Mateo
20 Jesús jyënany: “Ja tsäjpotmëdë Kutujkën, duˈun ixtëm tuˈugë jäˈäy mëdiˈibë tsojk ojts tsyoˈongojy parë tˈëxtäˈäy ja tyuumbëtëjk ets jam dyajtunäˈäny mä yˈuubës kam. 2 Ko tpaty ja tuumbëtëjk, ta tˈanëmääy ko tuk denaaryë* tmëjuyaˈany tukxëëw, ets ko tkupëjktë ta tkejxy mä yˈuubës kam. 3 Ja nety naa a las 9 ko jatëgok tsyoˈony ja kugam ets tˈijxy ko tamë mayjyaˈay tyanëdë määyoty mëdiˈibë kyaj ja tyuunk tpäättë. 4 Ta tˈanëmääy: Nëjkx nanduˈun mdundë mäjëtsë nˈuubës kam ets oy nmëjuyäˈändë. 5 Ta ojts nyëjkxtë tuumbë, ta ja kugam jatëgok tsyoˈony naa kujkxyëëwën, ets jatëgok naa a las 3, nanduˈun jatëgok tˈanëmääy ja jäˈäyëty parë nëjkx tyundë mä yˈuubës kam. 6 Ta ja kugam yˈaktsoˈony naa a las 5 ets dyajtëëy ja tuumbëtëjk: Tiko yä xënaxy mdanëdë, ¿ti këdii mduunk të xypyäättë? 7 Ta yˈatsoowdë: Nipënëts të xykyaˈˈanuˈkxtë, ta ja kugam yˈanëmääyëdë: Nëjkx nanduˈun mdundë mäjëtsë nˈuubës kam.
8 Ko ojts tsyuˈujënë, ta ja kugam tˈanëmääy ja mëdiˈibë nety nyiwintsënˈäjtypy ja tuumbëtëjk: Mëgäjpx ja tuumbëtëjk ets xymyëjuytyët. Yëˈë jawyiin mëjuyëp ja mëdiˈibë ok të tyëkëdë tuumbë. 9 Ta myiindë ja mëdiˈibë nety të tyëkëdë tuumbë naa a las 5, ets yajmëjuuytyë tuk denaaryë.* 10 Pääty ja mëdiˈibë jawyiin tëjkëdë tuumbë niˈigyë tjëjpˈijxtë yajmëjuytyët, per nan jeˈeyë tuk denaaryë* yajmëjuuytyë. 11 Ko ojts tˈaxäjëdë ja myëjuˈuyën, ta axëëk tnimaytyaktë ja kugam, 12 pääty tˈanëmääytyë: ¿Tikots tuknax xymyëjuytyë? Yëˈëjëty jeˈeyë tuk oorë të tyundë ets ëjtsëty xëëwˈamëts të nwinˈan të njëjpˈandë. 13 Ta ja kugam yˈatsooy: Mmëguˈuk, kyaj yam wiˈix nduny, ¿këdii duˈun të nnaygyäjpxëm ko jeˈeyë tuk denaaryë* nmëjuyaˈany? 14 Axäjë ja mëjuˈuny ets mnëjkxët, tuknax nmëjuyäˈändë mët pënaty ok të tyëkëdë tuumbë. 15 Ëjts nnijäˈäwëp wiˈixëts nyajtunäˈänyë nmeeny nsentääbë, ¿o yëˈëtsën xytyukˈaxëkˈijxp kojëts nˈoyjyaˈaytyaˈagyë? 16 Nimay mëdiˈibë tyam ëxˈok nëjkxtëp, jëjpˈam wyëˈëmäˈändë* ets mëdiˈibë jëjpˈam nëjkxtëp, ëxˈok nyaxäˈändë”.
17 Jamë netyë Jesús pyäˈtëkë Jerusalén ko abëky tmëtmaytyaky ja nimäjmajtskpë yˈëxpëjkpëty. Duˈun tˈanëmääy: 18 “Taa njäˈtäˈänënë Jerusalén, jam ja Naxwinyëdë jäˈäyë yˈUˈunk yajkëyakäˈäny mä ja saserdotë wintsënëty ets pënaty jyaaytyëbë ley. Jam nanduˈun yajniˈanaˈamëyaˈany ets yˈoogët 19 ets yajtukëdëkëyaˈany ja jäˈäyëty mëdiˈibë kyaj jyudiyëˈattë, tnëxiˈigäˈän ttukxiˈigäˈändë, twopäˈän tkäˈätsäˈändë, tkëxwopäˈändë kepykyëjxy parë jam yˈook tyëgoyët ets kyumdëgëëk xëëw jyukypyëkäˈäny”.
