‘Twaleleleniho Kunyungilila Likwatasano Lyeni lya Sipilitu’
KAPOSITOLO Paulu washongangeyeye baka-Kristu ba mu Efeso batwaleleleho ‘kwecelela tupenga twa bakwabo mu cizemo, oku balinga mwoshe mubasela kunyungilila likwatasano lya sipilitu mu kwoloka kuje kunabakutila hamo.’—Efeso 4:2, 3.
“Likwatasano” lituli na kulikuwa mukati ketu lyapwa lya “sipilitu.” Ngeci oku kulumbununa ngwabo tunalikwatasana mwafwa ya nzili ya Yehova Njambi. Nameme ngoco, ngecilika mwendekelele kapositolo Paulu, tunapande kulifwita mangana tutwaleleleho kulikwatasana. Tubaboshe ha kupwa baka-Kristu, tunapande kulinga mwoshe mutwasela “kunyungilila likwatasano lya sipilitu.”
Cakumwenako, acisinganyekeni ngweni munu umo namyana mota yaiha. Iya napande kunyungilila ije mota? Yeni babenya munapande kuinyungilila. Nga ije mota itsa, kumwasa kwana mulonga munu uje namyaneneyo mwafwa yeni kumwainyungile mwamubwa.
Mu ngila imolika, nameme likwatasano lyetu baka-Kristu lyapwa bwana bwa kutunda kuli Yehova, tunapande kweseka mwoshe mutwasela kulinyungilila. Nga kumwesi mu kwoloka na ndolome nambe ndokazi mu cikungulukilo, co lihuleni ngweni: ‘Kuma njili na kulingako binjasa mu kunyungilila likwatasano lya sipilitu lije lili mukati ketu ha kumanesa bukalu ndi?’
‘LINGENI MWOSHE MUMWASELA’ KUNYUNGILILA LIKWATASANO
Ngwe mwendekelele kapositolo Paulu, tunananguka ngwetu keti kwakwasi kukala mu kwoloka na bandolome na bandokazi betu, maneneni nga umo wabo natubiisila. Kuma simbu yoshe yamibiisila munu munapande kusimutwiya nendi nambe kumuleka mumuli na kulizibila ndi? Embwe. Lihuleni ngweni: ‘Kuma kusimutwiya ha byuma binalingiwa kunena likwatasano indi kubwezelela lika ku bukalu?’ Bisimbu bimo kwakubwa kukonekela munu uje natubiisila nambe kujeneka kwaka mbunge ku byuma binalingiwa.—Prov 19:11; Maki 11:25.
Lihuleni ngweni: ‘Kuma kusimutwiya ha byuma binalingiwa kunena likwatasano indi kubwezelela lika ku bukalu?’
Ngwe mwasonekelele kapositolo Paulu, tutwaleleleniho ‘kwecelela tupenga twa bakwetu mu cizemo.’ (Efeso 4:2) Libulu limo lyendekele ngwalyo awa majwi anasa kulumbununa ngwawo “kubambata ngwe mubafwila.” Oku kulumbununa ngwabo tunapande kwanuka ngwetu bandolome na bandokazi betu nabo kubapwile ba kulumbunuka. Tubaboshe tuli na kweseka mwoshe mutwasela kuzala “bunu bwabuha.” (Efeso 4:23, 24) Oloni kutwasa kulinga ngoco mu kulumbunuka. (Loma 3:23) Nga twanuka ngwetu tubaboshe kutwalumbunukile, co kutupwila kwakwasi kukala na mbunge ya kubandamena na kukonekela bakwetu na “kunyungilila likwatasano lya sipilitu.”
Twasa kukala ‘mu kwoloka kuje kutukutila hamo’ nga tukonekela bakwetu na kwibala byuma bibanatubiisila. Lijwi lya Cigriki libananungulula ku mukanda wa Efeso 4:3 ngwabo “kunamikutila hamo” banalinungulula ngwabo “mishisha” ku mukanda wa Kolose 2:19. Mishisha yapwa ya kukola, co ikakwatasanesa bitsiya. Mu ngila imolika, cizemo na kwoloka bikatukwasa tutwaleleleho kunyungilila busamba buli mukati ketu na bandolome na bandokazi betu nameme nga balinga byuma bije kutwashakele.
Nga mukweni muka-Kristu namibiisila, pweni baka-kuzibisisa kutubakana kwaka lika mbunge ku tupenga twendi. (Kolo 3:12) Tubaboshe kutwalumbunukile, ngeci bisimbu bimo tukabiisila bakwetu. Kwanuka ngoco, kutukwasa tulingeko bitwasa mu “kunyungilila likwatasano lya sipilitu.”