Mateo
1 Mä yäˈädë liibrë yajnimaytyaˈaky mä tsyoˈonyë tyëëm yˈäätsë Jesukristë,* ja myiiny mä tyëëm yˈäätsë David ets mä Abrahán.
2 Abrahán yëˈë yˈuˈunkˈäjtë Isaac;
Isaac yëˈë yˈuˈunkˈäjtë Jacob;
Jacob yëˈë yˈuˈunkˈäjtë Judá ets ja myëgaˈaxëty;
3 Judá yëˈë yˈuˈunkˈäjtë Pérez etsë Zérah, ets yëˈë tyääkˈäjtë Tamar;
Pérez yëˈë yˈuˈunkˈäjtë Hezrón;
Hezrón yëˈë yˈuˈunkˈäjtë Ram;
4 Ram yëˈë yˈuˈunkˈäjtë Aminadab;
Aminadab yëˈë yˈuˈunkˈäjtë Nahsón;
Nahsón yëˈë yˈuˈunkˈäjtë Salmón;
5 Salmón yëˈë yˈuˈunkˈäjtë Boaz, ets yëˈë tyääkˈäjtë Rahab;
Boaz yëˈë yˈuˈunkˈäjtë Obed, ets yëˈë tyääkˈäjtë Rut;
Obed yëˈë yˈuˈunkˈäjtë Jesé;
6 Jesé yëˈë yˈuˈunkˈäjtë rey David.
David yëˈë yˈuˈunkˈäjtë Salomón, ets yëˈë tyääkˈäjt ja mëdiˈibë kyudëjkˈäjtë Urías;
7 Salomón yëˈë yˈuˈunkˈäjtë Rehoboam;
Rehoboam yëˈë yˈuˈunkˈäjtë Abías;
Abías yëˈë yˈuˈunkˈäjtë Asá;
8 Asá yëˈë yˈuˈunkˈäjtë Jehosafat;
Jehosafat yëˈë yˈuˈunkˈäjtë Jehoram;
Jehoram yëˈë yˈuˈunkˈäjtë Uzías;
9 Uzías yëˈë yˈuˈunkˈäjtë Jotán;
Jotán yëˈë yˈuˈunkˈäjtë Acaz;
Acaz yëˈë yˈuˈunkˈäjtë Ezequías;
10 Ezequías yëˈë yˈuˈunkˈäjtë Manasés;
Manasés yëˈë yˈuˈunkˈäjtë Amón;
Amón yëˈë yˈuˈunkˈäjtë Josías;
11 Josías yëˈë yˈuˈunkˈäjtë Jeconías ets ja myëgaˈaxëty, ja tiempë mä ojts yajmënëjkxtë Babilonia.
12 Jeconías yëˈë yˈuˈunkˈäjtë Sealtiel ko jyäjttë Babilonia;
Sealtiel yëˈë yˈuˈunkˈäjtë Zorobabel;
13 Zorobabel yëˈë yˈuˈunkˈäjtë Abiud;
Abiud yëˈë yˈuˈunkˈäjtë Eliaquim;
Eliaquim yëˈë yˈuˈunkˈäjtë Azor;
14 Azor yëˈë yˈuˈunkˈäjtë Sadoc;
Sadoc yëˈë yˈuˈunkˈäjtë Aquim;
Aquim yëˈë yˈuˈunkˈäjtë Eliud;
15 Eliud yëˈë yˈuˈunkˈäjtë Eleazar;
Eleazar yëˈë yˈuˈunkˈäjtë Mattán;
Mattán yëˈë yˈuˈunkˈäjtë Jacob;
16 Jacob yëˈë yˈuˈunkˈäjtë José, ja myëmëjjäˈäyë María, ets yëˈë yˈuˈunkˈäjtë Jesús mëdiˈibë yajtijp Kristë.
17 Pääty jaa nyajxy mäjmäjkts naskaˈaxë, tsyondaky mä Abrahán ets kyugëjxë mä David, mäjmäjkts naskaˈaxë jatëgok nyajxy mä David axtë ko ojts yajmënëjkxtë Babilonia, ets mäjmäjkts naskaˈaxë yˈaknäjxy ko ojts yajmënëjkxtë Babilonia, taanëm myaxuˈunkˈäjtyë Kristë.
18 Ta net ja Jesukristë myiiny jyajty, María të nety nyaygyajpxyë pyëkäˈäny mëdë José, mä kyajnëm pyëktë, ta mët yëˈëgyëjxm ja Diosë myëjääw* ojts wyëˈëmy* uˈunkmëët. 19 José jantsy oyë nety jyaˈayˈaty, kyaj nety ttsoky etsë María dyajnaxët ja tsoytyuˈun. Pääty ttukniwinmäˈäyë ko niˈik oy ko kyaj mëët pyëkët.* 20 Mä nety duˈun të ttuknibëjktäägë, ta tsuujoty kumäˈäyotyë Jyobaa* yˈanklës myëgäjpxë ets yˈanëmääyë: “José, tyëëm yˈäätsë David, këdii mtsëˈëk mjawë xywyowëdë María ets xykyudëjkˈatët, mët ko ja uˈunk mëdiˈibë nyikëjxmˈäjtypy të nyaxkëdaˈaky mët yëˈëgyëjxmë Diosë myëjääw. 21 Yëˈë yajmaxuˈunkˈataampy tuˈugë mixyˈuˈunk ets jaa xyëëwmoˈoyët Jesús,* mët ko yëˈë yajnitsoˈogaampy ja kyäjpn ko dyaˈˈawäˈätspëtsëmët mä poky kaytyey”. 22 Tukëˈëyë duˈun tyuunë jyäjtë ets yˈadëwët mëdiˈibë netyë Jyobaa të tnaskäjpxë mët yëˈëgyëjxm ja kyugajpxy: 23 “¡Okmëdowdë! Tuˈugë kiixy mëdiˈibë ninäˈänëmë yeˈeytyëjk tkamëttsëënë uˈunkmëët wyëˈëmäˈäny* ets dyajmaxuˈunkˈatäˈäny tuˈugë mixyˈuˈunk mëdiˈibë yajxëëwmoˈoyëp Emmanuel”, mëdiˈibë yˈandijpy “Dios yajpääty mët ëjtsäjtëm”.
24 Ko José ojts myaˈaywyijy, ta duˈun ttuuny ixtëmë Jyobaa yˈanklës yˈanëmääyë ets twooy ja María parë tkudëjkˈatäˈäny. 25 Per kyaj yˈijty tsyënääy mëdë María ixtëmë kasäädë jäˈäy yˈit tsyëënëdë, jaanëm ko myiiny jyajty ja uˈunk. Ets jaa txëëwmooy, Jesús.