Pangeseni “Bwana [Bweni] bwa Sipilitu”

Tukalishongangeya umo na mukwabo mutukasikama na bakwetu baka-Kristu. Nameme ngoco, kutubakana lika kusikama, tunapande kulingako bimo mangana tulishongangeye manene umo na mukwabo. Mbimbiliya inatumbula cashu citwakala naco ca kukanyamesa likulahelo lya bakwetu ngwayo, “bwana bwa sipilitu.” (Loma 1:11, 12) Twasa kupangesa bati obu bwana mu kushula?

Shongangeyeni bakweni kwitila mu byuma bimwendeka. Cakumwenako, nga tuli na kukumbulula ku biwano bya cikungulukilo kutwapandele kwendeka manene ha buyoye bwetu nambe biyongola byetu. Oloni tunapande kwendeka manene byuma bitulilongesa hali Yehova na mu Mbimbiliya na ku bangamba bendi ba kulongwa. Nga muli na bandolome na bandokazi beni, simutwiyeni byuma bije bikanyamesa likulahelo lyabo.

Shongangeyeni bakweni kwitila mu bilinga byeni na byuma bimwangula kulinga. Cakumwenako, mwasa kushongangeya bakweni nga mutwalelelaho mu cipangi ca simbu yoshe nameme muli na kuliwana na bukalu. Mwasa lalo kushongangeya bakweni nga muya ku biwano bya mukati ka calumingo nameme muli na kubinja nambe nga mwajuka mwafwa ya kuzezama manene ku cipangi.

Kuma mukashongangeya bandolome na bandokazi beni kwitila mu byuma bimwendeka na kulinga ndi? Kuma mukananguka bibakendeka na kulinga bandolome na bandokazi beni mu kumishongangeya ndi?