Lucas
8 Ko waanë yˈijty, ta Jesús ojts nyijkxy mët nimäjmajtsk ja yˈapostëlëty mä mëjjatypyë nax käjpn ets nanduˈun mä mutskatypyë, etsë jäˈäy ttuknijawëyaˈany ja oybyë ayuk mëdiˈibë nyimaytyakypy ja Diosë yˈAnaˈam Kyutujkën. 2 Ojts nanduˈun pyanëjkxëdë ja toˈoxytyëjkëty mëdiˈibë nety të tsyoˈok të yˈagëdäˈäktë ets të nyiwäˈätsëdë ja kaˈoybyë, María, mëdiˈibë nanduˈun yajtij Magdalena, ja nety niwëxtujkë kaˈoybyë të tmëdaty, 3 nanduˈunë Juana, ja Cuza kyudëjk, (Cuza yëˈë nety nyiwintsënˈäjtypy ja Herodësë tyëjk), etsë Susana mëdë wiinkpë toˈoxytyëjkëty mëdiˈibë yajtuundë tijaty myëdäjttë parë tpudëjkëdë Jesús mëdë yˈëxpëjkpëty.
4 Nimayë jäˈäy tnimiindë Jesús mëdiˈibë tsoˈondëp wiink nax wiink käjpn ets ta ttukmëtmaytyaktsondakyë yäˈädë ijxpajtën: 5 “Tëgok, ta tuˈugë jäˈäy tsyoˈony nippë. Ko nety nyijkxy nippë, ta ja tëëm ojts nyëˈëgäˈäy tyuˈugäˈäy ets yaˈˈadeˈeny yajtukteˈeny, ets ja joon yëˈë pyiimujk kyoonmujktë. 6 Tam mëdiˈibë ojts kyaˈay tsääjoty ets ko myujxy, ta ënetyë tyëtsy jaˈa ko kyaj nety xyoogëty ja nax mä të myuxyën. 7 Tam mëdiˈibë kugäˈäjë apynyoty* ets ko ja apyny nyiyoombajtääyë, ta kyaj nyekyyoongeky. 8 Tam mëdiˈibë kugäˈäjë mä oynyaxën ets ko yoony, ta tyëëmbejty 100 duˈunën”. Ko Jesús tnimaytyaktääyë yäˈädë ijxpajtën, ta yˈakjënany: “Ja mëdiˈibë mëdoop, waˈan yajxon tmëdoowgukë”.
9 Per ja yˈëxpëjkpëty, ta yajtëëwëdë ti yˈandijpy ja ijxpajtën. 10 Jesús ta yˈatsooy: “Mijtsëty të myajtukjaygyukëdë mëdiˈibë netyë Dios yaˈijtypy yuˈutsy mä ja yˈAnaˈam Kyutujkën, per yëˈëjëty kyaj yajtuknijawëdë. Päätyëts nyajtunyë ijxpajtën kojëts nmëtmaytyäˈäktë, yëˈë ko oy jyaˈixtë, per duˈunxyëp ixtëm kyaj yˈixtë ets oy jyamëdowdë kyaj tjaygyukëdë. 11 Wenë, ja tëëm yëˈë yˈandijpy, ja Diosë yˈayuk. 12 Ja tëëm mëdiˈibë käˈä nëˈääy tuˈääy, yëˈë yajmaytyaktëp pënaty jyaˈoymyëdoowdëp ja Diosë yˈayuk, per ta net myiny ja Mëjkuˈu ets dyajpëtsëmy mä jäˈäyë jyot kyorasoon parë kyaj tmëbëktët ets kyaj nyitsoˈoktët. 13 Ja tëëm mëdiˈibë kugäˈäjë tsääjoty, yëˈë pënaty jyamëdoowˈijttëp ja Diosë yˈayuk ets ënetyë tkupëktë xondaˈakyˈääw xondaˈakyjyot. Per kyaj kyëktëkëdë ja tyikts yˈääts ets jeˈeyë tuktiempë tˈoymyëdowdë Diosë yˈayuk. Ko tpäättë amay jotmay, ta tmäjtstuˈuttë. 14 Ja tëëm mëdiˈibë kugäˈäjë apynyoty, yëˈë pënaty jyaˈoymyëdoowdëbë Diosë yˈayuk, per mët ko tijaty tmëmay tmëdäjtë, ko nyaytyukwinˈëënëdë ja meeny sentääbë ets ko yëˈëyë ttukxondäˈäktë tijaty jaˈäjtp yä naxwiiny, duˈunxyëp ixtëm nyiyoombety ja tëëm ets pääty kyaj tyëëmbety. 15 Ja tëëm mëdiˈibë kugäˈäjë mä oynyaxën, yëˈë pënaty myëdoowˈijttëp ets kyupëjktëp amumduˈukjot ja Diosë yˈayuk ets pyëjkëˈktëp mä jyot wyinmäˈäny. Yäjktëbë tyëëm oy nuˈun tpäättë amay jotmay.
