Ko nety mduktëkëty tsëˈëgë, pawinmay ti Jyobaa tyunaampy mä tiempë myiny kyëdaˈaky ko nety kyaj yˈokˈanaˈamnë Satanás. Mä asamblee tëgëk xëëbë mëdiˈibë tuunë 2014, ojts tuˈugë nmëguˈukˈäjtëm dyajnaxyë demostrasyonk mëdë fyamilyë mä tnimaytyaktë wiˈixxyëp njukyˈäjtëm mä ja tsujpë it lugäär koxyëp duˈun jyënaˈany 2 Timoteo 3:​1-5: “Mä ja jembyë jukyˈäjtën jantsy agujk jotkujk njukyˈatäˈänëm. Mët ko ja jäˈäyëty tsyokandëp ja jyëëky myëguˈuk, tsyokandëp ja Diosë tyëyˈäjtën, yujy tudaˈaky jyaˈayˈatäˈändë, wyingutsëˈëgëyandëbë Dios, myëmëdowandëbë tyääk tyeety, kyukäjpxëyandëp tijaty, ak oy tijaty ttunäˈändë, naytsyokanëdëp, nayjyaygyukëyanëdëp, kyaj pën nyaynyiˈojëyaˈanyë, nayˈaguwitsëyanëdëp, kyaj awäˈän jyaˈayˈatäˈändë, yëˈë tsyokandëp mëdiˈibë oy, yajtukjotkujkˈatandëp, jaygyukëyandëp, kyaj nyayjyawëyäˈänëdë mëj këjxm, yëˈë tsyokandëbë Dios këdiinëm ja xondakën ets amumduˈukjot tmëdunäˈändë. Mmëwingondë yëˈëjëty”. ¿Nnimaytyakëm xëmë mëdë familyë etsë nmëguˈukˈäjtëm wiˈix njukyˈatäˈänëm mä ja tsujpë it lugäär? w24.01 paj. 6 parr. 13, 14

¡Jantsy jotkujk nnayjyäˈäwëm ko ‘Dios tyukxondakypy yëˈë nyax kyäjpn’! (Sal. 149:​4, TY). Per mbäät näägë nmëguˈukˈäjtëm tëgatsy nyayjyawëdë etsë net wyinmaytyë: “Dios jyantsy tyukxondakypyë nyax kyäjpn, per ¿nan xytyukxondakpëtsëdaa?”. Nimayë Diosmëduumbëty mëdiˈibë tëëyëp jukyˈäjttë nanduˈun wyinmääytyë (1 Sam. 1:​6-10; Job 29:​2, 4; Sal. 51:11). Biiblyë xyˈanmäˈäyëm ko oy pokyjyaˈay nyajpatëm mbäädë Jyobaa xykyupëjkëm. ¿Ti tsojkëp nduˈunëm? Nyajnigëxëˈkëm ko nmëbëjkëmë Jesus ets nnëbajtëm (Fwank 3:16). Duˈunë nety nyajnigëxëˈkëm mayjyaˈay wyinduuy ko të njodëmbijtëm ets ko të Dios ndukwandakëm ko nmëdunäˈänëm (Apos. 2:38; 3:19). Jyobaa jantsy jotkujk nyayjyawëty ko duˈun nduˈunëm parë niˈigyë nmëwingoˈonëm. Pën nduˈunëmë mëjääw parë nguytyuˈunëm extëmë Jyobaa ojts ndukwandakëm, ta oy mëët nˈijtëm ets xykyupëjkëm (Sal. 25:14). w24.03 paj. 26 parr. 1, 2

Mbäät nanduˈun nduˈunëm extëm ja Jesusë yˈëxpëjkpëty ko ja kuduunktëjk dyajkuboktët nˈëwäˈkx ngäjpxwäˈkxëm. Ëtsäjtëm, mbäät nanduˈunë Jyobaa nˈamdoˈowëmë wijyˈäjtën etsë jotmëkˈäjtën. Ets nˈijtëm seguurë ko xypyudëkëyäˈänëm parë duˈunyëm ngäjpxwäˈkxëm. Nˈokˈanmäˈäyëmë Jyobaa parë xypyudëjkëm ets nmëmadakëmë amay jotmay. Tyam wiˈixëmë amay jotmay nbatëm, waˈan nyubajt nbäˈämbajtëm, yˈoogyë jëëky mëguˈuk, jyamˈatyë jotmay mä familyë ets ko nyajtukmëtsipˈäjtëm ko nDiosmëduˈunëm. Per niˈigyë nˈamaybyat njotmaybyatëm ko jyaˈˈatyë päˈäm mëdiˈibë ninäjxp ets ko xitsoow yatsoowë jäˈäy tsyiptundë. Pääty mëdiˈibë mbäät xytyuny, yëˈë xyaˈˈawäˈätsëdë mjot mgorasoon ets xytyukmëtmaytyäˈägëdë Jyobaa wiˈix mnayjyawëty. Duˈunxyëp extëm xytyukmëtmaytyaˈaky tuˈugë mmëtnaymyaayëbë. Ets mbäät mˈity seguurë ko Jyobaa mbudëkëyanëp (Sal. 37:​3, 5). Ko xëmë nnuˈkxtakëm, mbäät xypyudëjkëm parë nmëmadakëmë amay jotmay (Rom. 12:12). Jyobaa nyijäˈäwëp wiˈix jyat kyëbattë pënaty mëduunëdëp ets “myëdoopy ko yˈamdoy pyëjktsoyëtyë naybyudëkë” (Sal. 145:​18, 19). w23.05 paj. 5, 6 parr. 12-15