Bitulilongesa ku Bupolofweto bwa Jakobu: Mutamba 1

1-2. Byuma muka byalingile Jakobu simbu kanda atse, co mwafwa bika? (Taleni na cikupulo ca ha .)

JAKOBU mwakulubalele watundile mu Kanana na kuya ku Ijipiti hamolika na naanga yendi, co wakatwaleleleho kupangela Yehova ha myaka 17. (Gene 47:28) Jakobu wabwahelelele manene mwamwene lalo munendi Jozefu uje yasinganyekele ngwendi natsi. Ngeci Jakobu na bana bendi boshe bakele hamo lalo. Oloni Jakobu wazibukile ngwendi ololo atsa, ngeci walekele bana bendi boshe balikungulwile hamo kuli ikeye mangana abaleke byuma bimo bya seho.—Gene 49:28.

² Mu simbu ya kunima, kakangi cisemi wa munalume wakele na kulomba baka-naanga yendi balikungulwile hamo mangana abashike simbu kanda atse. (Isaya 38:1) Co lalo ha simbu ei, ou cisemi wasele kwangula mwana wa munalume uje atwalelelaho kutwamenena naanga mwatsa.

3. Bika bitulilongesa ku mukanda wa Genese 49:1, 2?

³ Tandeni Genese 49:1, 2. Ciwano calingile Jakobu na bana bendi capwile cakulitila. Jakobu wapwile kapolofweto, co Yehova wamuhwimininine endeke byuma bya seho bikalingiwa kulutwe bije byakundamene batekululwila bendi. Ngeci majwi endekele Jakobu kuli bana bendi apwile a bupolofweto.

4. Bika byapolofwetele Jakobu, co tulilongesa bika ku majwi endi? (Taleni na cipalo ca “Naanga ya Jakobu.”)

⁴ Muno mu cilongesa tusimutwiya byuma byendekele Jakobu kuli bana bendi bawana: Rubeni, Simyoni, Levi, na Juda. Co mu cilongesa cinatako tusimutwiya byendekele Jakobu ku bana bendi bakwabo bakupwa 8. Jakobu wapolofwetele byuma bikalingiwa kuli bana bendi na binaanga byabo. Mu kwita kwa simbu, ebi binaanga byakupwile muyati wakama wa Isalele. Nga twituluka mu byuma byalingiwile mu lifuti lya Isalele kunima, tumona muwalishulisililile mwajwi a Jakobu. Co kusinganyekesesa ha mwajwi endi kutulongesa byuma bya seho bije bitukwasa tuzibise Tate yetu Yehova kubwaha.

RUBENI

5. Rubeni wasinganyekele ngwendi atambula byuma muka kuli ishe?

⁵ Jakobu wabangele kwendeka kuli Rubeni ngwendi: “Yobe ntwatwa yange.” (Gene 49:3) Hamo Rubeni wasinganyekele ngwendi atambula byuma byabingi kuli ishe, kutubakana bandolome bendi bakwabo mwafwa ikeye wapwile ntwantwa. Co hamo wasinganyekele ngwendi ikeye atwamenena naanga, ishe mwatsa. Co lalo umo wa bana bendi ikeye akatwalelelaho kupwa mutwe wa naanga.

6. Mwafwa bika Rubeni katambwile buswana bwendi ha kupwa ntwantwa? (Genese 49:3, 4)

⁶ Rubeni katambwile buswana bwapandele kutambula ha kupwa ntwantwa. (1 Kolo 5:1) Mwafwa bika? Mwafwa munima ya kutsa kwa Recho, Rubeni walilalele na Biuha ngamba ya Recho. (Gene 35:19, 22) Recho wanene Biuha kuli Jakobu mangana amukitile bana. Bika byalingisile Rubeni alilale na Biuha? Rubeni wapwile muna Leya ndokazi ya Recho. Ngeci hamo Rubeni walilalele na Biuha, mangana Jakobu azinde Biuha na kuzema manene ina Leya. Nambe hamo Rubeni wazeme Biuha, co kendesele mwamubwa mashungu endi a kulilala. Byuma byalingile Rubeni byapwile byabibi ku mesho a Yehova na ishe.—Tandeni Genese 49:3, 4.