16 Nipën tkayajtoyiˈiky ja lamprë mëdiˈibë yajtuumbyë aseytë ets ta net jeˈeyë tkujujpnë o tpëjktaˈaky määbajnbäˈtkëˈëy, niˈigyën tpëjktaˈaky këjxm mä mbäät kyudëˈkxy kyujäjy. 17 Jaˈa ko tijaty ijtp kuyuˈutsy, yajnijawëyäämp ets tijaty ijtp niwitsy nijuuxy, nigëxëˈëgäämp, yëˈë ko nitii xëmë kyaˈity kuyuˈutsy. 18 Pääty jaygyukëdë yajxon, jaˈa ko mëdiˈibë tijaty myëdäjtypy, niˈigyë yˈakˈyajmoˈoyaˈany, per ja mëdiˈibë kyaj ti tmëdaty, yajpëjkëyäämp axtë yëˈëbäät mëdiˈibë wyinmaapy ko myëdäjtypy”.
19 Ta jyajty ja Jesúsë tyääk ets ja myëgaˈaxëty, per kyaj mbäät tyëjkëdë, yëˈë ko nëgooyë nety japë mayjyaˈaynyë. 20 Ta Jesús yaˈˈanëmääy: “Tap mˈëwxitëdë tëjkˈagëˈp ja mdääk ets ja mmëgaˈaxëty, mijts mˈixanëdëp”. 21 Jesús ta yˈatsooy: “Yëˈëjëts ndääkˈäjtypy etsëts nmëgaˈaxˈäjtypyë yäˈädë jäˈäyëty mëdiˈibë myëdoowˈijttëbë Diosë yˈayuk ets kyuytyuundëp”.
22 Tëgok, ta Jesús ojts tyëkë barkëjoty mëdë yˈëxpëjkpëty ets tˈanëmääy: “Nˈoknäjxëm ximtsow mejyˈawinm”. Ta net ojts nyëjkxtë. 23 Per mä nety jam tyuˈuyeˈeytyë, ta ajotkumonë myiiny ja mëk poj ets ja mejy jyantsy pyëdëˈky këjxmaty, ta ja komnëë tyëjkë mä ja barkë ets jawaanë kyakiiny.* Perë Jesús të nety myäänaxy. 24 Ta ja yˈëxpëjkpëty ojts yuxëdë ets yˈanëmääyëdë: “¡Yaˈëxpëjkpë!, ¡Yaˈëxpëjkpë! ¡Tyap nˈoogäˈänënë!”. Ta Jesús pyëdëˈky, ojts tˈojy ja poj ets ja mejy, ta duˈunyë myoongëdaktääy. 25 Ta netë Jesús dyajtëëyë yˈëxpëjkpëty: “¿Ti kyaj xymyëbëktë ko Dios mbäät mbudëkëdë?”. Yëˈëjëty nëgooyë ojts nyayˈatsëˈkëndë ets mëjˈixy mëjmëdoy tjäˈäwëdë, ta nyayjyënanëdë: “¿Pën tëyë yäˈädë yeˈeytyëjknë? Axtë yëˈëbäädë poj etsë mejy myëmëdoowënë”.
