Myëtnaymyaayëbë Dios jyukyˈatäˈändë mä ja it lugäärë tsujpë yä Naxwiiny

Ja jukyˈäjtënë mä ja it lugäärë tsujpë kyaj dyëˈënˈatäˈäny extëm tyam yˈixëtyë jukyˈäjtën. Dios ninäˈä tkatsojky etsë Naxwinyëdë yˈitët tuktiky mëdë amay jotmay, pëjk adoˈonën etsë ayoˈon. Dios yajjëmbitaambyë Naxwinyëdë tsuj. ¿Wiˈix yˈixˈatäˈäny? Nˈokˈijxëm wiˈixë Biiblyë jyënaˈany.

Oyjyaˈayëty. Yëˈë myëtnaymyaayëbë Dios tsyëënëyäˈändë mä ja it lugäärë tsujpë. Nyaytyukmëdunäˈänëdë oyˈäjtënë nixim niyam ets ttukjukyˈatäˈändë Jyobaa nyëˈë tyuˈu (Proverbios 2:21; 1 Fwank 2:17).

Mayë jeˈxy peky. Mä ja it lugäärë tsujpë, kyaj pën dyajnaxäˈänyë yuu. Biiblyë jyënaˈany: «Ni näˈä kyanakyˈayowët mët ja yuu es ja tëëtsë» (Diˈibʉ Jatanʉp [Apocalipsis] 7:16).

Oyatypyë jëën tëjk etsë tuunk diˈib yajtukxondakp. Ko tyäˈädë Naxwinyëdë nety të jyëmbity tsuj, tëgekyë familyë tmëdatäˈändë kyëˈëmjëën kyëˈëmdëjk, ets niˈamukë jäˈäyëty tmëdatäˈändë tyuunk diˈib tyukxondäˈägëp (Isaías 65:21-23).

Tuˈugyëˈäjtënë abëtsemy Nyaxwinyëdë. Ninäˈä kyaneky tsyiptunäˈändë ets kyaneky yˈoogäˈändë jäˈäy mä tsip. Diosë yˈAyuk jyënaˈany: «Dios kyaj yajnaymyëtsipˈatyëty. Yëˈë yajkypyë tiˈigyëˈat» (1 Korintʉ 14:33).

Oyˈäjt mëkˈäjtënë. Biiblyë twandaˈaky: «Ni tuˈuk diˈib tsënaapy [mä ja tsujpë it lugäär] kyaj jënäˈänäˈäny: Pëjkëbëts» (Isaías 33:24, Nuevo Mundo [NM]). Kyaj nandëˈën yˈokjamˈatanë tekymyäˈät, wiints, nat etsë uum (Isaías 35:5, 6).

Kyaj yˈokjamˈatanë amay jotmay, pëjk adoˈonën ets ni oˈkën. Diosë yˈAyuk jyënaˈany: «Netë Dios dyajjëgaˈagët ja oˈkën, ja mäˈäjy täjën, es ja pëjk adoˈonën, dëˈën kyaj nakyjëˈëjy nakyyaxëm» (Diˈibʉ Jatanʉp 21:4).

Kyaj yˈokjamˈatanë axëkjäˈäy. Biiblyë jyënaˈany: «Es dëˈën yaˈixy ko Nintsënˈäjtëm Dios nyijäˈäp wiˈix dyajtsoˈogët diˈibë mëduunëp es wiˈix tpëjkëˈëgäˈäny ja axëkjäˈäyëty, ko naty ja fisyë, ttëytyunäˈäny» (2 Pe·drʉ 2:9).

Nyaywyintsëˈëgëyäˈänëdë jäˈäyëty ets nyaytsyokäˈänëdë nixim niyam. Kyaj yˈokjaˈatanë tëytyuumbë kyaabë atsojkpë ets ni diˈib axëkˈijxp. Tadë jäˈäyëty yˈitanëdë tuˈugyë ets ttukjukyˈatäˈändë Diosë nyëˈë tyuˈu (Isaías 26:9).