7. Bika byalingiwile kuli Rubeni na batekulwila bendi? (Taleni na cipalo ca “Bupolofweto bwa Jakobu.”)

⁷ Jakobu walekele Rubeni ngwendi: “Kuukatubakana bandolome bobe.” Awa majwi alishulisilile. Mizimbu ya mu Mbimbiliya imwesa ngwayo kukwakele munu wa kutunda mu naanga ya Rubeni uje wapwile mwene, kapilistu nambe kapolofweto. Nameme ngoco, Jakobu wanene Rubeni buswana bumo, co naanga ya Rubeni yapwile imo ya miyati ya Isalele. (Joshua 12:6) Bisimbu bimo Rubeni wamwesele bifwa byabibwa, co cisholoka kalingile lalo bupangala.—Gene 37:20-22; 42:37.

8. Bika bitulilongesa ku mwanja wa Rubeni?

⁸ Bika bitulilongesako? Tunapande kulwisa mashungu amabi na kujeneka kulinga bupangala. Nga tuliwana mu ceseko ca kulinga bubi, tunapande kusinganyekesesa omwo bilinga byetu byasa kuzibisila Yehova na baka-naanga yetu na bakwetu kubabala ku mbunge. Tunapande kwanuka lalo ngwetu “byoshe byakuna munu, bikebyo lalo byateja.” (Gala 6:7) Nameme ngoco byuma byalingiwile kuli Rubeni bitwanukisa lalo ngwabyo Yehova wapwa muka-kutetela. Tunasa kuyanda mwafwa ya kusebuka kwetu, oloni nga tutenguluka mu busunga na kweseka mwoshe mutwasela kulinga byuma byabibwa, Yehova atukonekela na kutubezikisa.

SIMYONI NA LEVI

9. Bika byalingile Simyoni na Levi bije byalubalesele Jakobu? (Genese 49:5-7)

⁹ Tandeni Genese 49:5-7. Jakobu wendekele lalo kuli Simyoni na Levi. Oloni majwi endekele kuli bakebo amwesa ngwawo byuma byalingile Simyoni na Levi kubyamuzibisile kubwaha. Myaka imo kunima, Dina muna Jakobu bamupikile kuli munalume wa kaKanana wa lizina lya Shekeme. Bana ba Jakobu boshe balubalele mwafwa ya byuma byalingiwile kuli ndokazi yabo, oloni Simyoni na Levi kubakwatele mbunge. Ngeci bakwisile Shekeme na banu bendi ngwabo nga banalume boshe ba mu nganda yendi baya ku mukanda, co bakala mu kwoloka na naanga ya Jakobu. Ngeci baje banalume batabele kuya ku mukanda. Ha simbu ibakele na kubinja baje banalume, Simyoni na Levi “bambatele mikwale yabo na kukobela mu nganda. Oloni banu ba muje mu nganda, kubanangukile ngwabo banaija na kubatsiya. Ngeci, Simyoni na Levi batsiile banalume boshe ba muje mu nganda.”—Gene 34:25-29.

10. Byuma byapolofwetele Jakobu kutalesa kuli Simyoni na Levi byalishulisilile bati? (Taleni na cipalo ca “Bupolofweto bwa Jakobu.”)

¹⁰ Jakobu walubalele manene mwafwa ya byuma byabibi bibalingile bana bendi babali. Ngeci wapolofwetele ngwendi bana babo na batekulwila babo bakalishandokela mu Isalele mwoshe. Awa majwi alishulisilile munima ya myaka 200 baIsalele mu bakobelele mu Lifuti lya Cikulaheso. Muyati wa Simyoni waswanene mitamba ya libu ku mutamba wa muyati wa Juda. (Joshua 19:1) Muyati wa Levi ukewoco waswanene binganda 48 mu Isalele.—Joshua 21:41.

