Panëjkxtë ja kugajpxyëtyë yˈijxpajtën: Nahúm
1. ¿Ti xytyukniˈˈijxëmë liibrë diˈib xyëˈäjtypy Nahúm?
1 Nínive yëˈë ijty tuˈugë siudad, per tyam yajpääty ak potsy kyutuk. Tyäˈädë yëˈë xytyukˈijxëm ko duˈun extëmë Nahúm ojts tnaskäjpxë, Jyobaa tyukumëdoobyë myëtsipëty. Ets ni yëˈë mëk axëkjäˈäybyë mbäät kyayajtuˈudukyëty (Nah. 1:2, 6). Ko nˈëxpëjkëm tijatyë Nahúm ojts tnaskäjpxë, mbäät xytyukniˈˈijxëm tijaty mä ngäjpxwäˈkxëm.
2. ¿Wiˈix tyam nanduˈun ngäjpxwäˈkxëmë oyˈäjtën?
2 Nˈokjotkujkmoˈoyëmë jäˈäy. Mbäät nwinmäˈäyëm ko Nahúm, yëˈëyë myaytyakypy ja ayoˈon diˈib yajtuknikäjpxpajtë Nínive, ja siudad diˈib yajpat Asiria (Nah. 1:1; 3:7). Per ja ää ayuk diˈib nyigäjpx, jyotkujkmooyë Diosë kyäjpn. Nahúm diˈibë xyëë nikajp “Jotkujkmoopy”, yˈanmääy ja judiyëtëjk ko ja myëtsipëty tim tsojkë nety kyutëgoyäˈändë. Nan yˈanmääy ko Jyobaa yëˈë “diˈib nˈaˈoˈkëm ko nbatëmë amay jotmay” (Nah. 1:7). Ëtsäjtëm, nan yëˈë ngäjpxwäˈkxëmë oybyë ayuk ets nˈanmäˈäyëmë jäˈäy parë tˈaˈoogëdë Jyobaa (Nah. 1:15).
3. Duˈun extëmë Nahúm, ¿wiˈix mbäät nbëjtakëmë ijxpajtën mä ngäjpxwäˈkxëm?
3 Nˈokpëjtakëmë ijxpajtën. Jyobaa yëˈë wyinmäˈänymyooyë Nahúm parë tkujäˈäyë ko duˈun extëmë netyë Asiria të dyajkutëgoyë Tebas (o No-amón), ja siudad diˈib Egipto, nanduˈunë netyë Nínive kyutëgoyaˈany (Nah. 3:8-10). Ko jäˈäy ndukmëtmaytyakëm wiˈix jyëjptëgoyaˈanyë tyäˈädë axëëkpë jukyˈäjtën, nˈokˈyajtuˈunëm tijaty ojts yajnaskäjpxë mä Biiblyë parë ndukˈijxëm ko Jyobaa kyuytyuundaabyë yˈayuk. Extëm nˈokpëjtakëm, ko nyaybyëjkëdë Babilonia mëdë medos, ta tnibëdëˈktë Nínive mä jëmëjt 632 mä kyajnëm myinyë Jesus. Ets ko jyantsy tyuuy, ta ja mëj nëë Tigris yˈabëyëˈknäjxy ets dyajnajijtutääy ja siudad. Duˈuntsoo yajnidëjkë ets kyutëgooyë Nínive extëmë netyë Jyobaa të tnaskäjpxë (Nah. 1:8; 2:6).
4. ¿Wiˈix mbäädë jäˈäy nmëtmaytyakëm yajxon ets extëm mbäät tjaygyukë?
4 Nˈokmaytyakëm yajxon ets extëm mbäät yajjaygyukë. Tijatyë Nahúm kyujäˈäyë, yajxon tnigäjpxtääy, wingëjxy ets yajmonyˈijx yajmonyjäˈäwëp (Nah. 1:14; 3:1). Nanduˈun mbäädë jäˈäy nmëtmaytyakëm extëm mbäät pojënë tjaygyukë (1 Kor. 14:9). Ko tim jawyiin ninëjkxëm, nˈokˈanmäˈäyëm tiko jam nyajpatëm. Ets pënaty mëët nˈëxpëjkëmë Biiblyë, nˈokpudëjkëm parë dyajkëktëkëdë myëbëjkën mä Jyobaa, mä Biiblyë ets parë tjaygyukët wiˈix ttukˈoyˈaty tijaty yˈëxpëjkypy (Rom. 10:14).
5. ¿Tiko xyajnayjäˈäwëm seguurë diˈibë Nahúm ojts tnaskäjpxë?
5 Nahúm myëbëjk ko Jyobaa yˈayuk seguurë yˈadëy, ets nigëxëˈkp mä ja liibrë diˈib myënëjkxypyë xyëë. Mientrës wyingony mä jyëjptëgoyaˈanyë Satanásë yˈanaˈamdakn, xyjotkujkmoˈoyëm extëmë Jyobaa twandaˈaky: “Kyaj jyaˈˈatäˈäny jatëgokë jotmay” (Nah. 1:9).