¿Wiʼixëts nbudëkëdë ja nmëguʼuktëjk ko yʼayoʼonbäättë?

Ko ti ayoʼon tyuny jyatyëty, ëëtsëty, Jyobaa tyestiigëty pojënëts nbudëkëdë nmëguʼuktëjk diʼib yajtëgoyʼäjttëp ja naybyudëkë. Kojëts duʼun ndundë, yëʼëjëts nyajnigëxëʼktëp ko nnaytsyojkëdëbëts nixim niyam (Fwank 13:34, 35; 1 Fwank 3:17, 18). ¿Wiʼixëts nnaybyudëkëdë?

Nnaybyudëjkëdëbëts mëdë meeny sentääbë. Ja Dios mëduumbëty diʼib Antioquía, tyuknigajxtë meeny sentääbë myëguʼuktëjk diʼib Judea ko jyamʼäjtyë mëk yuu (Apostʉlʉty 11:27-30). Nanduʼun tyam, kojëts nnijawëdë nmëguʼuktëjk diʼib wiinktsoo yajpattëp ko tsip nimëjää dyajnaxtë xyëë tiempë, tajëts ngaxtë meeny sentääbë diʼibëts nyäjktëp tsojkëngyëjxm mä naymyujkën parë yajtukpudëkëdët (2 Korintʉ 8:13-15).

Nyäjktëbëtsë naybyudëkë. Ja diʼib tuump mëjjäʼäy ets yajpääty mä ja lugäär diʼib të wyindëgoy, yëʼë yʼëxtääytyëp niduʼuk niduʼuk ja myëguʼuktëjk diʼib mä naymyujkën ets tʼixtë pën kyaj pën wiʼix të jyaty. Ets waʼan yëʼë ja komitee diʼib pyudëjkëdëbë nmëguʼuktëjkëtyëts ko ti yʼayoʼonbëjtaʼaky, dyajwäʼkxtë ja käʼäy ukën, nëë, wit, tʼixtë ja jäjtakn ets dyajtsoybyattë. Mayë Jyobaa tyestiigëty diʼib tijaty jyäjt nyijäʼäwëdëp, nayʼawäʼänëdëp parë nëjkx tpudëkëyäʼändë myëguʼuktëjk o nëjkx tʼagojëyäʼändë jyëën tyëjk o ja Tëjk mäjëts nʼëxpëktë. Ets mbäädëts pojënë nëjkxtë mä tyëgoyʼatyë naybyudëkë, mët ko tuʼugyëts nnayaʼitëdë ets mët ko tëjëts njattë tuʼugyë ndundët. Nbudëjkëdëbëts ja nmëguʼuktëjk diʼibëts mëët tuʼugyë mëbëjkënë nmëdattë, per nan nbudëjkëdëbëts diʼib wiink relijyonk tyukʼijtëdëp kojëts nmadäʼäktë (Galasyʉ 6:10).

Nbudëjkëdëbëts mëdë Biiblyë ets njotkujkmooytyëbëts. Ko jäʼäy yʼayoʼonbäättë yëʼë tsyojktëp ets pën jyotkujkmoʼoyëdët. Jaa duʼun mä myëjämoʼoyëdë Jyobaa, ja Dios diʼib “xyajjotkujkʼäjtëm” (2 Korintʉ 1:3, 4). Pääty, pënaty määy täjtëp ndukʼijxtëbëts mä Biiblyë tijaty wyandakypyë Dios, mä tnigajpxy ko tim tsojkë Diosë yʼAnaʼam Kyutujkën dyajjëjptëgoyaʼany tijaty tyam ayoʼonbëjtakp, diʼib yajkypyë jäj jëmuʼumën ets diʼib xyaʼʼayoʼojëm (Diʼibʉ Jatanʉp 21:4).

• ¿Tiko ëëtsëty, Jyobaa tyestiigëty, mbäädëts pojënë tijaty ndundë ko ti yʼayoʼonbëjtaʼaky?

• ¿Wiʼixëts njotkujkmoʼoytyë mëdë Biiblyë pënaty të tsyokwëʼëmdë?