11. Byuma muka byabibwa biwalingile muyati wa Simyoni na Levi?

¹¹ Batekulwila ba Simyoni na Levi kubelukilile kulinga bubi bubalingile bakukulwila babo. Co baLevi babangi balemesele Yehova mu kulongwa. Mosesa mwaile ha Munkinda wa Sinai kukatambula Mashiko a kutunda kuli Yehova, baIsalele babangi balemesele kamponya wa muna ngombe. Oloni baLevi babyanene kulemesa uje njambi wa makuli, co bakwasele Mosesa mu kunyongesa banu baje balemesele uje kamponya. (Ekizo 32:26-29) Yehova wangwile banalume ku muyati wa Levi mangana bapwe tupilistu mu Isalele. (Ekizo 40:12-15; Kula 3:11, 12) Mu kwita kwa simbu, muyati wa Simyoni wakwasele muyati wa Juda mu kulwisa baKanana baje bakele mu mutambela wa baJuda mu Lifuti lya Cikulaheso.—Maako 1:3, 17.

12. Bika bitulilongesa ku mwanja wa Simyoni na Levi?

¹² Bika bitulilongesako? Tunapande kukwata mbunge nga twalubala. Kukwabihile kulubala nga yeni nambe munu imwazema banamulingi mwamubi. (Samu 4:4) Oloni tunapande kwanuka ngwetu Yehova kesi kuliziba kubwaha nga tulinga shambandinga banu baje banatulingi mwamubi. (Jems 1:20) Nga mukwetu muka-Kristu nambe munu weka natulingi mwamubi, tunapande kulinga byuma bije bizibisa Yehova kubwaha ku mbunge. Kulinga ngoco kutukwasa tujeneke kwendeka nambe kulinga byuma bije bikobelesa bakwetu mu bukalu. (Loma 12:17, 19; 1 Pita 3:9) Nameme nga bisemi beni kubesi na kulinga byuma bije bizibisa Yehova kubwaha ku mbunge, anukeni ngweni kumwapandele kutembwinina bilinga byabo. Keti musinganyeke ngweni kumwasa kuzibisa Yehova kubwaha ku mbunge. Yehova amikwasa mulinge byuma byabibwa, co abezikisa kulifwita kweni.

JUDA

13. Bika byesi kulingisile Juda alishoshomwene, ishe mwashangumukile kwendeka hali ikeye?

¹³ Jakobu wendekele lalo kuli munendi Juda. Hamo Juda walishoshomwenene munima ya kuziba byuma byendekele Jakobu kuli bana bendi bakwabo mwafwa nendi walingile byuma byabibi. Simyoni na Levi mu batsiile banalume ba Shekeme, Juda hamolika na bandolome bendi bakwabo boshe bakobelele mu nganda kukapukula bitenga bya banu byoshe byakele muje mu nganda. (Gene 34:27) Juda walikwatasanene lalo na bandolome bendi mu kulandesa Jozefu mu bundungo na kukwisa ishe ngwabo Jozefu natsi. (Gene 37:31-33) Kutundaho, walilalele na Tamala munakazi wa munendi mwafwa wasinganyekele ngwendi wapwile lihule.—Gene 38:15-18.

14. Byuma muka byabibwa byalingile Juda? (Genese 49:8, 9)

¹⁴ Nameme Juda walingile byuma byabibi kunima, Jakobu wamubezikisile na kumushangala. (Tandeni Genese 49:8, 9.) Juda wamwesele ngwendi wakele manene mbunge ishe uje wakulubalele, co lalo wazibilile ngozi shongo yendi Benjamini.—Gene 44:18, 30-34.

