¿Tikots nëjkxtë mäjëts nimay nduʼukmuktë?

¿Tiko tyäʼädë jäʼäy kyëxëʼëktë jantsy jotkujk? Yëʼko jam yajpäättë mä ja tuʼukmujkën o asamblee. Tëëyëp ja Dios mëduumbë ojts yaʼʼanëëmëdë ets tyuʼukmuktët tëgëkʼok tuʼukpë jëmëjt, nanduʼun tyam, mëjwiin kajaats ndukxondäʼäktë kojëts nduʼukmuktë jantsy nimay (Deuteronomio 16:16). Jëmëjt jëmëjt, tëgëkʼokëts nduʼukmuktë, majtskʼok tuk xëëjaty, diʼib yajtijp asamblee de sirkuitë ets jatëgok tëgëk xëë, diʼib yajtijp asamblee diʼib tuunëp mä ja it lugäär. ¿Wiʼixëts xypyudëkëdë?

Niʼigyëts nnayajtuʼugyëdë mëdëtsë nmëguʼuktëjk. Ja israelitëty jantsy agujk jotkujk ijty nyayjawëdë ko Jyobaa tmëjkumaytyë “mä asamblee”, ets nanduʼunëts nnayjawëdë kojëts nduʼukmuktë mëdëts nmëguʼuktëjk parëts nʼawdattë Dios (Salmo 26:12, notë; 111:1). Kojëts nduʼukmuktë, tajëts nʼixyʼattë wiinkpë Testiigëty diʼib yajpattëp mä wiinkpë naymyujkën ets axtë diʼib tsoʼondëp wiink paʼis. Ets kijkyxyëë, tajëts tuʼugyë ngaytyë mä tyunyëtyë tuʼukmujkën ets duʼunëts nbäättë nmëtnaymyaayëbë (Apostʉlʉty 2:42). Jap yaʼixy ja tsojkën diʼibëts xyajtuʼugyëdëp mëdëts ja “mmëmëbëjkpëty” diʼib yajpattëp abëtsemy naxwinyëdë (1 Peedrʉ 2:17).

Xypyudëjkëdëbëts parëts niʼigyë nwimbattët mä Diosë tyuunk. Ja israelitëty ojts pyudëkëdë ko “tjaygyujkëdë ja ää ayuk” diʼib tukniʼʼijxëbë Diosë yʼAyuk (Nehemías 8:8, 12). Tyam, nanduʼunëts nmëjjawëdë mëjwiin kajaa kojëts nʼëxpëktë mäjëts nduʼukmuktë, ets tijaty jap yajmaytyakp, ak jap yajpääty mä Biiblyë. Yajtukniʼʼijxëdëbëts wiʼixëts ndundët tijatyë Dios tsyejpy, mët ko nyaxy ja maytyaʼaky ets ko tijaty yaʼʼaduunaxy. Nanduʼunëts xypyudëkëdë kojëts nmëdooʼittë wiʼixëts ja nmëguʼuktëjk të tmëmadäʼäktë amay jotmay mä Dios mëdundë. Kojëts nmëdattë asamblee diʼib tuunëp mä ja it lugäär, yaʼʼaduunäjxp diʼib myaytyakypyë Biiblyë ets duʼun ja wyit xyox tpëjtäʼäktë extëm ijty tëëyëbë jäʼäy nyayxyoxëdë ets yëʼë diʼibëts mëjwiin kajaa xypyudëjkëdëp. Ets mäjaty tyunyëtyë tuʼukmujkën nëbajttëp pënaty të nyaytyukëdëkëdë Dios.

• ¿Tikots jotkujk njantsy nyayjawëdë mäjëts nduʼukmuktë nimay?

• ¿Wiʼix mbudëkëyaʼanyëty ko mnëjkxët mäjëts nduʼukmuktë nimay?