¿Wiʼix yajjäʼäy ets yajkäjpxnaxyë ëxpëjkpajn?

Parë yajmënëjkxët “ja oybyë ayuk [...] mä tëgekyë nax käjpn, mä tëgekyë naxwinyëdë, es mä tëgekyë wiinkpë ayuk käjxpë”, jats nyajpëtsëmdë ëxpëjkpajn naa 750 ayuk (Diʼibʉ Jatanʉp 14:6). ¿Wiʼixëts ndundë tyäʼädë tuunk diʼib mëjwiin kajaa? Mët ko jyaʼʼaty tuk grupë jäʼäy diʼib tsoʼondëp kanäk paʼis diʼib jyaaytyëp ja ëxpëjkpajn ets nanduʼun diʼib kyäjpxnäjxtëp, niʼamukë ak yëʼë Jyobaa tyestiigëty.

Inglés yajjäʼäyë ëxpëjkpajn. Diʼib wyooyoʼoytyëbë Jyobaa tyestiigëty, yëʼë yʼijxtëp wiʼix tyundë ja Grupë diʼib Jääytyëp diʼib yajpatp mä kyopkë Jyobaa tyestiigëty. Tyäʼädë grupë yëʼë nyikëjxmʼäjttëp ets tyuunkmooytyëp pënaty jääytyëp, duʼun diʼib tuundëp mä ja kyopk ets nanduʼun diʼib tuundëp mä wiinkpë sukursal. Ko tsyoondë kanäk paʼis ja grupë diʼib jääytyëp, ta mbäät yajxon yajnimaytyaʼaky ja ëxpëjkpajn extëmë jäʼäy tmëdattë kostumbrë, pääty ko net yajmoʼoytyë jäʼäy, ta tʼoyʼixtë oy mä tsyoondë.

Ko yajjääytyaʼay ta net yajtuknigaxtë diʼib käjpxnäjxtëp. Ko nety të yajjääytyaʼay tuʼugë ëxpëjkpajn ets të yajkupëky, ta net yajtuknigaxtë abëtsemy nyaxwinyëdë ja diʼib käjpxnäjxtëp, ta net yëʼëjëty tkäjpxnaxtë, dyaʼoyëdë ets tʼixtë wiʼix pyëtsëmäʼäny. Pënaty käjpxnäjxtëp, tyuundëbë mëjää parë dyajtundë “ayuk diʼib meerë nëjkxäämp” ets duʼun tkäjpxnaxtë extëm meerë myiny inglés (Eclesiastés 12:10).

Komputadoorë yëʼë diʼib mëët pojënë yajtuny. Per tuʼugë komputadoorë kyaj mbäät tyuny extëmë jäʼäy, jyaʼayët ets kyäjpxnaxët. Per mbäät pojënë tijaty yajpayoʼoy, pes myëdäjtypyë diksionaaryë ets kanäk pëkyë ëxpëjkpajn. Extëmë Jyobaa tyestiigëty të dyajkojtë tuʼugë programë diʼib yaʼixyʼäjtp MEPS (duʼun tmëdatyë siglas inglés). Tyäʼädë programë kyaj këʼëm tkäjpxnaxyë ëxpëjkpajn, per yëʼë tuump parë nyäjxtäʼäy mä komputadoorë kanäk mëgoʼpx ayuk mëdë nyidibujë ets ta net kyojy.

¿Tikots ndundë mëjää parë kanäk ayuk yajkäjpxnaxët, oy jeʼeyë tuk mil majtsk milë jäʼäy diʼib duʼun käjpxtëp? Yëʼko Jyobaa tsyejpy ets niʼamukë jäʼäy nyitsoʼogët “es nandëʼën tjaygyukëdët diʼibë dën tëyʼäjtën” (1 Timotee 2:3, 4).

• ¿Tijaty yajtuump ko yajjäʼäyë ëxpëjkpajn?

• ¿Tikots ngäjpxnaxtë kanäk ayuk?