15. Juda bamubezikisile mu bingila muka?

¹⁵ Jakobu wapolofwetele ngwendi Juda ikeye akatwamenena bandolome bendi. Nameme ngoco, kwetile myaka ya kweta ku 200 mangana obu bupolofweto bushangumuke kulishulisilila. BaIsalele mubetile mu mambo kutunda mu Ijipiti kuya mu Lifuti lya Cikulaheso, muyati wa Juda ukewo wabatwamenenene. (Kula 10:14) Munima ya myaka, Yehova watumine Juda alibange kukalwisa baKanana na kukabanyeka mutamba wa libu mu Lifuti lya Cikulaheso. (Maako 1:1, 2) Co Devidi ikeye wapwile mwene wakulibanga ku bimyene babangi ba kutunda ku muyati wa Juda. Oloni majwi apolofwetele Jakobu kutalesa kuli Juda alishulisilile lalo mu bingila bikwabo.

16. Bupolofweto buli ku mukanda wa Genese 49:10 bwalishulisilile bati? (Taleni na cipalo ca “Bupolofweto bwa Jakobu.”)

¹⁶ Jakobu wendekele ngwendi Mwene uje akayula banu boshe akatunda ku naanga ya Juda, co akayula myaka yoshe. (Tandeni Genese 49:10 na futunoti.) Ou Mwene ikeye Yesu Kristu yatumbwile Jakobu ngwendi Shilo. Kangelo wendekele hali Yesu ngwendi: “Yehova Njambi akamwana litanda lya ishe Devidi.” (Luka 1:32, 33) Yesu banamutumbula lalo ngwabo “Ndumba wa ku muyati wa Juda.”—Kujo 5:5.

17. Twasa kutembwinina bati Yehova?

¹⁷ Bika bitulilongesako? Yehova wabezikisile Juda nameme walingile bubi bwakama. Oloni hamo bandolome ba Juda kubazibukile byalingisile Yehova amubezikise. Nameme ngoco, Yehova wamwene bifwa byabibwa byakele nabyo Juda, co wamubezikisile. Twasa kutembwinina bati mwanja wa Yehova? Nga ndolome nambe ndokazi banamwana cipangi ca seho mu munga ya Yehova, tunasa kushangumuka kusinganyekesesa ha buzeye bwendi na kwonowa kuzibisisa binalingisa bamwane oco cipangi. Oloni tunapande kwanuka ngwetu bifwa byendi byabibwa bikazibisa Yehova kubwaha. Yehova akaka mbunge ku bifwa byabibwa bya bangamba bendi. Ngeci netu tunapande kulifwita kumutembwinina.

18. Mwafwa bika tunapande kukala na mbunge ya kubandamena?

¹⁸ Cuma cikwabo citulilongesa ku byuma byaliwanene nabyo Juda, cinapu kukala na mbunge ya kubandamena. Yehova akashulisilila bikulaheso byendi simbu yoshe. Oloni akalingi ngoco ha simbu na ngila yamona ikeye ngwendi inapande. Banu bakulibanga baje batwamenenene lifuti lya Isalele, kubatundile ku muyati wa Juda. Nameme ngoco, baJuda bononokele banu baje bangwile Yehova ngwendi batwamenene. Cakumwenako, bononokele Mosesa uje wapwile kaLevi na Joshua uje wapwile kaEfremu hamolika na Mwene Saulu uje wapwile kaBenjamini. Netu tunapande kulikwatasana na banu boshe bangula Yehova ngwendi batutwamenene.—Hebe 6:12.

19. Majwi a bupulofweto endekele Jakobu anatulongesa bika hali Yehova?

¹⁹ Bika bitulilongesa ku majwi a bupolofweto endekele Jakobu kuli bana bendi bakulibanga bawana? Mwa busunga, ‘Yehova kesi kumona byuma ngwe mubakabimwena banu.’ (1 Samwe 16:7) Yehova wakala na mbunge ya kubandamena, co lalo wapwa muka-kukonekela. Kesi kuziba kubwaha mutukalingi byuma byabibi, oloni kesi kubandamena ngwendi tulinge byuma mu kulumbunuka. Yehova akabezikisa nameme baje balingile bubi bwakama kunima nga batenguluka mu busunga na kulinga byuma byabibwa. Mu cilongesa cinatako tusimutwiya byapolofwetele Jakobu ku bana bendi bakwabo bakupwa 8.