CILONGESA 47
MWASO 38 Amyana Nzili Mukolese
Mu ba Seho Manene Kuli Yehova
“U munu wa seho manene.”—DANI 9:23.
BILI MUNO MU CILONGESA
Cino cilongesa cikwasa baje bakalizibi ngwabo kubapwile ba seho kuli Yehova bazibuke ngwabo Yehova wabamona kupwa ba seho manene.
1-2. Bika byasa kutukwasa tukulahele ngwetu tu ba seho kuli Yehova?
BANGAMBA ba Yehova bapwa ba seho manene kuli ikeye. Nameme ngoco, kuli bamo bacikalizibi ngwabo Yehova kabazemene. Hamo bali na kuliziba ngoco mwafwa kuli umo nabalingi mwamubi. Kuma neni mukalizibi ngweni Yehova kamizemene ndi? Nga mukemwo, co bika byasa kumikwasa mukulahele ngweni mwapwa mu ba seho kuli Yehova?
2 Cuma cimo casa kumikwasa mukulahele ngweni mu ba seho kuli Yehova cinapu kutanda mizimbu ya mu Mbimbiliya ije imwesa mutunapande kumwena bakwetu. Cakumwenako, Yesu wasingimikile banu na kubalinga mwamubwa. Mwalingile ngoco, wamwesele ngwendi ikeye na Ishe bamona banu ba kulikehesa baje bakalizibi ngwe banu bangoco kupwa ba seho manene. (Iwano 5:19; Hebe 1:3) Muno mu cilongesa tusimutwiya omwo Yesu wakwaselelemo banu bazibuke ngwabo bapwa ba seho kuli Yehova. Co lalo tusimutwiya bitukwasa tukulahele ngwetu Njambi watumona kupwa tu ba seho.—Hagai 2:7.
YESU WAKWASELE BATI BANU BAZIBUKE NGWABO BAPWA BA SEHO MANENE?
3. Yesu walingile bati baka-Galileya baje bezile na kumulomba bukwasi?
3 Yesu mwakele na kwambulwila mu Galileya, banu babangi bezile kuli ikeye mangana bakumutolilile na kubakangwisa ku mishongo yabo. Yesu wanangukile ngwendi “bakele na kuyanda, co balishandokele ngwe bimanga ba kujeneka kanyungi.” (Mate 9:36) Bakulunu ba bulombelo bwabo babamwene kupwa bangoco, co babatumbwile ngwabo “ba kusingiwa.” (Iwano 7:47-49) Oloni Yesu wabamwesele ngwendi bapwile ba seho omwo wapangesele simbu yendi mu kubalongesa na kubakangwisa ku mishongo yabo. (Mate 9:35) Kutundaho, mu kushaka kukwasa banu babangi, Yesu walongesele tupositolo bendi mwakwambulwila, co wabanene na nzili ya kukangwisa babezi.—Mate 10:5-8
4. Bika bitulilongesa kuli Yesu mwalingililemo baka-kumutolilila baje babakele na kulyatelela?
4 Yesu mwasingimikile banu na kubamwesa ngozi, wamwesele ngwendi ikeye na Ishe bamona banu baje babali na kulinga mwamubi kupwa ba seho manene. Nga muli na kuliziba ngwe Yehova kesi kumimona kupwa mu ba seho, co singanyekeseseni omwo Yesu walingililemo banu baje bezile na kulomba bukwasi kuli ikeye. Nga mulinga ngoco, co munanguka ngweni Yehova wamimona kupwa mu ba seho manene.
5. Bika bituzibuka hali munakazi yaliwanene nendi Yesu mu Galileya?
5 Yesu wakele mbunge kuli umo na umo wa banu bakele na kulongesa. Cakumwenako, mwakele na kwambulwila mu Galileya, waliwanene na munakazi uje wabinjile mushongo wa kwita maninga ha myaka 12. (Maki 5:25) Kwesekesa na lishiko, uje munakazi wapwile wa kujwala, ngeci woshe-woshe wamukwatele nendi wapwile wa kujwala. Hamo uje mushongo wamulingisile ajeneke kukala hamo na banu. Co lalo uje munakazi kasele kulemesela hamo na bakwabo ku sinagogi nambe kulingila hamo nabo bilika bya kulemesa. (Levi 15:19, 25) Cili bene uje munakazi walizibile ngwendi kubamuzemene.—Maki 5:26.
