¿Wiʼixëts ndukʼoyʼattë kojëts nduʼukmuktë mëdëtsë nmëguʼuktëjk?

Ëëtsëty, Jyobaa tyestiigëty, xëmëts nnaymyukëdë oy tyuʼuy xyuxy ets oyëts mumaty naxtë mä yukʼit diʼib kutsëʼëgë, nitiijëts xykyayajtuʼuduktë. ¿Tikots ndundë mëjää parëts nduʼukmuktë mëdëtsë nmëguʼuktëjk oyëts nbäättë amay jotmay ets oyëts nʼanuʼkxëdë mët kojëts të ndundë tuk xëë?

Yëʼë parëts ndukʼoyʼattë. Ko Pablo tmaytyaky nduʼukmujkëm mä ja naymyujkën, jyënany: “Nʼokʼëxtäʼäyëm ja winmäʼäny es nnaybyudëjkëm nixim niyam” (Ebreeʉsʉty 10:24). Tyäʼädë yëʼë ja tuk pëky yʼandijpy nnayʼixyʼäjtëm nixim niyam ets naytyukjotmaytyuʼunëmë nmëguʼukʼäjtëm. Kojëts nʼixyʼattë nmëguʼuktëjk yëʼëts xypyudëjkëdëp, pes nääk nan të duʼumbë jotmay tpäättë extëm ëëtsëty ets të tmëmadäʼäktë.

Yajkëktëjkëp ja naymyayë. Mäjëts nduʼukmuktë, duʼunëtsë nmëguʼuktëjk njawëdë extëmtsë nmëtnaymyaayëbëty, kyajts jeʼeyë nʼixtë extëmtsë nwinʼixyëty. Nan njuʼttëbëts näʼätyë tiempë parëts nduʼukmuktë etsëts nʼit nxondë o nʼix njawëdëts. ¿Wiʼixëts xypyudëkëdë? Xytyukniʼʼijxëdëbëts parëts nnaymyëjʼixëdët nixim niyam, ets yëʼë diʼib yajkëktëjkëp niʼigyë ja tsojkën diʼibëts tuʼugyë xyaʼijttëp. Ets kojëts ja nmëguʼuktëjk tpäättë amay jotmay, tajëts netyë nbudëkëdë mët ko tëjëts nyajkëktëkëdë ja naymyayë (Proverbios 17:17). Kojëts nduʼukmuktë mäjëts nʼëxpëktë, yëʼëts nyaʼijxëdëp ko nnaymyëjotmaybyatëdëbëts “nixim niyam” (1 Korintʉ 12:25, 26).

Oyxyëp ko xywyinʼixyë jäʼäy diʼib Dios mëduump parë mëët mnaymyayëdët. Ets jap mbäät xypyaaty mä Jyobaa tyestiigëty. Pääty, tuʼukmuk mët ëëtsëty, këdii xynyasʼixë ets ti myajtuʼudukëdët.

• ¿Wiʼixëts ndukʼoyʼattë kojëts nduʼukmuktë mä naymyujkën?

• ¿Näʼä xyʼixyʼatäʼäny mäjëts nnaymyukëdë?