¿Ti yʼandijpy Betel?

Mä ayuk ebreo Betel, yëʼë yʼandijpy “Diosë tyëjk” (Génesis 28:17, 19, notë). Duʼun yajtijy ja tëjk diʼibë Jyobaa tyestiigëty myëdäjttëp abëtsemy naxwinyëdë, mä yajtukniwitsë wiʼix mbäät yajtunyë Diosë tyuunk. Nueva York (Estados Unidos) jap yʼityë kyopk ets jap yajpäättë Diʼib wyooyoʼoytyëbë Jyobaa tyestiigëty, desde jap tʼixtë wiʼix tyundë mä tuʼuk tuʼugë Betel diʼib yajpatp mä kanäägë paʼis. Niʼamukë nmëguʼuktëjkëtyëts diʼib tuundëp mä duʼumbë lugäär, ja yaʼixyʼattë familyë Betel. Duʼun jyukyʼattë extëm tuʼugë familyë, tuʼugyë tyundë, kyay yʼuktë ets tʼëxpëktë Biiblyë (Salmo 133:1).

Yëʼë tuʼugë lugäär mä tyundë amumduʼukjot. Mä tuʼuk tuʼugë Betel, yajpäättë yetyëjk toxytyëjk diʼib të nyaytyukëdëkëdë Dios ets yëʼëyë tyuundëp ti Dios tsyejpy ets dyajmëjwindëkëdë ja tuunk mä yajkäjpxwaʼkxyë Diosë Kyutujkën (Matewʉ 6:33). Kyaj pën yajmëjuy, jeʼeyë yajmoʼoytyë tuʼugë kyuartë etsë kyaʼay yʼukën, nan yajmooytyëp waanë naybyudëkë parë këʼëm dyajtundët. Niduʼuk niduʼuk tmëdattë tyuunk, tam diʼib tuundëp: ofisinë, komedoor, kosinë, mä pyëtsëmyë ëxpëjkpajn, mä wyaʼatsyë jëën tëjk, mä wit yajpujy, ets tam diʼib tiiyëm tyuundëp.

Yëʼë tuʼugë lugäär mä mëk tyundë parë yajkäjpxwaʼkxyë Diosë Kyutujkën. Ja tuungë jëjpʼambë diʼib yajtuump mä tuʼuk tuʼugë Betel, yëʼë parë niʼamukë jäʼäy tnijawëdët ja tëyʼäjtën. Extëmë tyäʼädë foyetë jam të kyojy. Diʼib wyooyoʼoytyëbë Jyobaa tyestiigëty yëʼë të tʼixtë wiʼix të yajjäʼäy, ets ta net ttuknigaxtëtsë nmëguʼuktëjk diʼib abëtsemy nyaxwinyëdë käjpxnäjxtëp kanäk ayuk. Ta net dyajpëtsëmdë mä prensas diʼib pojënë yajpëtsëëmbyë ëxpëjkpajn, diʼib yajpatp kanäk paʼis etsë net dyajwäʼkxtë mäjatyë naymyujkën diʼib jaʼäjtp 110,000 naxy. Familyë Betel yëʼëts diʼib kajaa xypyudëjkëdëp mä yajtunyë tyäʼädë tuungë jëjpʼambë: yajkäjpxwaʼkxyë oybyë ayuk (Markʉs 13:10).

• ¿Pënaty tuundëp Betel ets tijaty yajmooytyëp?

• ¿Ti tuungë jëjpʼambë yajtuump Betel?