6. Byuma muka byalingile uje munakazi mangana akanguke?
6 Uje munakazi wakele na kubinja manene watondele ngwendi Yesu amukangwise. Oloni watewele kulomba Yesu mangana amukangwise. Mwafwa bika? Hamo wakele na kuziba shwamwa mwafwa ya mushongo wendi. Nambe hamo wasinganyekele ngwendi Yesu amusheka mwafwa kapandele kukala mukati ka mbunga oku napu wa kujwala. Ngeci wakwatele ku cizalo ca Yesu ca helu mwafwa wakulahelele ngwendi nga akwata lika ku cizalo cendi, co akanguka. (Maki 5:27, 28) Co cili bene likulahelo lyendi lyamukangwisile. Ngeci Yesu mwehwile mangana azibuke iya wamukwatele, uje munakazi walitabelele. Yesu wamulingile bati?
7. Yesu walingile bati uje munakazi wakele na kuyanda manene? (Maki 5:34)
7 Yesu wasingimikile uje munakazi na kumumwesa ngozi. Wanangukile ngwendi uje munakazi “wazibile manene lyoba, co wakele na kujaja.” (Maki 5:33) Ngeci wamushongangeyeye na kumumwesa ngozi. Yesu watumbwile uje munakazi ngwendi “munange.” Mwapangesele eli lijwi, Yesu wamwesele kasingimiko na ngozi na cizemo kuli uje munakazi. (Tandeni Maki 5:34.) Hamo wapangesele eli lijwi mwafwa wanangukile ngwendi uje munakazi wazibile manene lyoba. Acisinganyekeni lika mwashubulukilile uje munakazi. Byuma byendekele Yesu byamuzembelekele na kumukwasa ajeneke kuliziba kukala manene na mulonga mwafwa ya kukwata cizalo ca Yesu na kukala mukati ka mbunga. Yesu washakele kulingila uje munakazi byuma byabingi keti kumukangwisa lika. Washakele ngwendi uje munakazi azibuke ngwendi wapwa wa seho manene kuli Ishe wa mwilu Yehova.
8. Bukalu muka bwaliwanene nabwo ndokazi umo wa ku Brazil?
8 Na ano matangwa bangamba ba Yehova bamo bali na kubinja mishongo ije ili na kubalingisa bombwe na kuliziba kupwa bangoco. Cakumwenako, Mariaa uje wapwa painiya ku Brazil wasemukile oku kesi na mendi na liboko lya cimoshwe. Wendekele ngwendi: “Bakele na kunjishendumuna kushwa kumo ku sikola mwafwa ya buyanga bwange. Bakele na kunjitomba. Co lalo bisimbu bimo baka-naanga yange kubakele na kunjilinga mwamubwa.”
9. Bika byakwasele ndokazi Maria azibuke ngwendi wapwa wa seho manene kuli Yehova?
9 Bika byakwasele ndokazi Maria? Mwapwile Mukaleho wa Yehova, baka-Kristu bakwabo bamuzembelekele na kumukwasa alimone ngwe mwakamumwena Yehova. Wendekele ngwendi: “Bandolome na bandokazi babangi banjikwasele manene. Njakandelela manene kuli Yehova ha kunjana ei naanga yaibwa ya ku sipilitu.” Baje bandolome na bandokazi bakwasele ndokazi Maria azibuke ngwendi wapwa wa seho manene kuli Yehova.
10. Bukalu muka bwaliwanene nabwo Maliya Magadalena, co bwamulingisile alizibe bati? (Taleni na bikupulo.)
10 Tucisimutwiyeni omwo Yesu wakwaselele munakazi mukwabo wa lizina lya Maliya Magadalena. Ou munakazi wakele na badimona 7. (Luka 8:2) Hamo aba badimona bakele na kumulingisa byuma bije kubezililile kumona banu, ngeci hamo banu kubakele na kushaka kukala muyehi nendi. Ou munakazi wakele na kuyanda manene, co hamo walizibile kukala manene na mulonga na kusinganyeka ngwendi wahi wamuzema, co wahi asa kumukwasa. Yesu wamutundisile baje badimona, ngeci uje munakazi washangumukile kupwa muka-kukabangeya Yesu. Yesu wakwasele bati Maliya Magadalena azibuke ngwendi wapwa wa seho manene kuli Yehova?
