Bakaleho ba Yehova Bamona Bati Byakutsa?
Tukakulahela na kulinga byuma biilongesa Mbimbiliya ha butsi. Cakumwenako twakulahela byuma binatako:
Kukwabihile kulila munu itwazema nga natsi. Bandongesi ba Yesu bakele na kulila babushoko bwabo mubatsile. (Iwano 11:33-35, 38; Bilinga 8:2; 9:39) Ha simbu ya byakutsa kutwesi kunwa bwala nambe kulinga byuma bije bimwesa ngwe twabwahelela. (Ekelesiya 3:1, 4; 7:1-4) Oloni tukamono ei simbu kupwa ya kuzembeleka baje banatsisa.—Loma 12:15.
Batsi na cimo cibazibuka cahi. Nameme twatunda ku bisemwa na ku mitambela ya kuliseza, tukajenjuka ku bisemwa na bilinga bije kubilitombola na Mbimbiliya byakwendeka ngwabo batsi bakatwalelelelaho kuyoya, co lalo ngwabo basa kukwasa nambe kunenela bukalu banu bali na kuyoya. (Ekelesiya 9:5, 6, 10) Ebi bisemwa binambateselela kukala ha myala, na bilika bya kwanuka mutsi mwaka na mwaka na kwana milambu ku batsi, kwendeka nabo, kubalomba bukwasi hamolika na bisemwa bibakalingi nga munu yanalyambata nendi natsi. Tukajenjuka ebi bisemwa na bilika mu kwononoka lishiko lya mu Mbimbiliya lije lyendeka ngwalyo: ‘Lyangununeniko, . . . ‘likeleni kukwata byuma bya kujwala.’—2 Korinte 6:17.
Batsi bakasanguka. Mbimbiliya yendeka ngwayo kukakala kusanguka kwa batsi, co kutsa kucikakalako lalo. (Bilinga 24:15; Kujombolola 21:4) Ngwe mwa baka-Kristu bakulibanga, eli lilabelelo likatukwasa tujeneke kulinga bibakalingi banu bamo bya kulila munu mukutubakanesa.—1 Tesalonika 4:13.
Mbimbiliya ikatunangula ngwayo tupwe baka-kulikehesa. (Provebia 11:2) Ha simbu ya byakutsa kutwesi ‘kutembesa byuma bituli nabyo.’ (1 Iwano 2:16) Co lalo kutwesi kulinga bilika bya ha kutsa bije bikashubulwisa banu nambe kulanda ma kofini akutula manene na kuzala bizalo bije bilingisa banu batumone.
Kutwesi kusindiya bakwetu bakulahele bitwakulahela kutalesa ha ñanda ya byakutsa. Tukakabangeya cinangulo ca mu Mbimbiliya cije cendeka ngwaco: “Umo na umo wetu akalitabela kuli Njambi.” (Loma 14:12) Oloni nga banu batwihula byuma bitwakulahela ha ñanda ya kutsa, tukabalumbunwina “mu kuwa mbunge na kasingimiko kakama.”—1 Pita 3:15.
Bika Bikalingiwa ku Byakutsa bya Bakaleho ba Yehova?
Mwela: Nga baka-naanga bayongola ngwabo kukale ñanda ya byakutsa, basa kwangula kwoshe-kwoshe kubashaka ngwabo ei ñanda ikakeleko. Yasa kukela ku Njibo ya Bumwene, ku njibo ya byakutsa nambe ku bihilo.
Ñanda ya butsi: Ikazembeleka baje banatsisa ha kubaleka biyendeka Mbimbiliya ha butsi na lilabelelo lya kusanguka kwa batsi. (Iwano 11:25; Loma 5:12; 2 Pita 3:13) Co lalo mu ñanda ya byakutsa bakendeka bifwa byabibwa byakele nabyo mutsi na byuma bibasa kulilongesa ku mwanja wendi wa kulongwa.—2 Samwele 1:17-27.
Kutundaho, bakembi na mwaso uje unakundama ha Bisoneka. (Kolose 3:16) Co kumamaneselelo a progilamu bakalombela.—Filipi 4:6, 7.
Kufwetesa bimbongo: Kutwesi kufwetesa bimbongo banu bakaija ku biwano nambe nga kwasholoka bukalu bwa byakutsa.—Mateu 10:8.
Banu bakakungulukako: Nameme banu baje keti bakaleho banazituka kwija ku Njibo ya Bumwene kwa kutolilila ku ñanda ya butsi. Banu banazituka kwija ngwe mubakazitukila kwija ku biwano bitukakala nabyo.
Kuma Bakaleho bakai ku byakutsa bibakatwamenena ku banu ba mu bulombelo bweka ndi?
Mukaleho asa kulyangwila kuya nambe kujeneka kuya kwesekesa na citakutaku cendi canalongesa na Mbimbiliya. (1 Timothi 1:19) Oloni kutwesi kulinga bilika bya bulombelo bije kubilitombola na bilongesa bya Mbimbiliya.—2 Korinte 6:14-17.