateo 8:23-27; 14:15-21; Mako 6:56; Luka 7:11-17) Bikomokeso byalingile Yesu bimwesa ngwabyo Njambi ikeye wamutumine. Co lalo bimwesa ngwabyo Yehova ali na nzili ya kumanesa bukalu bwoshe bubali na kuliwana nabwo banu.
3. Bika bitulilongesa kuli Yesu?
Yesu wononokele Yehova mu byuma byoshe. (Tandeni Yowano 8:29.) Wapwile wa kulongwa kuli Ishe kweta na ha kutsa kwendi nameme waliwanene na byeseko bya kuliseza-seza. Yesu wamwesele ngwendi banu basa kulemesa Njambi nameme baliwana na byeseko. Co ‘natusezela cimweso, ngeci tukabangeye mu myanja yendi.’—1 Petulu 2:21.
TONDESESENI
Bika byalingile Yesu mangana ambulule muzimbu waubwa? Wawanene kuli nzili ya kulinga bikomokeso?
4. Yesu wambulwile muzimbu waubwa
Yesu wakele na kwenda mangenzi amalaha mu kushaka kwambulwila banu babangi muzimbu waubwa. Tandeni Luka 8:1, na kusimutwiya ha bihula binatako:
Kuma Yesu wakele na kwambulwila lika banu baje bakele na kwija kuli ikeye ndi?
Bika byakele na kulinga Yesu mangana awane banu ba kwambulwila?
Njambi wendekele cimweja ngwendi Mesiya akambulula muzimbu waubwa. Tandeni Isaya 61:1, 2, na kusimutwiya ha bihula binatako:
Yesu washulisilile bati obu bupolofweto?
Mumona bati, kuma banu banapande kuziba ou muzimbu waubwa ndi?
5. Yesu walongesele banu binangulo byabibwa
Yesu kambulwile lika muzimbu waubwa wa Bumwene bwa Njambi, oloni walongesele lalo banu binangulo byabibwa. Moneni binangulo bimo byendekele mu Ñanda ya ha Munkinda. Tandeni Mateo 6:14, 34 na 7:12. Kutundaho, simutwiyeni ha bihula binatako:
Kwesekesa nawa mavesi, binangulo muka byendekele Yesu?
Kuma ebi binangulo bicipanga ndi?
6. Yesu walingile bikomokeso
Yehova wanene Yesu nzili ya kulinga bikomokeso. Cakumwenako, tandeni Mako 5:25-34 nambe kukenga VIDIO. Kutundaho, simutwiyeni ha bihula binatako.
Uje munakazi wakulahelele bika?
Bika binamyete ku mbunge omu mu vidio?
Tandeni Yowano 5:36, na kusimutwiya ha cihula cinatako:
Bikomokeso byalingile Yesu ‘byamwesele’ bika?
Muzibuka ndi?
Bwingi bwa biñanda bituzibuka hali Yesu bili mu mikanda iwana ya mu Mbimbiliya. Bili mu mukanda wa Mateo, wa Mako, wa Luka nou wa Yowano. Umo na umo wa baje basonekele ei mikanda, wasonekele biñanda bya Yesu bije byalisezeleko nebi bya bakwabo. Oloni ei mikanda yalitombola, co itukwasa tuzibuke bya buyoye bwa Yesu.
MATEO
Ikeye wabangele kusoneka mukanda wendi. Omu mu mukanda muli bilongesa byabingi bya Yesu, maneneni bije byendeka bya Bumwene bwa Njambi.
MAKO
Ikeye wasonekele mukanda wawihi manene ku mikanda ei iwana. Omu mu mukanda muli mizimbu ya byuma byabingi byalingile Yesu.
LUKA
Namwesa ngwendi Yesu washakele manene kulombela, co lalo wakele na kusingimika banakazi.
YOWANO
Wasonekele manene biñanda byendekele Yesu na babusamba bendi na bije byendekele na banu beka, co bitukwasa kuzibuka bifwa bya Yesu.
BAMO BAKENDEKA NGWABO: “Yesu wapwa Njambi Muka-nzili Yoshe.”
Yeni mumona bati?
SIMPI YAKAMA
Yesu wambulwile bya Bumwene bwa Njambi na kulinga bikomokeso, co lalo wononokele Yehova mu byuma byoshe.
Kwitulukamo
Cipangi muka capwile ca seho manene kuli Yesu mwakele hano hasi?
Bikomokeso byalingile Yesu bimwesa bika?
Binangulo muka byalongesele Yesu?
WANENI BIKWABO
Biñanda muka byendekele manene Yesu?
Bukaleho muka bumwesa ngwabwo Yesu walingile bene bikomokeso?
“Bika Bitulilongesa ku Bikomokeso Byalingile Yesu?” (Kaposhi ka Kukengela ka July 15, 2004)
Munalume umo watengulwile yoyesi yendi mwazibukile ngwendi Yesu waka banu mbunge.
“Kunjakele Bakwetu Mbunge” (Kaposhi ka Kukengela ka October 1, 2014)
Moneni mubinalikabela byuma bimo byalingile Yesu.
a Mu cilongesa 31-33, tukasimutwiya manene bya Bumwene bwa Njambi.