20 Ta ja Zebedeo kyudëjk tnimiinyë Jesús mët nimajtskë myäänk ets nyaygyoxtënääytyakë parë tˈamdowäˈänyë mayˈäjtën. 21 Ta Jesús yajtëëwë: “¿Ti mˈamdowaampy?”. Ta ja toˈoxytyëjk yˈatsooy: “Tunë mayˈäjtën yëˈë nˈamdowaampy etsëts nimajtskë ja nmäänk yˈuˈunyëdët mä myajkutukäˈänyën, tuˈuk mˈaˈoytsyoow* ets jatuˈuk mˈanäjnytsyoow”. 22 Jesús ta tˈatsooy: “Kyaj xynyijawëdë ti mˈamdoowdëp, ¿mdukˈuugëdëp nanduˈun ja kopë mëdiˈibëts ndukˈuugëyaambyën?”. Net yˈatsoowdë: “Ndukˈuugëdëbëts”. 23 Netë Jesús yˈanëmääyëdë: “Mbäät nˈukmujkëm mäjëtsë ngopë, jeˈeyë ko yëˈëyëtsë nDeety nyijäˈäwëp pënatyën uˈunyëyäämp* nˈaˈoytsyoowëts ets nˈanäjytsyoowëts. Ëjts kyajëts xypyaaty nwinˈixët pënaty jam mbäät yˈuˈunyë”.
24 Ko duˈun tnijäˈäwëdë ja nimäjkpë yˈëxpëjkpëty, ta ttukjotˈambëjktë ja myëguˈuk. 25 Netë Jesús dyajtuˈukmujktääy ja yˈëxpëjkpëty ets tˈanëmääy: “Mnijäˈäwëdëp ko pënaty anaˈamdëp yä naxwiiny, yëˈë yˈanaˈamdëp ja nax käjpn, ets pënaty ijttëp mëj, myëdäjttëp ja kutujkën mä jäˈäyëty. 26 Per mijtsëty kyaj mbäät duˈun mjäˈäyˈattë, ja mëdiˈibë mëj itäämp, tsojkëp tmëdunët ja myëguˈuktëjk. 27 Ets ja mëdiˈibë jawyiinˈatäämp, tsojkëp nyaybyëjktäˈägëdët ixtëm tuˈugë mëduumbë mä ja myëguˈuktëjk. 28 Duˈunën ttuuny ja Naxwinyëdë jäˈäyë yˈUˈunk ko myiiny yä naxwiiny. Kyaj myiiny ets yajmëdunäˈäny, yëˈë duˈun parë tmëdunäˈäny ja wiink jäˈäy ets tnikëbajtuˈudäˈäny ja mayjyaˈay ko tkëyakët ja jyukyˈäjtën”.
29 Ko tsyoˈondë jam Jericó, ta ja mayjyaˈay pyatsoˈonëdë. 30 Tamë nety mëjtuˈuˈääy nimajtskë yeˈeytyëjk yˈuˈunyëdë mëdiˈibë kyaj yˈixtë, ko tnijäˈäwëdë tamë Jesús nyaxy, ta tpayax tpajojktë: “¡Wintsën, Davitë yˈUˈunk, paˈˈayoowdëgëts!”. 31 Ta ojtsë jäˈäy yˈojjëdë ets yˈanëmääyëdë ko waˈan tˈamondë, per yëˈëjëty waanë niˈigyë tyëjkëdë yax jojkpë: “¡Wintsën, Davitë yˈUˈunk! ¡Paˈˈayoowdëgëts, tunë mayˈäjtën!”. 32 Ta Jesús ojts tniwäˈkˈoyë ets tˈanëmääy: “¿Ti ndukpudëkëdëp?”. 33 Ta yˈatsoowdë: “Wintsën, yaˈijxpëjktëgëts”. 34 Jesús nëgooyë ojts tpaˈˈayoownëdë, ta ojts ttoonë ja wyiin ets ënetyë yˈijxpëjktë. Ta tpatsoˈondë Jesús.