26 Ta net jam jyäjttë mejybyëˈääy mä ja yˈit nyaxwinyëdë Gerasa, jatsow Galilea mejyˈawinm. 27 Jantsy jeˈeyë Jesús pyëtsëëmy barkëjoty, ta nyimiinë tuˈugë yeˈeytyëjk mëdiˈibë netyë kaˈoybyë të tyuktëkëty. Yäˈädë yeˈeytyëjk kyaj nety yˈoktsënääynyë mä tyëjk, jamë nety tsyënääynyë mä oˈkpë nyaxtëkëdë ets niwäˈäts ëxwäˈätsë nety jyëdijnë. 28 Ko tˈijxpatyë Jesús, ta mëk yaxkeky ets nyaygyoxtënääytyakë. Duˈun tˈanëmääy: “Jesús, ja Diosë tsäjpotmëdë yˈUˈunk, ¿ti yää të xynyiminy? Tunë mayˈäjtën këdiits xytyëytyunët”. 29 Jesús të nety kanääk ok tˈanëëmë ja kaˈoybyë ets ttukpëtsëëmduˈudët taabë jäˈäy. Yëˈë ko yäˈädë kaˈoybyë kanääk okë nety të ttuktëkë yäˈädë yeˈeytyëjk ets të nety kanääk ok nanduˈun yajkëˈëwëëny yajtekywyëëny mëdë kadenë, per duˈunyë tpojtwäˈkxtääy. Ets oyë nety jyayajkuentëˈaty, duˈunyëm ja kaˈoybyë yajnëjkxyë mä lugäärë abaktuuybyë. 30 Jesús ta yajtëëwë: “¿Ti mxëëw?”. Yëˈë ta yˈatsooy: “Legión”.* Jaˈa ko yäˈädë jäˈäy nimayë netyë kaˈoybyë të tyuktëkëty. 31 Ta mëktaˈaky tˈanëmääytyë Jesús ets kyaj kyugaxëdët këkjutoty.* 32 Ets kom tamë nety nimayë ëtsëm jyëˈkxtë kopkwinm, ta ja kaˈoybyëty mëktaˈaky tˈanëmääytyë Jesús ko jap kyugaxëdët, ets ta jap kyugajxëdë. 33 Ta ja kaˈoybyëty ttukpëtsëëmduttë ja yeˈeytyëjk ets ttuktëjkëdë ja ëtsëm. Ta ja ëtsëm kyupujtnäjxtääytyë mejyˈjyoty ets jap nyëëjiˈkxtääytyë.* 34 Ko ja ëtsëm kuentëˈäjtpëty duˈun tˈijxtë, ta kyaktääytyë ets ttukmëtmaytyaktë jäˈäy, duˈun käjpnoty ets nanduˈun kamoty tuˈujoty ti nety të tyunyë jyatyë.
35 Ta nimayë jäˈäy myiindë ets tˈixäˈändë. Ko jyäjttë mä Jesús, nëgooyë ojts nyayˈatsëˈkëndë ko tˈijxtë ja yeˈeytyëjk mëdiˈibë nety ja kaˈoybyë të tyukpëtsëëmduˈutyë, tam twinˈuˈuny twintsëënë Jesús, wijy kejy ets të nety ttuktëkë ja wyit. 36 Pënaty yˈijxtë, ta tnimaytyaktë wiˈixënë yäˈädë yeˈeytyëjk të tyukpëtsëëmduˈutyë ja kaˈoybyë. 37 Nimayë jäˈäyëty mëdiˈibë nety tsënääytyëp mä yˈit lugäärë Gerasa, ta tˈamdoow tpëjktsoowdë Jesús ets nyëjkxët wiink it wiink lugäär yëˈë ko nëgooyë nety tsyëˈkëndë. Ta netë Jesús ojts tsyoˈonë barkëjoty. 38 Ta ja jäˈäy mëdiˈibë nety ja kaˈoybyë të tyukpëtsëëmduˈutyë tˈamdooy tpëjktsooyë Jesús ets mëët nyëjkxët. Per kyaj wyoownëjkxanë, duˈun yˈanëmääyë: 39 “Nëjkx mä mdëjkën ets tukmëtmaytyäˈägë jäˈäy tijatyë Dios të mdukmëdunyë”. Ta ojts ja jäˈäy nyijkxy ets ojts tnigajpxy tnimaytyaˈaky tijatyë netyë Jesús të tyukmëdunyë.
