¿Tikots ngäjpxnaxtë Biiblyë?

Kanäk jëmëjt të nyaxy, mä ëëtsëty Jyobaa tyestiigëty, të nyajpëtsëmdëts, nʼëxpëktëts ets nyajwäʼkxtëtsë Biiblyë diʼibë wiink jäʼäy të tkäjpxnaxtë. Per ko ja tiempë nyajxy, tajëts nʼijxtë ko tsojkëbëtsë Biiblyë ngäjpxnaxtët diʼib mbäädë jäʼäy pyudëkëdë parë “tjaygyukëdët diʼibë dën tëyʼäjtën”, ets ti Dios tyukmëtsejpyë naxwinyëdë jäʼäy (1 Timotee 2:3, 4). Pääty mä jëmëjt 1950, jats nyajpyëtsëëmtsondaktë Biiblyë Traducción del Nuevo Mundo mä ayuk inglés. Ja kujk yajkäjpxnaxy 130 ayuk naxy, duʼun meerë të yajkäjpxnaxy extëm myiny, nitii të kyayajoʼotsy.a

Tëgoyʼäjtpë netyë Biiblyë diʼib kyaj tsip yajjaygyukët. Tëgäjtsʼadëtspë ayuk ko tiempë nyaxy, ets mayë Biiblyë diʼib të yajkäjpxnaxy tmëminyë ayuk diʼib tsip yajjaygyujkëp o diʼibë jäʼäy kyaj tʼokkäjpxnëdë. Ets nan të yajpäätyë neky diʼibë jäʼäy këʼam jyaaytyë, mä tnijääytyuttë meerë extëm ja Biiblyë diʼib tim jawyiin yajjääy, ets mbäädë net mas oy yajjaygyukë extëmë Biiblyë yajjääy hebreo, arameo ets griego.

Tëgoyʼäjtpë netyë Biiblyë diʼib tëyʼäjtën myaytyäʼägëbë Diosë yʼayuk. Pënaty kyäjpxnäjxtëbë Biiblyë kyaj dyajtëgatstë diʼib të yajkujayë mä Diosë yʼayuk, duʼun meerë tkäjpxnaxtë extëm myiny mä diʼib tim jawyiin yajjääy. Per mä mayë Biiblyë kyaj myinyë Diosë xyëë, Jyobaa.

Tëgoyʼäjtpë netyë Biiblyë diʼib yajmëjpëtsëmëp pën të dyajjäʼäyëty (2 Samuel 23:2). Mä Traducción del Nuevo Mundo, të jatëgokë Diosë xyëë yajkujayë naa jëxtujk mil okën, duʼun extëm myiny mä ja neky diʼib tëëyëp këʼam yajjääy, extëm yä abatkëʼëy yaʼixy (Salmo 83:18). Kom jeky të yajpayoʼoy wiʼix meerë tyëyʼäjtënëtyë Biiblyë, ta net tyam ndukʼoyʼäjtëm ko ngäjpxëm, pes yëʼë diʼib yajxon nyigajpxypyë Diosë wyinmäʼäny. Oy xymyëdat xykyamëdatëdë Traducción del Nuevo Mundo mä mʼayuk, oyxyëp ko xykyostumbrëpëky xykyäjpxët jabom jabomë Diosë yʼAyuk (Josué 1:8; Salmo 1:2, 3).

• ¿Tikots të nʼixtë ko oy ko Biiblyë yajkäjpxnaxët?

• ¿Ti mbäät tkostumbrëpëktë pënaty nyijawëyandëp tijatyë Dios tsyejpy?