BYUMA BYASA KUMIKWASA NGA BINDANDO BINALONDO

Jaukeni na Byuma Bimuli Nabyo

Banu baje bakajauka na byuma bibali nabyo bakapu ba kubwahelela mu kuyoya. Co byuma mubikatenguluka, bakatengululako yoyesi yabo mangana keti balikwasese bimbongo byabingi kutubakana bimbongo bibakawana.

MWAFWA BIKA KWAPWA KWA SEHO KUJAUKA NA BYUMA BIMULI NABYO?

Jessica Koehler muka-kulilongesa mubakasinganyekela banu wanangukile ngwendi banu baje bakajauka na byuma bibali nabyo bakamono byuma mu ngila yaibwa. Co lalo wanangukile ngwendi bwingi bwabo kubesi kuzibila bakwabo cipululu. Mukwemwo bakapu ba kubwahelela, co kubesi kukala manene na bishoti. Bwingi bwa banu ba kubwahelela kubakele na byuma byabingi bya ku mubila. Bakaka mbunge ku byuma bya seho manene bije kubasa kulanda na bimbongo bya kufwa ngwe kubwahelela kuje kukaija mwafwa ya kusikama na binaanga byabo na babusamba babo.

“Nga tuli na byakulya na bizalo tujauka nebi byuma.”—1 Timothi 6:8.

BIMWASA KULINGA

Keti mulyesekese ku bakweni. Nga mwesekesa byuma byabindondo bimuli nabyo ku byuma byabingi bibali nabyo bakweni, kwasa kumikaluwila kujauka na byuma bimuli nabyo, co mwasa kukala na cipululu. Kutwapandele kulyesekesa ku bakwetu mwafwa bisimbu bimo kutwasa kuzibuka byuma byoshe bibali na kuliwana nabyo. Banu bamo baje bali na bimbongo hamo bali na mikuli yaingi manene. Nicole uje wakala ku Senegal wendekele ngwendi: “Kukala na byuma byabingi keti kukekwo kunjilingisa njipwe wa kubwahelela. Njasa kupwa wa kubwahelela nga njijauka na byuma binjili nabyo nameme bakwetu bali na byuma byabingi.”

Esekeni kulinga ebi: Jenjukeni kukenga mizimbu nambe biñanda bya ha Intaneti bije bikamwesa na kwendeka ha bimbongo na byuma bibali nabyo bakweni.

“Nameme munu ali na byuma byabingi, byuma byanafuku kubyasa kumwana mwonyo.”—Luka 12:15.

Pweni baka-kukandelela. Kakangi banu baje bapwa baka-kukandelela bakajauka na byuma bibali nabyo, co lalo kubesi kuliziba ngwabo bacitonda byuma bikwabo byabingi. Roberton wa ku Haiti wendekele ngwendi: “Njikawana simbu ya kusinganyekesesa ha byuma bibananjilingila bakwetu nebi bibanalingila baka-naanga yange. Kutundaho, njikabaleke ngwange byuma bibakanjilingila bikanjikwasa manene. Co lalo njikalongesa munange wa munalume uje ali na myaka 8 kukandelela ku byuma byoshe bibamwana.”

Esekeni kulinga ebi: Waneniko libulu mumwasa kusoneka byuma byabibwa. Co ha litangwa na litangwa, sonekenimo byuma byabibwa binalingiwa. Cakumwenako, mwasa kukandelela bya bukangule bweni bwabubwa, naanga yeni na babusamba ba busunga bamuli nabo nambe bya litangwa mulinasholokela mwamubwa mulinakala na kulahuka.

“Uje ali na mbunge ya kubwahelela alisamba simbu yoshe.”—Provebia 15:15.

Bisimbu bimo kukatukaluwila kujauka na byuma bituli nabyo. Oloni tunapande kulifwita kulinga ngoco. Nga tujauka na byuma bituli nabyo, co tupwa ba kubwahelela. Eci cifwa ca kubwahelela kutwasa kucilanda.