40 Ko Jesús jatëgok jyëmbijty Galilea, tamë nety ja mayjyaˈay jyëjpˈijxënë ets oy ojts yˈagëˈë yˈaxäjëdë. 41 Ets jam nyimiinë Jairo, tuˈugë wintsën mëdiˈibë nety tuump mä judiyëtëjk tyuˈukmuktë. Ta twingoxtënääyë Jesús ets tˈamdooy tpëjktsooy ets nyinëjkxëdët mä tyëjk, 42 jaˈa ko ooganëbë nety ja nyëëx, mëdiˈibë mäjmajtskë jyëmëjt, ets yëˈëyë nety tuˈuk nyëëxˈäjtypy.
Ko Jesús ojts nyijkxy, nimayë jäˈäy ojts pyanëjkxëdë ets nëgooyë nyastij nyaskojtëndë. 43 Tamë nety nanduˈun pyanëjkxyë tuˈugë toˈoxytyëjk mëdiˈibë myëdäjnëp mäjmajtsk jëmëjtë windaxyë* päˈäm ets nipënë nety mbäät kyayajtsoˈoky kyayaˈˈagëdaˈagyë. 44 Ta yäˈädë toˈoxytyëjk tmëwingoonyë Jesús jëxkëˈptsoow ets ojts ttoonë ja wyitpäˈä, ta ënetyë tsyoky yˈagëdaky. 45 Jesús ta dyajtëëy: “¿Pënëts të xytyony?”. Per nipën kyaˈˈatsooy, ta Pedro yˈanëmääyë: “Yaˈëxpëjkpë, kyaj yajnijawë yëˈë ko nëgooyë mayjyaˈay mnastij mnaskojtënë”. 46 Jesús ta jyënany: “Per tëjëts nyajtony mët ko tëëtsë nmëkˈäjtën pyëtsëmy”. 47 Ko ja toˈoxytyëjk tˈijxy ko kyaj yˈoyëty tkuyuˈutsët mëdiˈibë nety të ttunyën, ta jyantsy tsyëˈkë ets twingoxtënääyë Jesús, ta ttukmëtmaytyaky mayjyaˈay wyinduuy tiko netyë wyit të ttoonë ets ko pojënë nety të tsyoˈoky të yˈagëdaˈaky. 48 Jesús ta yˈanëmääyë: “Uˈunk, të mtsoˈoky mët ko xymyëdatyë mëbëjkën. Nëjkx, këdii tii xymyëmay xymyëdäjy”.
49 Tamnëmë nety Jesús myaytyaˈaky, ko myiiny tuˈugë jäˈäy mëdiˈibë tsoˈomp mä Jairo tyëjk. Ta Jairo yaˈˈanëmääy: “Nëgoobë wiˈix xyˈakˈanëëmë ja Yaˈëxpëjkpë. Të ja mnëëx yˈoˈknë”. 50 Ko duˈunë Jesús tmëdooy, ta tˈanëmääyë Jairo: “Këdii mmay mdäjy, mmëbëkë Dios etsë mnëëx jukyˈatäämp”. 51 Ko jyäjttë mä Jairo tyëjk, yëˈë jeˈeyë mëët tyëjkëdë Pedro, Juan, Santiago ets ja kixyˈuˈungë tyääk tyeety. 52 Tapë netyë mayjyaˈay jyantsy jyëˈëy jyantsy yäˈäxtë ets nëgooyë nyaygyuj nyaywyojpëndë. Päätyë Jesús tˈanëmääy ja mayjyaˈay: “Këdii nëgoo mjëˈëy mˈyäˈäxtë, yäˈädë kixyˈuˈunk kyaj të yˈooky, määp jap jeˈeyë”. 53 Ko duˈun tmëdoowdë jeˈeyë tnëxik ttukxiktë Jesús, pes nyijäˈäwëdëbë nety ko të yˈoˈknë. 54 Ta Jesús tkëˈëmëmäjtsë ets tˈanëmääy: “Kixyˈuˈunk, ¡Pëdëˈëk!”. 55 Ta ja kixyˈuˈunk jyukypyijky* ets ta ënetyë pyëdëˈky. Ta Jesús ojts tniˈanaˈamë ets dyajkaytyët. 56 Nëgooyë ojts xyondaknëdë ja tyääk tyeety, perë Jesús ta yˈanëmääyëdë ko kyaj pën ttukmëtmaytyäˈäktët ti nety të tyunyë jyatyë.