Yesu wakwasele bati Maliya Magadalena akulahele ngwendi wapwa wa seho kuli Yehova? (Taleni palagilafu 10-11)
11. Yesu wamwesele bati Maliya Magadalena ngwendi wapwa wa seho manene kuli Yehova? (Taleni na bikupulo.)
11 Yesu walanyele Maliya Magadalena aye nabo mu cipangi ca kwambulula.b Ngeci watwaleleleleho kutolilila Yesu mwakele na kulongesa bakwabo. Co lalo Yesu washolokele kuli ikeye ha litangwa lyasangukile. Maliya Magadalena wapwile umo wa bandongesi bakulibanga baje basimutwiiye na Yesu lije litangwa. Co Yesu wamulombele akaleke tupositolo bendi ngwendi nasanguka. Mu bingila byoshe ebi, Yesu wakwasele Maliya azibuke ngwendi wapwa wa seho manene kuli Yehova.—Iwano 20:11-18
12. Bika byalingisile Lidia alizibe kupwa wangoco?
12 Ngecilika mwa Maliya Magadalena, banu babangi ano matangwa bakalizibi ngwabo bapwa bangoco. Ndokazi Lidia wendekele ngwendi baina mubamwimitile, basinganyekele bya kutundisa limo. Lidia acili na kwanuka ngwendi nameme mwapwile mwanike baina kubamwakele mbunge, co bakele na kwendeka byuma byabibi hali ikeye. Wendekele ngwendi: “Kulingila banana kubanjizemene, simbu yoshe njashakele ngwange bakwetu banjizeme na kupwa babusamba bange. Njalishoshomwenene ngwange bakwetu kubasa kunjizema mwafwa banana banjilingisile njikulahele ngwange njapwa nji munu wamubi.”
13. Bika byakwasele Lidia amone ngwendi wapwa wa seho kuli Yehova?
13 Lidia mwashangumukile kulilongesa Mbimbiliya, byuma byatengulukile. Kulombela kuli Yehova na kutanda Mbimbiliya na majwi na bilinga bya bandolome na bandokazi byamukwasele azibuke ngwendi wapwa wa seho manene kuli Yehova. Wendekele ngwendi: “Kakangi munalume wange akanjileke mwanjizemena. Simbu yoshe akanjanukisa bifwa byabibwa binjakala nabyo. Co lalo na babusamba bange bamo banalingi byuma bya kulifwa.” Ngecilika mwa Lidia, hamo kuli umo mu cikungulukilo ceni uje atonda kumukwasa mangana azibisise ngwendi wapwa wa seho kuli Yehova. Mwasa kumukwasa kwitila mu majwi na bilinga byeni byabibwa.
TWASA KULIMONA BATI NGWE MWAKATUMWENA YEHOVA?
14. Mukanda wa 1 Samwele 16:7 utukwasa bati tulimone ngwe mwakatumwena Yehova? ( Taleni lalo cipalo ca “Mwafwa Bika Yehova Wamona Banu Bendi Kupwa ba Seho?”)
14 Anukeni ngweni Yehova kesi kumimona ngwe mubakamimwena baka-kaye. (Tandeni 1 Samwele 16:7.) Yehova kesi kutumona kupwa tu ba seho kwesekesa nomu mutuli na kusholokela, bimbongo bituli nabyo nambe sikola itunakobela. (Isaya 55:8, 9) Ngeci, esekeni kulimona ngwe mwakamimwena Yehova keti ngwe mubakamimwena baka-kaye. Mwasa kutanda mizimbu ya mu Mbimbiliya ije imwesa Yehova mwamwenenenemo banu ba kufwa ngwe Eliya, Naumi na Hana kupwa ba seho manene, nameme bakebo kubalimwene ngoco. Mwasa lalo kusoneka byuma bimunaliwana nabyo bije bimwesa ngwabyo cili bene Yehova wamizema, co wamimona kupwa mu ba seho. Kutundaho, mwasa kutanda biñanda bya mu mabulu etu bije bimwesa ngwabyo twapwa tu ba seho.c
15. Mwafwa bika yehova wamwene Daniele kupwa “munu wa seho manene”? (Daniele 9:23)
15 Zibukeni ngweni kulongwa kweni kumilingisa mupwe mu ba seho manene kuli Yehova. Simbu imo kapolofweto Daniele ‘wazeyele manene.’ Ha simbu ei hamo te ali na myaka ya kutubakana 90. (Dani 9:20, 21) Yehova wamutakamesele bati? Njambi watumine kangelo Gabriele mangana anukise Daniele ngwendi wapwa munu wa seho manene, co malombelo endi banawazibi. (Tandeni Daniele 9:23.) Bika byalingisile Daniele apwe wa seho manene kuli Njambi? Kulongwa na kusungama kwendi bikebyo byamulingisile apwe wa seho manene kuli ikeye. (Ezeki 14:14) Yehova walingisile muzimbu wa Daniele bausoneke mu Mbimbiliya mangana utuzembeleke. (Loma 15:4) Neni mwapwa mu ba seho manene kuli Yehova mwafwa mwapwa mu ba kusungama, co lalo mwapwa ba kulongwa kuli ikeye. Ngecilika mwatolililile ku malombelo a Daniele neni lalo atolilila ku malombelo eni.—Mika 6:8, ftn; Hebe 6:10.
16. Bika byasa kumikwasa mumone Yehova kupwa Ishweni uje wamizema?
16 Moneni Yehova kupwa Ishweni uje wamizema. Ashaka kumikwasa, keti kutondesesa milonga yeni embwe. (Samu 130:3; Mate 7:11; Luka 12:6, 7) Kusinganyekesesa hali ei ñanda kunakwasa banu babangi baje bakalizibi kupwa bangoco. Cakumwenako, ndokazi Michelle wa ku Spain walizibile ngwendi kubamuzemene, co kapwile wa seho. Munalume wendi wakele na kumwendeka mwamubi manene ha myaka yaingi. Ndokazi Michelle wendekele ngwendi: “Ha simbu yoshe injakele na kuliziba kupwa nji wangoco, njakele na kweseka kulimona ngwe Yehova nanjambata mu maboko endi, co ali na kunjimwesa cizemo na kunjinyungilila.” (Samu 28:9) Ndokazi Lauren wa ku South Africa, wendekele ngwendi: “Njakulahela ngwange Yehova wanjimona kupwa nji wa seho mwafwa wanjikokelele kuli ikeye na kunjikwasa njitwaleleleho kushwena kuli ikeye ha myaka yoshe ei ineti na kunjipangesa mu kulongesa bakwetu.”—Iwano 6:44.
17. Bika byasa kumikwasa mukulahele ngweni Yehova wamishaka? (Samu 5:12) (Taleni na cikupulo.)
17 Kulaheleni ngweni Yehova wamishaka. (Tandeni Samu 5:12.) Devidi wesekesele mwatushakela Yehova ku “ntelo yakama” ije ikanyungilila banu ba kusungama. Nga mushangumuka kusinganyeka ngweni kumwapwile mu ba seho, co anukeni ngweni Yehova wamishaka, co amikwasa. Kulinga ngoco kuminyungilila ngwe ntelo yakama. Mwasa kuzibuka bati ngweni Yehova wamishaka? Ngwe mutunamwena, Yehova natuleke mwakalizibila hali yetu kwitila mu Lijwi lyendi Mbimbiliya. Kutundaho, akapangesa bakulunu ba cikungulukilo, babusamba beni na bakweni mu kumyanukisa ngwendi mwapwa mu ba seho kuli ikeye. Bika bimunapande kulinga nga bakweni bendeka byuma byabibwa hali yeni?
Kunanguka ngwetu Yehova watushaka kutukwasa tujeneke kuliziba kupwa tu bangoco (Taleni paragirafu 17)
18. Mwafwa bika munapande kutaba nga munu amishangala?
18 Kumwapandele kubyana nga bakweni baje bamizibuka mwamubwa bamishangala na kwendeka byuma byabibwa hali yeni mwafwa bamizema. Anukeni ngweni hamo Yehova ali na kubapangesa mu kumikwasa muzibuke ngweni wamishaka. Ndokazi Michelle itunabanga kwendeka, wendekele ngwendi: “Kabundondo-kabundondo njili na kulilongesa kukulahela majwi amabwa a ngozi abakanjileke bakwetu. Kukwapwile kwakwasi kukulahela majwi abakanjileke, oloni njizibuka ngwange bikebyo byatonda Yehova ngwendi njilinge.” Bakulunu ba cikungulukilo banakwasa manene ndokazi Michelle amone ngwendi Yehova wamuzema. Hano napu painiya, co akakwasa ha Betheu oku ali na kutunda ku njibo.
19. Bika byasa kumilingisa mukulahele ngweni mwapwa mu ba seho kuli Njambi?
19 Yesu ali na kutwanukisa ngwendi tu ba seho manene kuli Tate yetu wa mwilu. (Luka 12:24) Ngeci simbu yoshe tukulaheleni na kwanuka ngwetu twapwa tu ba seho manene kuli Yehova. Co twesekeni mwoshe mutwasela kukwasa bakwetu balimone ngwabo bapwa ba seho kuli Njambi.
MWASO 139 Lingeni Ngwe Muli mu Kaye Kakaha
a Mazina amo banawatengulula.
b Hamo Maliya Magadalena wapwile umo wa banakazi baje bakele na kukabangeya Yesu. Aba banakazi bakele na kupangesa byuma byabo mu kupangela Yesu na tupositolo bendi.—Mate 27:55, 56; Luka 8:1-3.
c Cakumwenako, taleni capita 24 mu libulu lya Mu Sutelele ku Jehova na kutanda bisoneka na mizimbu ije ili mwisi ya mutwe wa “Kuuwasana” mu libulu lya Bisoneka Bikwasa Baka-Kristu.